ភ្នំពេញ: ស្ពានជ្រោយចង្វាថ្មី គ្រោងនឹងបើកឲ្យដំណើរការ នៅខែកញ្ញា ខាងមុខនេះ។ ក៏ប៉ុន្តែសាលារាជធានី បានតម្រូវឲ្យមន្ទីរសាធារណការ និងដឹកជញ្ជូន និងក្រុមហ៊ុនចិន ដែលទទួលម៉ៅសាងសង់ ស្ពានជ្រោយចង្វាទី២ នេះ សិក្សា និងរៀបចំពីប្រព័ន្ធធ្វើចរាចរណ៍ នៅចំណុចរង្វង់មូល គល់ស្ពានទាំងសងខាង ទាំងខាងកើត ទាំងខាងលិច។
លោក ប៉ា សុជាតិវង្ស អភិបាលរាជធានីភ្នំពេញ បានជួបប្រជុំមួយ ជាមួយមន្ត្រីជំនាញរបស់សាលារាជធានី និងមន្ទីរសាធារណការ និងដឹកជញ្ជូនរាជធានី កាលពីព្រឹកថ្ងៃទី១៥ ខែកក្កដាឆ្នាំ២០១៤នេះ នៅសាលារាជធានីភ្នំពេញ ដើម្បីពិភាក្សាលើប្រព័ន្ធធ្វើចរាចរណ៍ នៅចំណុចរង្វង់មូល គល់ស្ពានទាំងសងខាង។
លោកអភិបាលរាជធានី បានលើកឡើងថា បញ្ហាចរាចរណ៍ នៅគល់ស្ពានទាំងសងខាង គឺជារឿងសំខាន់។ ដូច្នេះការកែលម្អប្រព័ន្ធចរាចរណ៍ ជារឿងចាំបាច់ ដែលបញ្ហានេះ ត្រូវបានក្រសួងសាធារណការ និងក្រុមហ៊ុនចិន ដែលទទួលម៉ៅការស្ថាបនា ស្ពានជ្រោយចង្វា ជាអ្នកសិក្សាគម្រោង និងស្ថាបនារង្វង់មូលនេះ។ ចំណែកសាលារាជធានី នឹងសហការកែលម្អសួនច្បារ ដូចជាការរៀបចំការឺឡា ដាំស្មៅ នៅផ្ទៃខាងក្នុងរង្វង់មូលផងដែរ។
លោកអភិបាល បានបញ្ជាក់ថា នៅតំបន់វង្វង់មូលទាំង២ គឺនៅត្រើយខាងលិច និងត្រើយខាងកើតនេះ ដាច់ខាតត្រូវធ្វើយ៉ាងណា រកវិធីសាស្ត្រសម្រួល ដល់ការធ្វើចរាចរណ៍ ឲ្យបានប្រសើរឡើងជាងមុន នៅពេលដាក់ឲ្យដំណើរការ ស្ពានជ្រោយចង្វាថ្មី។ ការងារនេះ ជាជំហានដំបូង ទុកឲ្យខាងក្រុមហ៊ុនចិន សិក្សា និងកែសម្រួល។ ក្រោយពេលស្ថាបនាហើយ ប្រគល់មកឲ្យសាលារាជធានី គឺសាលារាជធានី ត្រូវតែកែសម្រួលបន្ថែមទៀត ដោយធ្វើយ៉ាងណា ឲ្យផ្លូវនៅត្រង់រង្វង់មូលនេះ មាន៤ខ្សែទៅ ៤ខ្សែមក។ ក្រៅពីនេះ តួរង្វង់មូល ក៏ត្រូវតែកែសម្រួល មួយចំនួនផងដែរ។
នៅក្នុងកិច្ចប្រជុំនេះដែរ លោក ប៉ា សុជាតិវង្ស បានលើកឡើងពី គម្រោងជួសជុលកែលម្អ រមណីយដ្ឋានវត្តភ្នំ ផ្នែកខាងក្រោម និងសារមន្ទីរវត្តភ្នំ ដើម្បីត្រៀមលក់ផលិតផល ដែលផលិតឡើងដោយជនពិការ។ គម្រោងដែលត្រូវជួសជុលកែលម្អ មាន១២ចំណុច ដែលផ្តោតសំខាន់ទៅលើ ការរៀបចំរបងព័ទ្ធជុំវិញវត្តភ្នំ, ធ្វើទ្វារ៤កន្លែង។ ជាមួយនឹងការធ្វើរបង ក៏នឹងមានការរៀបចំ បង្កើតចំណតសម្រាប់រថយន្ត ដែលដឹកភ្ញៀវមកទស្សនា ដែលការងារនេះ និងជួយកាត់បន្ថយគ្រោះថ្នាក់ និងការកកស្ទះចរាចរណ៍ បានមួយកំរិតធំ។ ក្នុងនោះមានគម្រោងត្រូវរៀបចំកែលម្អផងដែរ ដូចជាកាត់មែកឈើ, ការងារបោសសម្អាត, ស្តារលាងប្រព័ន្ធប្រឡាយ និងលូជុំវិញវត្តភ្នំ, ដាក់អំពូលភ្លើង ពេលរាត្រីបន្ថែម រួមទាំងការរៀបការឺឡា ឬចាក់បេតុង នៅបរិវេណជុំវិញ រមណីយដ្ឋាននេះផង៕