ខេត្តស្ទឹងត្រែង ៖ ថ្មីៗនេះប្រភពពីប្រជាសហគមន៍នៅឃុំស្រែគរ ស្រុកសេសាន ខេត្តស្ទឹងត្រែង បានឲ្យការិយាល័យសារព័ត៏មានយើងដឹងថា ៖ មកដល់ពេលនេះឈ្មួញឈើធំៗមួយចំនួនដែលគេស្គាល់មុខ មានលោក គិត ម៉េង និងមេឈ្មួញព្រៃឈើដ៏ធំបំផ្លាញព្រៃឈើប្រចាំសត្សវត្សនេះឈ្មោះ លឹម ប៊ុណ្ណា ( ហៅខ្នា ) នៅតែបន្ត កាប់ឈើខាងក្រៅបាតអាងទំនប់វារីអគ្គិសនីសេសាន្ដក្រោម២ យ៉ាងពេញបន្ទុក យកទៅលក់ឲ្យយួន បើទោះបីទំនប់វារីអគ្គិសនីនោះត្រូវស្ថាបនារួចរាល់ទៅហើយក៏ដោយ។បញ្ហានេះដែរតាម មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុងខេត្តស្ទឹងត្រែង បានធ្វើការរិះគន់ឲ្យដឹងថា ក្រុមហ៊ុនសម្អាតបាតអាងទំនប់វារីអគ្គិសនីនេះ បានសាងសង់ស្ពានបណ្ដែតទឹកមួយនៅខាងក្រោមទំនប់ជាយុទ្ធសាស្ដ្រលួចលាក់ ដើម្បីសម្ងំដឹកជញ្ជូនឈើខុសច្បាប់ឆ្លងទន្លេចូលមកផ្ទៃអាងដើម្បី លួចយកឈើខុសច្បាប់ទាំងនោះក្លាយទៅជាឈើស្របច្បាប់។ ហើយដែលមកដល់ពេលនេះ បញ្ហានោះវាស្ថិតនូវលើលោក វេង សាខុន រដ្ឋមន្ត្រីក្រសួងកសិកម្ម និងលោក សាយ សំអាល់រដ្ឋមន្ត្រីក្រសួងបរិស្ថានដែលគួរតែគិតយ៉ាងណា ? ដែលមានទាំងភ័ស្តុតាងជាច្រើនត្រូវបានគេរកឃើញការកាប់ឈើខុសច្បាប់នៅក្រៅតំបន់អាងដែលជាដែនព្រៃហាមឃាត់ដឹកចូលក្រុមហ៊ុនពីសំណាក់សហគមន៏ ជនជាតិ ប្រជាពលរដ្ឋ និងមានការចុះផ្សាយពីកាសែតអន្ដរជាតិ និងកាសែតក្នុងស្រុក ក៏ដូចជាសង្គមហ្វេសបុកបង្ហោះព្រោងព្រាត ប៉ុន្ដែមិនត្រឹមតែមិនទប់ស្កាត់ ឫបង្ក្រាបនោះទេ បែរជាកាន់តែឲ្យឈ្មួញបំភ្លៃការពិត ថែមទាំងបណ្ដែតបណ្ដោយអោយក្រុមឈ្មួញបន្ដការកាប់បំផ្លាញព្រៃឈើជាបន្ដនៅក្រៅបាតអាង ក្នុងតំបន់ដែនព្រៃឈើព្រះរាជក្រឹត្យនៅស្រុកសេសាន និងតំបន់ស្រែពក យ៉ាងមហន្តរាយបំផុត។
មិនតែប៉ុណ្ណោះតាមសកម្មជនព្រៃឈើនិងមន្ត្រីអង្គការក្រៅរដ្ឋាភិបាល ព្រមទាំងប្រជាពលរដ្ឋនៅភូមិស្រែគរចាស់ បានរិះគន់ឲ្យដឹងទៀតថា ដូចកាលពីថ្ងៃទី១៨ ខែតុលា កន្លងទៅគឺក្រុមអ្នកភូមិសហគមន៏ ជនជាតិ បានប្រទះឃើញឈ្មួញដឹកជញ្ជូនឈើមូលតាមទូកធំៗពីត្រើយម្ខាងនៃទន្លេស្រែពក រាប់សឹបទូកទាំងខ្សែៗទៅកាន់ទីសម្ចតហើយលើកដាក់លើរថយន្តយីឌុបធំៗចាំទទួលដឹកចេញពីតំបន់នោះជាប្រចាំទាំងយប់ទាំងថ្ងៃទៅកាន់ព្រំដែនយួនឆ្លងកាត់ខេត្តក្រចេះស្រុកស្នួលតាមច្រកវ៉ាលឺ ។
ប្រភពបានឲ្យដឹងទៀតថា នៅក្នុងបរិវេណបាតអាងទំនប់វារីអគ្គិសនីសេសានក្រោម២មានរោងចក្រអារឈើដ៏ធំមួយ និងមានម៉ាស៊ីនសម្រាប់អារច្រៀកឈើដើម្បីដឹកជញ្ជូនធ្វើអាជីវកម្មយ៉ាងពេញបន្ទុកផងដែរ។
