ភ្នំពេញ ៖ លោកនាយករដ្ឋមន្ត្រី ហ៊ុន សែន បានធ្វើការព្រមានរឹបអូសអាជ្ញាប័ណ្ណពីកាស៊ីណូណាក៏ដោយដែលនៅតែរឹងទទឹងបើកទ្វារឲ្យពលរដ្ឋខ្មែរចូលលេងល្បែងខណៈដែលមានពលរដ្ឋខ្មែរជាច្រើនកំពុងតែវក់នឹងល្បែង។
តាមរយៈ ហ្វេសប៊ុក របស់លោកកាលពីថ្ងៃអាទិត្យលោក ហ៊ុន សែន បានព្រមានរឹបអូសអាជ្ញាប័ណ្ណកាស៊ីណូទាំងអស់ដែលមានទីតាំងនៅក្នុងរាជធានីភ្នំពេញនិងនៅតាមព្រំដែន កម្ពុជា ប្រសិនបើកាស៊ីណូទាំងនោះនៅតែបំពានច្បាប់ឲ្យពលរដ្ឋខ្មែរចូលលេងល្បែងក្នុងកាស៊ីណូរបស់ខ្លួន។
លោក ហ៊ុន សែន បានសរសេរនៅក្នុង ហ្វេសប៊ុក របស់លោកថា៖ «កាស៊ីណូដែលត្រូវបានបង្កើតឡើងក្នុងរាជធានីភ្នំពេញ និងតាមព្រំដែន គឺមិនមែនសម្រាប់ពលរដ្ឋខ្មែរលេងទេ។ ម្ចាស់ក្រុមហ៊ុនត្រូវតែទទួលខុសត្រូវទាំងស្រុងចំពោះការខ្វះខាតការគ្រប់គ្រងពលរដ្ឋខ្មែរដោយសារតែការចង់បានប្រាក់»។
លោកនាយករដ្ឋមន្ត្រី ក៏បានបញ្ជាឲ្យអាជ្ញាធរខេត្តទាំងអស់ចាត់ការ និងបង្ក្រាបទៅលើការលេងល្បែងគ្រប់ប្រភេទរួមទាំងការលេងល្បែងតាមអ៊ីនធឺណិតនិងការចាក់បាល់ កត់កន្ទុយលេខនិងក៏បានព្រមានផងដែរថា មន្ត្រីអាជ្ញាធរណាដែលគាំទ្រក្លិបអ្នកលេងល្បែងត្រូវតែឈប់ជាបន្ទាន់។
ហ្វេសប៊ុក របស់លោក ហ៊ុន សែន បន្តទៀតថា៖ «ការលេងល្បែងនេះធ្វើឲ្យខាតបង់ប្រាក់កាន់តែច្រើនឡើង ហើយបង្កឲ្យមានអំពើលួច ប្លន់ ឆក់និងកាប់សម្លាប់ជាដើម ថ្នាំញៀន បែកបាក់គ្រួសារនិងជាពិសេសបំផ្លាញអនាគតយុវវ័យ ។
លោក យ៉ែម បុញ្ញឫទិ្ធ អ្នកនាំពាក្យរបស់គណបក្សសង្គ្រោះជាតិមិនមានជំនឿទៅលើវិធានការរបស់លោកនាយករដ្ឋមន្ត្រី ទេដោយលោកថ្លែងថា លោក ហ៊ុន សែន បាន
ប្រកាសបង្ក្រាបកាស៊ីណូដែលបើកទ្វារឲ្យពលរដ្ឋខ្មែរលេងតាំងពីយូរណាស់មកហើយ ប៉ុន្តែធាតុពិត មិនដែលឃើញមានការបង្ក្រាបទេរហូតមកដល់ពេលនេះ៕