អ្នកយកព័ត៌មាន របស់ស្ថានីយទូរស្សន៍ហង្សមាស ត្រូវបានប្រធាន សន្តិសុខឯកជន ប្រចាំមន្ទីរពេទ្យរុស្ស៊ី និងកូនប្រុស ព្រមទាំងកូនចៅ ព្រួតវាយបែកក្បាល និងចាប់ឃុំខ្លួន ជាង១ម៉ោង ពេលចុះទៅ យកព័ត៌មាន នៅមន្ទីរពេទ្យរុស្ស៊ី។
ហេតុការណ៍នេះបានកើតឡើងកាលពីរសៀលថ្ងៃទី២០ ខែកក្កដាឆ្នាំ២០១៤នេះ។
សមត្ថកិច្ចមូលដ្ឋានបានឲ្យដឹងថាស្ត្រីដែលជាជើងខ្លាំងវាងអ្នកយកព័ត៌មានខាងលើនោះមានឈ្មោះ កើត ផល្លី អាយុ ៤០ឆ្នាំ ។
បើតាមសម្តីពីមិត្តភ័ក្តិរបស់ជនរងគ្រោះជាអ្នកយកព័ត៌មានរបស់ហង្សមាស បានឲ្យដឹងថា បុរសដែលរងគ្រោះត្រូវគេវាយបែកក្បាលនោះមានឈ្មោះ ឡេង វ៉ាន់សុធា ជាបុគ្គលិកយកព័ត៌មានផ្នែកសន្តិសុខពេលយប់ ពេលដែលជនរងគ្រោះចុះទៅថតរូបភាព និងយកព័ត៌មានពាក់ព័ន្ធ នឹងស្ត្រីម្នាក់ដែលមានកូនឈឺស្លាប់ ហើយត្រូវការយក រថយន្តមកដឹកសាកសពចេញពីមន្ទីរពេទ្យតែប៉ុណ្ណោះ។ ពេលចុះយកព័ត៌មានខាងលើនេះរូបលោក (ជនរងគ្រោះ) និងអ្នកកាសែតក្នុងស្រុកម្នាក់ទៀត បានចុះទៅយកព័ត៌មាន នៅមន្ទីរពេទ្យរស្ស៊ី ដោយសារតែមានស្ត្រីម្នាក់មិនមានលុយឲ្យពេទ្យ នៅពេលកូនឈឺស្លាប់ត្រូវការដឹកចេញពីមន្ទីរពេទ្យ ។
ពេលអ្នកយកព័ត៌មានរបស់យើងចុះថតយករូបភាព (អ្នកកាសែត និងទូរទស្សន៍) ស្រាប់តែ ស្ត្រីម្នាក់ ជាប្រធានសន្តិសុខឯកជនរបស់ក្រុមហ៊ុនហ្គារូដា បានហាមឃាត់ និងរារាំងមិនឲ្យអ្នកសារព័ត៌មានថតយករូបភាពនោះទេ។ ដោយសារតែការរារាំងមិនឲ្យថតយករូបភាពក៏កើតជាជម្លោះ ស្រាប់តែស្ត្រីជើងខ្លាំងខាងលើ បាននាំកូនប្រុសរបស់ខ្លួន និងកូនចៅផ្សេងទៀតព្រួតគ្នាវាយជនរងគ្រោះ ដោយយកវិទ្យុទាក់ទង វាយក្បាល បណ្តាលឲ្យបែកក្បាលហូរឈាម។
ក្រោយពេលកើតហេតុភាគីបង្កបាននាំខ្លួនជនរងគ្រោះទៅឃុំ នៅក្នុងបន្ទប់របស់ពួកគេ បង្កឲ្យមានការភ្ញាក់ផ្អើល ទើបកម្លាំងសមត្ថកិច្ចជួយអន្តរាគមន៍ ឃាត់ខ្លួនអ្នកបង្កទៅសួរនាំនៅប៉ុស្តិ៍ ។
មន្ត្រីនគរបាលបានឲ្យដឹងថា ខាងភាគីបង្កសុខចិត្ត សងលុយដល់ ជនរងគ្រោះចំនួន ២០០០ដុល្លារដើម្បីបញ្ចប់រឿងតែម្តង ៕
