ភ្នំពេញ ៖ ចាប់តាំងពីលោកគួចចំរើនមកកាន់តំណែងជាអភិបាលខណ្ឌដូនពេញមកបាន សំអាតទីតាំងល្បែងស៊ីសងជាច្រើនកន្លែងកុំអោយមានល្បែងរីកដូច ផ្សីតនៅលើទឹកដីរបស់ លោកនោះ ទីតាំងល្បែងហ្គេមដុះស្លែបីកន្លែងដែលលួចបើកហ្គេមលេង ខុសច្បាប់ ស្ថិតនៅមុខផ្សារសូរិយាម៉ល ក្នុងទឹកដីសង្កាត់ផ្សារថ្មីទី៣ ខណ្ឌដូនពេញ ត្រូវបានកម្លាំងនគរបាល ព្រហ្មទណ្ឌខណ្ឌដូនពេញ សហការជាមួយកម្លាំងនគរ បាលមូលដ្ឋាន ដឹកនាំដោយ ព្រះរាជអាជ្ញារង អមសាលា ដំបូងរាជធានីភ្នំពេញ លោក គង់ សំសារ៉េត កាលពីម៉ោងជាង១០ព្រឹក ថ្ងៃទី២០ ខែកក្កដា ឆ្នាំ២០១៤ ។
លោក ញ៉ែម សៅណុល អធិការរងនគរបាលទទួលផែនព្រហ្មទណ្ឌ ខណ្ឌដូនពេញ បានឲ្យដឹងថា នៅក្នុង ប្រតិបត្តិការនេះ កម្លាំងនគរបាល បានដកហូត ទូហ្គេម ចំនួន ៧០ទូរ និងឃាត់ខ្លួនមនុស្ស ៧នាក់ ក្នុងនោះអ្នក មើលការខុសត្រូវជានារី ៤នាក់ និងអ្នកលេងហ្គេម ៣នាក់ ប្រុស២ ស្រី១ ។
លោក ញ៉ែម សៅណុល បន្តថា ប្រតិបត្តិការ ខាងលើនេះ បានធ្វើឡើង នៅ៣ទីតាំងផ្សេងគ្នា រួមមាន ទីតាំងទី១ ផ្ទះលេខ២៣អឺសូន្យ ទីតាំងទី២ ផ្ទះលេខ២៥អឺសូន្យ និងទីតាំងទី៣ ស្ថិតនៅផ្ទះលេខ៥៤អឺសូន្យ ផ្លូវ ៥១ ភូមិ១០ សង្កាត់ផ្សារថ្មីទី៣ ខណ្ឌដូនពេញ ។
ក្រោយពីមានការឯកភាពពី តុលាការ និងថ្នាក់ដឹកនាំ នគរបាលរាជធានីភ្នំពេញ គណ:បញ្ជាការឯកភាពខណ្ឌ ដូនពេញ ដឹកនាំផ្ទាល់ដោយលោក គួច ចំរើន និងអធិការខណ្ឌ បានបើកប្រតិបត្តិការ ចុះទៅបង្ក្រាបជាក់ស្តែង នៅទីតាំងខាងលើ ដោយដក ហូតទូហ្គេម និងឃាត់ខ្លួន មនុស្សចំនួន៧នាក់ ។
បើតាមលោក ញ៉ែម សៅណុល ទូហ្គេម និងមនុស្សទាំង៧នាក់ ត្រូវបានបញ្ជូនទៅរក្សាទុក និងសួរនាំ នៅអធិការ ដ្ឋាន នគរបាលខណ្ឌដូនពេញ ដើម្បីចាត់ការបន្តតាមនីតិវិធីច្បាប់ ៕