ជាងនេះទៅទៀតប្រភពពីមន្ត្រីអាជ្ញាធរមូលដ្ឋានក្នុងស្រុកសេសាន២ក៏ បានឲ្យដឹងផងដែរថា គឺក្រុមមេឈ្មួញមានងារឧកញ៉ាម្នាក់ដែលគេបានហៅថា ជាក្រុមឧកញ៉ាជ័យ ឧកញ៉ាតាំងវិរ៉ាដា ក្រុមសាន ចយ និងក្រុមអ៊ុក គឹមសាន្ដ បានជួលក្រុមហ៊ុនចិនក្នុងទឹកប្រាក់ប្រមាណជា១០ម៉ឺនដុល្លារ អោយធ្វើស្ពានបណ្ដែតទឹកចល័តមួយដែលពួកគេអាចដឹកជញ្ជូនឈើរាប់សិបតោនឆ្លងកាត់ទន្លេស្រែពកមិនពិបាក ជាងដឹកតាមក្បូន និងតាមរថយន្ដ ដើម្បីជាយុទ្ធសាស្ត្រដឹកជញ្ជូនឈើបន្ដសុវត្ថភាពពីក្រៅបាតអាង ចូលក្រុមហ៊ុន និងដឹកចេញពីក្រុមហ៊ុនចម្លងទៅលក់ស្រុកយួន ។
តាមសេចក្ដីរាយការណ៍ពីសមត្ថកិច្ចមូលដ្ឋានក្នុងស្រុកសេសាន ខេត្តស្ទឹងត្រែង ក៏បានឲ្យដឹងដែរថាក្នុងមួយថ្ងៃៗមានរថយន្តយីឌុបជាច្រើនគ្រឿងដឹកឈើឆ្លងកាត់ស្ពានបណ្ដែតទឹកនោះដើម្បីនាំចេញទៅលក់នៅក្រៅប្រទេស ហើយថា.មន្ត្រីអាជ្ញាធរ និងសមត្ថកិច្ចក្នុងមូលដ្ឋានមិនហ៊ានប៉ះពាល់ឈ្មួញជាឧកញ៉ានោះឡើយ។ ហើយក្រុមមន្ត្រីអាជ្ញាធរឃុំស្រែគរ បានបញ្ជាក់ផងដែរថា ត្រឹមអាជ្ញាធរឃុំ ស្រុក ទំនងមិនមានអំណាចទៅអាចបង្ក្រាបបទល្មើសព្រៃឈើទ្រង់ទ្រាយធំរបស់ក្រុមមេឈ្មួញឧកញ៉ាទុច្ចរឹតរាប់ភ្លេចជាអាយ៉ងរបស់ឧកញ៉ា គិត ម៉េង នោះបានទេ គឺបានត្រឹមតែរាយការណ៍ទៅថ្នាក់លើឲ្យចាត់វិធានការទប់ស្កាត់ជាបន្ដប៉ុណ្ណោះ ហើយឯធ្វើ ឫធ្វើពៀមិនចុះបង្ក្រាបនោះវាជារឿងរបស់ថ្នាក់លើ រដ្ឋមន្ត្រីជំនាញទាំងពីរ និងក្រុមអន្ដរះក្រសួងរបស់អាវុធហត្ថផ្ទៃប្រទេសនោះឯង ។ប៉ុន្តែមកទល់ពេលនេះគ្មាននរណាទទួលខុសត្រូវនោះទេក្រៅពីទទួលលាភសក្ការះអំពើពុករលួយ ,!ថ្នាក់លើមិនយកចិត្តទុកដាក់ក្នុងការបង្ក្រាបបទល្មើសព្រៃឈើនោះឡើយ។
ដោយឡែក ដោយសារតែការអសមត្ថភាពទាំងព្រមនោះហើយ ទើបមន្ត្រីអង្គការក្រៅរដ្ឋាភិបាលបានលើកឡើងថា ក្នុងបរិវេណផ្ទៃអាងទំនប់វារីអគ្គិសនីសេសាន្តក្រោម២ទំហំ៣៦០០០ហិចតាទាំងមូល ស្ទើរតែគ្មានសល់ឈើសម្រាប់កាប់ធ្វើអាជីវកម្មតទៅទៀតទេ ។ ហើយឈើដែលឈ្មួញដឹកជញ្ជូនយ៉ាងគគ្រឹកគគ្រេងនាពេលបច្ចុប្បន្ននេះ គឺជាឈើកាប់ចេញពីព្រៃអភិរក្ស និងព្រៃការពារនៅក្បែរៗនោះដោយមានការឃុបឃិតចូលដៃពីមន្ត្រីជំនាញយ៉ាងអសមត្ថភាពបំផុត រួមមានឃើញតែក្រុមសមត្ថកិច្ចជាច្រើនជំនាញទទួលតែស្រោមសំបុត្រពុករលួយជាច្រើនស្ថាប័ន តាមជាន់ថ្នាក់ មិនខ្វល់ ។ ដែលទង្វើបែបនេះបានក្លាយទៅជាភាពអនាធិបតេយ្យយ៉ាងពេញបន្ទុកកើតចេញពីការអសមត្ថភាពរបស់ក្រុមស្ថាប័នជំនាញ និងក្រុមបង្ក្រាបផ្ទៃប្រទេសនោះតែម្ដង ហើយដែលគេសម្លឹងឃើញថា អនុសាស្ត្ររបស់លោកនាយករដ្ឋមន្ត្រី ហ៊ុន សែន រឿងព្រៃឈើ ដែលកំពងឈឺក្បាលជាមួយជំនាញ និងក្រុមបង្ក្រាបចម្រុះមិនអនុវត្ត៕