មណ្ឌលគិរី ៖ យោងតាមប្រភពព័ត៌មានពីប្រជាពលរដ្ឋនិង សមត្ថកិច្ចតូចតាចនៅក្នុងខេត្តមណ្ឌលគិរីបានឲ្យដឹងថា បច្ចុប្បន្ននេះលោកឧកញ៉ា ហ៊ុន ជា ដែលប្រជាពលរដ្ឋនៅខេត្តមណ្ឌលគិរីហៅថា លោកជា..ជាមេឈ្មួញព្រៃឈើបាននិងកំពុងតែធ្វើសកម្មភាពសម្រុក ដឹកជញ្ជូនឈើចេញទៅលក់ប្រទេសវៀតណាមតាមច្រកដាក់ដាំក្នុងខេត្តមណ្ឌលគិរីយ៉ាងអនាធិបតេយ្យជាទីបំផុតដោយពុំមានអាជ្ញាធរនិងសមត្ថកិច្ចខេត្តមណ្ឌលគិរី ណាមួយហ៊ានចេញមុខបង្ក្រាប ឫ ហ៊ានប៉ះពាល់ការនាំចេញក្បួនឈើខុសច្បាប់របស់មេឈ្មួញឧកញ៉ា ហ៊ុន ជា ត្រូវជាក្មួយរបស់សម្តេចតេជោ ហ៊ុន សែន នោះ។
ប្រភពខាងលើបានឲ្យដឹងទៀតថា ក្នុងមួយយប់ៗក្បួនរថយន្តដឹកឈើរបស់មេឈ្មួញឧកញ៉ា ហ៊ុន ជា រាប់សិបគ្រឿងបានធ្វើសកម្មភាពដឹកជញ្ជូនតាមច្រកដាក់ដាំ យកទៅលក់នៅប្រទេសយ៉ាងអនាធិបតេយ្យ ក្នុងនោះអស់លោកអាជ្ញាធរនិងសមត្ថកិច្ចខេត្តមណ្ឌលគិរី មិនហ៊ានយកភ្នែកមើលនោះទេ ដោយគេដាក់ការសង្ស័យថា អស់លោកទាំងនោះប្រហែលជាឃុបឃិតជាមួយលោកឧកញ៉ាមេឈ្មួញ ហ៊ុន ជាហើយមើលទៅ បានជាមិនមានវិធានការទប់ស្កាត់និងបង្ក្រាបបទល្មើសព្រៃឈើតាម បទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនោះឡើយ។
បើតាមប្រភពផ្ទៃក្នុងរបស់មេឈ្មួញ ហ៊ុនជា បានលួចខ្សឹបប្រាប់ឲ្យដឹង ថា ដោយសារតែមានការបើកដៃពីអស់លោកអាជ្ញាធរនិងសមត្ថកិច្ចខេត្តមណ្ឌលគិរី ព្រោះគិតថាបានប្រយោជន៍ទាំងអស់គ្នា ហើយទើបមិនធ្វើសកម្មភាពបង្ក្រាបបទល្មើសព្រៃឈើរបស់ឧកញ៉ាហ៊ុន ជា ដែលជាក្មួយប្រុសបង្កើតរបស់សម្តេច ហើយខ្លួនក៏ទទួលបានប្រយោជន៍ពីឧកញ៉ា ហ៊ុន ជា ដែរ។ ដោយហេតុនេះហើយទើបមេឈ្មួញដែលជាឧកញ៉ា ហ៊ុន ជា អាចធ្វើការដឹកជញ្ជូនផលព្រៃឈើ តាមរថយន្តគ្រប់ប្រភេទចេញតាមច្រកដាក់ដាំទៅ លក់នៅប្រទេសវៀតណាមយ៉ាងគគ្រឹកគគ្រេងទាំងថ្ងៃទាំងយប់ ដោយមិនរំខានដល់អស់លោកអាជ្ញាធរនិងសមត្ថកិច្ច ខេត្តមណ្ឌលគិរី នោះទេ។
គួរម្លឹកផងដែរថា បើទោះបីជាមានការរិះគន់ចំៗ ទៅលើមេឈ្មួញឧកញ៉ា ហ៊ុន ជា..យ៉ាងណាក៍ដោយទាក់ទងនិងករណីបំផ្លិចបំផ្លាញព្រៃឈើនៅក្នុងខេត្តមណ្ឌលគិរីក៍អស់លោកអាជ្ញាធរនិងសមត្ថកិច្ចខេត្តមណ្ឌគិរី ពិសេសឯកឧត្តម សាយ សំអាល រដ្ឋមន្ត្រីក្រសួងបរិស្ថាន និង ឯកឧត្តម វ៉េង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទនិង
ឯកឧត្តម សៅ សុខា មេប៉េអឹមលើផ្ទៃប្រទេស ដែលទទួលបន្ទុក ជាគណះកម្មការបង្ក្រាបបទល្មើសព្រៃឈើទូទាំងប្រទេសកម្ពុជា ហាក់ដូចជាមិនខ្វល់លើករណីការលួចនាំចេញឈើខុសច្បាប់របស់មេឈ្មួញ ឧកញ៉ា ហ៊ុន ជា រូបនោះឡើយ ដោយទំនងពួកគាត់ទាំងនេះទទួលបានកាដូពិសេសប្រចាំខែពីមេឈ្មួញ ហ៊ុនជាអស់ហើយទេមើលទៅ។
ក្រុមមន្ត្រីបក្សប្រឆាំងនិងអង្គការការពារសម្បត្តិធនធានធម្មជាតិប្រចាំការខេត្តមណ្ឌលគិរីបានចោទប្រកាន់ឧកញ៉ា ហ៊ុន ជា ថា គឺជាមេឧក្រឹដ្ឋជនបំផ្លិចបំផ្លាញព្រៃឈើដ៌សកម្មនៅក្នុងខេត្តមណ្ឌគិរី ដោយមេឈ្មួញរូបនេះអាងអំណាចសម្តេចនាយករដ្ឋមន្ត្រី ហ៊ុន សែន ដែលជាឪពុកមា អញ្ចឹងហើយបានជាមេឈ្មួញរូបនេះគ្មានញញើតនិងអ្នកណាបន្តិចសោះនោះ។
ប្រភពខាងលើបានលើកឡើងថា សម្តេចនាយករដ្ឋមន្ត្រី ហ៊ុន សែន ធ្លាប់បានស្រែកចំពោះមុខមហាជនប៉ុន្មានដងរួចមកហើយ សម្តេចនឹងទប់ស្កាត់និងបង្ក្រាបបទល្មើសព្រៃឈើនៅក្នុងប្រទេសកម្ពុជាឲ្យខានតែបាន ប៉ុន្តែនៅពេលនេះក្មួួយបង្កើតរបស់គាត់ មេឈ្មួញឧកញ៉ា ហ៊ុន ជា កំពុងតែធ្វើសកម្មភាពដឹកជញ្ជូនឈើយកទៅលក់នៅប្រទេសវៀតណាមទាំងយប់ទាំងថ្ងៃយ៉ាងគគ្រឹកគគ្រេងដូចក្បួនហែរបុណ្យអង្គកឋិនផងដែរ ។គេចាំមើលថា សម្តចតេជោ ហ៊ុន សែន នាយករដ្ឋមន្ត្រី អាចបង្ក្រាបឲ្យខានតែបានដូចសម្តចធ្លាប់បានសន្យាដែររឺទេ…?។ទាក់ទិននិងព័ត៏មានខាងលើអ្នកសារព័ត៏មានយើងមិនអាចសុំការពន្យល់ពីរលោកឌកញ៉ាបានទេ៕