ភ្នំពេញ ៖ រហូតដល់ម៉ោង ៩ ព្រឹក ថ្ងៃទី៨កក្កដានេះ ក្រុមប៉ូលិសបង្ក្រាបបាតុកម្ម និងកងសន្តិសុខ បានបើកប្រតិបត្តិការ បណ្តេញជាលើកទី២ លើក្រុមបាតុករ ដែលព្យាយាមប្រមូលផ្តុំតវ៉ា នៅមុខស្ថានទូតវៀតណាម។ ការបង្ក្រាបបាតុកម្មនោះ បង្កឲ្យមានការប៉ះទង្គិច រវាងសមត្ថកិច្ចប៉ូលិស និងកងសន្តិសុខខណ្ឌចំការមន ជាមួយនឹងក្រុមបាតុករ ជាយុវជន ព្រះសង្ឃ ពលរដ្ឋខ្មែរកម្ពជាក្រោម និងសកម្មជនគណបក្សសង្គ្រោះជាតិ។
ជាការកត់សម្គាល់ កាលពីម៉ោងជាង ៧ ព្រឹក ថ្ងៃទី៨កក្កដា អាជ្ញាធរសមត្ថកិច្ច តាមរយៈកងសន្តិសុខខណ្ឌចំការមន បានបណ្តេញបាតុករទាំងនោះ និងបានដេញវាយលើបាតុករ ចេញពីមុខស្ថានទូតវៀតណាម ម្តងរួចមក។
រហូតដល់ម៉ោងជាង ៩ ព្រឹកនេះ កំណាត់ផ្លូវព្រះមុនីវង្ស នៅមុខស្ថានទូតវៀតណាម ត្រូវបានប៉ូលិសដាក់របាំងបិទផ្លូវ។ ប៉ូលិសឈរជើងនៅមុខស្ថានទូតវៀតណាម។ រីឯក្រុមបាតុករ ក៏បន្តប្រមូលផ្តុំ នៅជិតនោះ។ ចំនួនអ្នករបួស មិនត្រូវបានគេបញ្ជាក់ទេ។ តែមិនទាន់មានការចាប់ខ្លួនបាតុករនៅឡើយទេ។
សូមរម្លឹកថា កាលពីម៉ោងជាង ៨ ព្រឹកនេះ ក្រុមបាតុករ ដែលជាយុវជន ព្រះសង្ឃ ខ្មែរកម្ពុជាក្រោម សកម្មជនគណបក្សសង្គ្រោះជាតិ និងលោកម៉មសូណង់ដូ បានទម្លុះរបាំង ចូលលើកបដា ទង់ជាតិ ទង់សាសនា ស្រែកមេក្រូ នៅមុខស្ថានទូតវៀតណាម។ បាតុករ បានឈរមុខស្ថានទូតវៀតណាម បានប្រហែលជិត ១ ម៉ោង មុននឹងត្រូវបណ្តេញជាលើកទី២។
កាលពីព្រឹកព្រលឹមម៉ោងជាង ៧ ព្រឹក ថ្ងៃទី៨កក្កដានេះ មានប៉ះទង្គិចដោយហិង្សា ដោយក្រុមសន្តិសុខខណ្ឌចំការមន រាជធានីភ្នំពេញ បានដេញវាយនឹងដំបងលើក្រុមយុវជន។ ក្រុមយុវជនទាំងនោះ បានព្យាយាមប្រមូលផ្តុំ ធ្វើបាតុកម្មតវ៉ា នៅមុខស្ថានទូតវៀតណាម ប្រចាំកម្ពុជា នៅលើកំណាត់ផ្លូវព្រះមុនីវង្ស ក្នុងរាជធានីភ្នំពេញ។
ក្រុមកងសន្តិសុខខណ្ឌចំការមន បានដេញវាយបណ្តាលឲ្យរបួសលើក្រុមយុវជន និងបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្ទ្រ ដែលមានដើមកំណើតជាខ្មែរកម្ពុជាក្រោម រួមទាំងព្រះសង្ឃជាច្រើនអង្គ ដែលព្យាយាមចូលរួមតវ៉ា។ កងសន្តិសុខ ក៏បានដកហូតយកអាយភេត ម៉ាស៊ីនថត របស់អ្នកកាសែតផងដែរ ក្នុងពេលប៉ះទង្គិចនោះ។
សូមរម្លឹកថា អាជ្ញាធរសាលារាជធានីភ្នំពេញ កាលពីព្រឹកថ្ងៃទី៤ ខែកក្កដា បានសម្រេចនៅក្នុងកិច្ចប្រជុំ ជាមួយតំណាងយុវជន ដោយមិនអនុញ្ញាតឲ្យសហព័ន្ធនិស្សិតបញ្ញវន្តកម្ពុជា ធ្វើបាតុកម្មនៅមុខស្ថានទូតវៀតណាមប្រចាំកម្ពុជាឡើយ។ អាជ្ញាធរបានលើកហេតុផលថា វាអាចប៉ះពាល់ដល់អធិបតេយ្យភាព ឯករាជ្យភាពរបស់ស្ថានទូតវៀតណាម និងសណ្តាប់ធ្នាប់សាធារណៈ កកស្ទះចរាចរ និងអាចប៉ះពាល់ដល់ទំនាក់ទំនងការទូតរវាងកម្ពុជា និងវៀតណាម។
ប៉ុន្តែអាជ្ញាធរសាលារាជធានីភ្នំពេញ បានសម្រេចថា ក្រុមយុវជនទាំងនោះ អាចជួបជុំធ្វើបាតុកម្ម នៅថ្ងៃទី៨ ខែកក្កដា នៅទីស្នាក់ការរបស់ខ្លួន ឬទីតាំងឯកជនណាមួយ។
សហព័ន្ធនិស្សិតបញ្ញវន្តកម្ពុជា ដឹកនាំដោយលោក ម៉ៅ ពិសេស ព្រះសង្ឃ និងសកម្មជនគណបក្សសង្គ្រោះជាតិ រួមទាំងពលរដ្ឋខ្មែរកម្ពុជាក្រោម បានព្យាយាមជួបជុំ ធ្វើបាតុកម្ម រហូតដល់មានការបង្ក្រាប នៅមុខស្ថានទូតវៀតណាម នាព្រឹកថ្ងៃទី៨កក្កដានេះ ដើម្បីទាមទារឲ្យអ្នកនាំពាក្យវៀតណាម សូមទោសចំពោះការលើកឡើងរបស់ខ្លួនថា ទឹកដីកម្ពុជាក្រោម ជារបស់វៀតណាមយូរមកហើយ មិនមែនទើបតែបារាំងកាត់ចេញពីកម្ពុជា ប្រគល់ឲ្យវៀតណាមគ្រប់គ្រង នៅថ្ងៃទី៤មិថុនា ឆ្នាំ១៩៤៩ នោះទេ។
ប៉ុន្តែប្រវត្តិសាស្ត្របានចារ ហើយត្រូវបានគេផ្សព្វផ្សាយយូរឆ្នាំមកហើយថា ទឹកដីខ្មែរកម្ពុជាក្រោម ត្រូវបានអាណានិគមបារាំង កាត់ចេញពីកម្ពុជា ប្រគល់ឲ្យវៀតណាមគ្រប់គ្រង នៅថ្ងៃទី៤ ខែមិថុនា ឆ្នាំ១៩៤៩៕