ភ្នំពេញ៖ កម្មករផ្នែកប្រមូលសំរាមបោសសំរាម និងអូសរទេះរបស់ក្រុមហ៊ុន ស៊ីនទ្រី មួយចំនួនបានបន្តធ្វើកូដកម្ម នៅមុខយានដ្ឋានក្រុមហ៊ុនក្នុង ខណ្ឌដង្កោ កាលពីម្សិលមិញដើម្បីទាមទារលក្ខខណ្ឌការងារចំនួន ៤ ចំណុចខណៈដែលក្រុមអ្នកបើកបររថយន្តដឹកសំរាមបានចូលធ្វើការវិញ បន្ទាប់ពីក្រុមហ៊ុនយល់ព្រមដកប្រធានយានដ្ឋាន និងសន្តិសុខដែលគំរាមកម្មករ។
លក្ខខណ្ឌការងារទាំង ៤ ចំណុចដែលកម្មករបន្តទាមទារនោះគឺថ្លៃស្នាក់នៅ ១០ ដុល្លារ ថ្លៃធ្វើដំណើរ ១៥ ដុល្លារថ្លៃទ្រទ្រង់សុខភាព ១០ ដុល្លារនិងប្រាក់បំណាច់ឆ្នាំ។
អ្នក បើកបររថយន្តដឹកសំរាម លោក អ៊ឹម អ៊ុន បានឲ្យដឹងថា បន្ទាប់ពីក្រុមហ៊ុន យល់ព្រមដកប្រធានយានដ្ឋាន ឈ្មោះ សា វុត្ថា និងសន្តិសុខ ដែលបានគំរាមបាញ់អ្នកបើកបររថយន្តដឹកសំរាមរួចមក ពួកលោកដែលធ្វើការនៅផ្នែកនេះ បានសម្រេចចូលធ្វើការវិញហើយ ប៉ុន្តែខាងកម្មករផ្នែកប្រមូលសំរាម បោសសំអាត និងអូសរទេះប្រមាណ ៥០ នាក់នៅតែបន្តធ្វើកូដកម្ម។
លោកបញ្ជាក់ថា៖ «ខាងកម្មករប្រមូលសំរាម នៅបន្តធ្វើបាតុកម្ម គឺពួកគាត់ចង់បានលុយធ្វើដំណើរ»។
បើទោះជាកម្មករមួយចំនួន បន្តធ្វើកូដកម្មក៏ដោយ ក៏នៅមានកម្មករប្រមូលសំរាមមួយចំនួននៅបន្តធ្វើការងាររបស់ពួកគេជាធម្មតា។ អ្នកស្រី ស្រេង សឿន កម្មករប្រមូលសំរាមម្នាក់បានឲ្យដឹងថា អ្នកស្រីបានទទួលព័ត៌មានពីការតវ៉ានេះដែរ ប៉ុន្តែដោយសារជីវភាព ទើបអ្នកស្រីបន្តការងារធម្មតាដោយមិនចូលរួមធ្វើកូដកម្មទេ ៕
អ្នកស្រីបញ្ជាក់ថា៖ «ខ្ញុំអន់ចិត្តដែរ ហើយណាមួយ ការតវ៉ាមិនស្រុះគ្នាជីវភាពខ្ញុំក្រីក្រ ហើយឈឺអ៊ីចឹងចេះតែធ្វើការទៅ»។
អ្នកបើកបររថយន្តដឹកសំរាមម្នាក់ដែលកំពុងប្រមូលគំនរសំរាមនៅខាងជើងរបង វត្តកោះ និយាយថា លោកយល់ព្រមធ្វើការវិញ ដោយសារក្រុមហ៊ុន យល់ព្រមដកប្រធានផ្នែកយានដ្ឋានចេញ ប៉ុន្តែកម្មករប្រមូលសំរាមដែលធ្វើការជាមួយលោកពី ៣ ទៅ ៤ នាក់មិនព្រមធ្វើការទេ។
ប្រធានសហព័ន្ធសហជីពលើកតម្កើងជីវភាពកម្មករនិយោជិតខ្មែរលោក មុំ សារ៉ន ថ្លែងថា ខាងក្រុមហ៊ុនគួរតែដោះស្រាយនូវលក្ខខណ្ឌការងារទាំង ៤ ចំណុចដល់កម្មករដើម្បីជួយសម្រួលដល់ជីវភាពរបស់ពួកគាត់ខណៈដែលប្រាក់ខែគោលរបស់ពួកគាត់នៅមានកម្រិតទាប និងប្រឈមខ្លាំងចំពោះសុខភាព។
ប្រធានការិយាល័យសម្អាតក្រុង និងយានដ្ឋានដែលជាតំណាងឲ្យក្រុមហ៊ុន ស៊ីនទ្រី លោក ងួន ស៊ីផេង បានថ្លែងថា កម្មករភាគច្រើនបានចូលធ្វើការវិញហើយ នៅសល់តែកម្មករមួយចំនួនតូចប៉ុណ្ណោះ ដែលមិនព្រមធ្វើការដោយសារមានការបញ្ចុះបញ្ចូលពីខាងសហជីព។
ទាក់ទងនឹងការទាមទាររបស់កម្មករលើលក្ខខណ្ឌការងារទាំង ៤ ចំណុចវិញ លោក ងួន ស៊ីផេង បញ្ជាក់ថា ខាងក្រុមហ៊ុនបានបញ្ចូលប្រាក់អត្ថប្រយោជន៍ទាំងនោះចូលទៅក្នុងប្រាក់បៀវត្សរ៍របស់កម្មកររួចហើយ ហើយសម្រាប់ពេលបច្ចុប្បន្ននេះ ខាងក្រុមហ៊ុនមិនមានលទ្ធភាពផ្តល់ប្រាក់បន្ថែមឲ្យបានទេ ព្រោះខាងក្រុមហ៊ុនទើបតែដំឡើងប្រាក់បៀវត្សរ៍ដល់កម្មករកាលពី ខែកុម្ភៈ កន្លងមក ៕
