នៅព្រឹកថ្ងៃទី១១ ខែកក្កដានេះ ព្រះបរមអដ្ឋិ ព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ បានដង្ហែចេញពី ព្រះបរមរាជវាំង ដោយថ្មើរជើង ដោយចាប់ផ្តើម ចេញពីទ្វារជ័យ បត់ឆ្វេងតាមមហាវិថី សម្តេចសុធារស បត់ឆ្វេងតាមវិថីសម្តេចព្រះធម្មលិខិត អ៊ុក បត់ឆ្វេងតាមមហាវិថីព្រះនរោត្តម ព័ទ្ធខាងលិចវិមានឯករាជ្យ បត់ឆ្វេងតាមមហាវិថីសម្តេចព្រះសីហនុ បត់ឆ្វេងតាមមហាវិថី សម្តេចសុធារស និងចូលព្រះឧបោសថរតនារាម តាមទ្វារធំខាងកើត។
នៅក្នុងពិធីដង្ហែ ព្រះបរមអដ្ឋិ គឺមានការចូលរួមពី ថ្នាក់ដឹកនាំជាន់ខ្ពស់ រាជរដ្ឋាភិបាល រួមទាំងមន្ត្រីរាជការ នៅតាមក្រសួង ស្ថាប័នរដ្ឋ សិស្ស និស្សិត ព្រះសង្ឃ និងប្រជាពលរដ្ឋ គ្រប់ស្រទាប់វណ្ណៈ។
តាមកម្មវិធី អំពីពេលវេលា នៃការតម្កល់ព្រះបរមអដ្ឋិៈ
-ពេលវេលានៃការតម្កល់ ព្រះបរមអដ្ឋិ នៅក្នុងព្រះវិហារ ព្រះកែវមរកត មានរយៈពេលមួយថ្ងៃ គឺថ្ងៃសុក្រ ទី១១ ខែកកក្កដា ឆ្នាំ២០១៤។
-ពេលវេលានៃការបញ្ចុះ ក្នុងចេតិយ នឹងប្រព្រឹត្តទៅ នៅថ្ងៃទីសៅរ៍ ទី១២ ខែកក្កដា ឆ្នាំ២០១៤ វេលាម៉ោង៦ព្រឹក តាមកម្មវិធីសាសនា និងតាមការសព្វព្រះរាជហឫទ័យ របស់ព្រះករុណា អម្ចាស់ជីវិតតម្កល់លើត្បូង និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពដ៏ខ្ពង់ខ្ពស់។
-ក្នុងរយៈពេល១ថ្ងៃ នៃការតម្កល់ព្រះបរមអដ្ឋិ ព្រឹក ថ្ងៃ យប់ មានកម្មវិធីសាសនា កម្មវិធីគោរពព្រះវិញ្ញាណក្ខន្ធ កម្មវិធីបាញ់កាំជ្រួច និងមានកម្មវិធីបាញ់កាំភ្លើងធំ នៅពេលដង្ហែ និងបញ្ចុះព្រះបរមអដ្ឋិ។
-បាញ់កាំភ្លើងធំ ១០១ ណាត់ កំណត់ពីរពេល គឺពេលក្បួនចេញដំណើរ ១ពេល និងពេលបញ្ចុះព្រះបរមអដ្ឋិ នៅក្នុងព្រះចេតិយ ១ពេល។
-ការបាញ់កាំជ្រួច មានពីរពេល នៅយប់ថ្ងៃទី១១ និងយប់ថ្ងៃទី១២ ខែកក្កដា ឆ្នាំ២០១៤ ម៉ោង ៧ យប់ តាមកម្មវិធីកំណត់។
ព្រះរាជពិធីដង្ហែ ព្រះបរមអដ្ឋិ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពភាពទឹកដី និងឯកភាពជាតិខ្មែរ ព្រះបរមរតនកោដ្ឋ គឺមានរយៈពេល៣ថ្ងៃ គឺពីចាប់ពីថ្ងៃទី១០ ១១ និងថ្ងៃទី១២ ខែកក្កដា ឆ្នាំ២០១៤។
នៅថ្ងៃទី១០ ខែកក្កដា ឆ្នាំ២០១៤ ធ្វើពិធីគោរពវិញ្ញាណក្ខន្ធព្រះមហាវីរក្សត្រ ព្រះបរមរតនកោដ្ឋ និងមានពិធីបង្សុកូល និងរាប់បាត្រ នៅមុខព្រះបរមរាជវាំង។ នៅថ្ងៃទី១១ ខែកក្កដា ព្រះរាជពិធីដង្ហែនិងតម្កល់ព្រះបរមអដ្ឋិ និងនៅថ្ងៃទី១២ ខែកក្កដា ព្រះរាជពិធីបញ្ចុះព្រះបរមអដ្ឋិ ក្នុងព្រះចេតិយ ៕