ថ្នាក់ដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិ មានសមាសភាពម្ខាង ៣ រូប ដែលបានជួបចរចា ឈានទៅបញ្ចប់វិបត្តិនយោបាយ ក្រោយការបោះឆ្នោត កាលពីព្រឹកថ្ងៃទី២២កក្កដាម្សិលមិញ បានព្រមព្រៀងគ្នាថា នឹងចូលក្រាបបង្គំគាល់ព្រះមហាក្សត្រ នៅម៉ោង ៤ រសៀល ថ្ងៃព្រហស្បតិ៍ ទី២៤កក្កដាស្អែកនេះ នៅព្រះបរមរាជវាំង។
ថ្នាក់ដឹកនាំគណបក្សជាប់ឆ្នោតទាំងពីរ ដឹកនាំដោយសម្តេចហ៊ុនសែន និងលោកសមរង្ស៊ី នឹងទូលថ្វាយព្រះករុណា ព្រះមហាក្សត្រ អំពីលទ្ធផលនៃកិច្ចព្រមព្រៀង រវាងគណបក្សទាំងពីរ ដែលទើបតែសម្រេចបាន ក្នុងកំណែទម្រង់រដ្ឋសភា និងកំណែទ្រង់គជប រួមទាំងការបញ្ចប់វិបត្តិនយោបាយ ដោយគណបក្សសង្គ្រោះជាតិ ព្រមព្រៀងចូលរដ្ឋសភា ជាដើម។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានបញ្ជាក់ថា ថ្នាក់ដឹកនាំកំពូល របស់គណបក្សសង្គ្រោះជាតិ ដែលនឹងចូលក្រាបបង្គំគាល់ព្រះករុណាព្រះមហាក្សត្រ នារសៀលថ្ងៃព្រហស្បតិ៍ស្អែកនេះ រួមមាន៖ លោក សមរង្ស៊ី លោកកឹមសុខា និងលោកប៉ុលហំម។ ថ្នាក់ដឹកនាំគណបក្សសង្គ្រោះជាតិទាំងបីរូប គឺជាសមាសភាព ក្រុមចរចាថ្នាក់កំពូល កាលពីថ្ងៃទី២២កក្កដា។
ចំណែកគណបក្សប្រជាជនកម្ពុជា មិនអាចទាក់ទងបានទេ នៅព្រឹកថ្ងៃទី២៣កក្កដានេះ។ ប៉ុន្តែថ្នាក់ដឹកនាំកំពូលគណបក្សប្រជាជនកម្ពុជា ដែលបានជួបចរចាជាមួយគណបក្សសង្គ្រោះជាតិ កាលពីថ្ងៃទី២២កក្កដា រួមមាន៖ សម្តេចហ៊ុនសែន លោកសខេង និងលោកសាយឈុំ។
យ៉ាងណាក៏ដោយ លោក យឹម សុវណ្ណ មិនទាន់អាចបញ្ជាក់ថា ពេលណាទើបបេក្ខជនជាប់ឆ្នោតទាំង ៥៥ រូប របស់គណបក្សសង្គ្រោះជាតិ ចូលធ្វើសច្ចាប្រណិធាន នៅមុខព្រះភ័ក្ត្ររបស់ព្រះមហាក្សត្រ ក្នុងព្រះបរមរាជវាំង មុននឹងចូលរួមប្រជុំរដ្ឋសភានោះទេ។
នៅពេលនេះ លោក យឹម សុវណ្ណ បានអះអាងថា ក្រុមការងារគណបក្សសង្គ្រោះជាតិ និងគណបក្សប្រជាជនកម្ពុជា កំពុងតែដំណើរការអនុវត្តកិច្ចព្រមព្រៀង ស្តីពី ដំណោះស្រាយនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ដែលបានចុះហត្ថលេខាឯកភាពគ្នា កាលពីថ្ងៃទី២២ ខែកក្កដា ឆ្នាំ២០១៤។
កិច្ចព្រមព្រៀងរវាងគណបក្សទាំងពីរ មាន ៦ ចំណុច ដែលរួមមាន ការកែទម្រង់ស្ថាប័នរៀបចំការបោះឆ្នោត គជប សមាសភាពគជប ៩ រូប តាមរូបមន្ត ៤-៤-១ ហើយត្រូវចែងក្នុងរដ្ឋធម្មនុញ្ញ និងកំណែទម្រង់ក្បាលម៉ាស៊ីនរដ្ឋសភា តាមរូបមន្ត ៧ ទល់ ៦ ជាដើម។
លោក យឹម សុវណ្ណ បានអះអាងថា នៅពេលដែលរៀបចំកំណែទម្រង់តាមកិច្ចព្រមព្រៀងនោះ រួចរាល់ពេលណា គឺបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ នឹងចូលទៅទទួលអាសនៈនៅរដ្ឋសភា ពេលនោះភ្លាម។
ការសម្រេចបានកិច្ចព្រមព្រៀង និងការសម្រេចចូលរដ្ឋសភា របស់គណបក្សសង្គ្រោះជាតិ នៅពេលនេះ ត្រូវបានលោក យឹម សុវណ្ណ គូសបញ្ជាក់ថា មិនមែនជាការបែងចែកអំណាចជាមួយនឹងគណបក្សប្រជាជនកម្ពុជាទេ តែជាការទៅទទួលយកអំណាច ដែលប្រជាពលរដ្ឋម្ចាស់ឆ្នោត បានប្រគល់ឲ្យគណបក្សសង្គ្រោះជាតិ តាមរយៈការបោះឆ្នោត កាលពីថ្ងៃទី២៣ ខែកក្កដា ឆ្នាំ២០១៣៕