ភ្នំពេញ ៖ លោកគួច ចំរើន អភិបាលខណ្ឌដូនពេញបានព្រមានចំពោះមន្ត្រីរបស់ខ្លួន និង អាជ្ញាធរសមត្ថកិច្ចមូលដ្ឋាន ត្រូវតែបញ្ចប់ការយកលុយក្រោមតុពីម្ចាស់អាជីវកម្ម ដូចជាក្លឹបកម្សាន្ត ហាងខារ៉ាអូខេ និងម្ចាស់ហាងបៀរហ្កាឌិន និងទីតាំងរកស៊ីផ្សេងៗទៀតនៅក្នុងមូលដ្ឋាន។
អភិបាលខណ្ឌដូនពេញព្រមានបញ្ចប់ការយកលុយ ឬសំណូកតិចតួចក្រោមតុរបស់មន្ត្រី និងសមត្ថកិច្ចមួយចំនួនតូចនេះ បានធ្វើឡើងនៅក្នុងជំនួបសំណេះសំណាល និងធ្វើការណែនាំចំពោះការរកស៊ីរបស់បងប្អូនអាជីវកម្មនូវក្លិបកំសាន្ត និងហាងខារ៉ាអូខេនៅក្នុងទឹកដីខណ្ឌដូនពេញ នារសៀលថ្ងៃទី២៦ ខែមិថុនា ឆ្នាំ២០១៤នេះ ដោយមានអាជីវករមកចូលរួមប្រមាណ៧០នាក់ផងដែរ។
នៅចំពោះមន្ត្រីសាលាខណ្ឌដូនពេញ ការិយាល័យទេសចរណ៍ អាជ្ញាធរសមត្ថកិច្ចមូលដ្ឋាន និងអាជីវករជាម្ចាស់ទីតាំងក្លឹបកម្សាន្ត និងហាងខារ៉ាអូខេផ្សេងៗលោក គួច ចំរើន អភិបាលខណ្ឌដូនពេញបានមានប្រសាសន៍ថា នាពេលកន្លងទៅ មន្ត្រីខ្លះ ទាំងសមត្ថកិច្ចផងនោះ តែងតែទទួលបាននូវសំណូកលុយ ក្រោមតុតិចតួចពីសំណាក់ម្ចាស់ក្លឹបកម្សាន្ត ម្ចាស់ហាងផឹកស៊ី និងលក់ដូរផ្សេងៗ ដើម្បីឲ្យមានការយោគយល់ និងបិទភ្នែកខ្លះចំពោះការរកស៊ីទាំងនោះ ហើយជួយលាក់លៀមនូវរឿងរ៉ាវមិនប្រក្រតីខ្លះ ដែលកើតឡើងនៅតាមទីតាំងរកស៊ីរបស់ពួកគេដូច្នេះត្រូវតែបញ្ឈប់សកម្មភាពបែបនេះ ចាប់ពីពេលឥឡូវតទៅ ហើយបើមន្ត្រីណាម្នាក់ នៅបន្តប្រព្រឹត្តបែបនេះទៀតនឹងទទួលខុសត្រូវ តាមផ្លូវច្បាប់ដោយខ្លួនឯង។
ជុំវិញបញ្ហានេះដែរ លោក គួច ចំរើន បានប្រាប់ទៅប្រធានការិយាល័យទេសចរណ៍ នៅពេលដែលចង់ចុះត្រួតពិនិត្យតាមក្លឹបកម្សាន្ត ឬហាងផឹកស៊ី និងការលក់ដូរផ្សេងៗត្រូវរាយការណ៍ឲ្យលោកដឹងជាមុន ហើយលោកនឹងជូនដំណឹងទៅម្ចាស់ទីតាំងនោះ បានដឹងជាមុនផងដែរ ។
បន្ទាប់ពីធ្វើការណែនាំ ដល់មន្ត្រីរបស់ខ្លួនចំពោះបញ្ហាខាងលើនេះ អភិបាលខណ្ឌដូនពេញ ដែល ទើបទទួលបានការតែងតាំង ក្នុងរយ:ពេលថ្មីៗនេះ ក៏បានណែនាំ និងជំរុញឲ្យ ម្ចាស់អាជីវកម្មទាំងអស់ ដែលរកស៊ីនៅក្នុងមូលដ្ឋានខណ្ឌដូនពេញ ត្រូវគោរពតាមគោលការណ៍របស់អាជ្ញាធររាជធានីភ្នំពេញ ដូចជាការកំណត់ពេលវេលាបើក និងបិទឲ្យបានត្រឹមត្រូវ ចៀសវាងការបើកហួសម៉ោង នាំឲ្យរំខានដល់ប្រជាពលរដ្ឋនៅក្បែរខាងសម្រាប់ការដេកពួន និងទទួលទានផ្សេងៗ។
លោកអភិបាលខណ្ឌ គួច ចំរើន ក៏បានឲ្យអាជីវករទាំងអស់ ជាពិសេសម្ចាស់ទីតាំងក្លឹបកម្សាន្ត រាំច្រៀង បើកនៅពេលថ្ងៃនោះឡើយ ដែលនាំឲ្យសិស្សានុសិស្សខ្លះ មិនទាន់គ្រប់អាយុ គេចវេះពីសាលា ហើយចូលទៅក្នុងក្លឹបរាំច្រៀងសប្បាយជាមួយមិត្តភក្ដិ។
លោក គួច ចំរើន ក៏បានអំពាវនាវឲ្យអាជីវករទាំងអស់ចូលរួមសហការ និងផ្តល់ព័ត៌មានដល់ អាជ្ញាធរ និងសមត្ថកិច្ចមូលដ្ឋានភ្លាមៗ ក្នុងករណីដែលមានបញ្ហាអ្វីមួយកើតឡើងដូចជាបង្ក ទំនាស់ ការលួចប្រើប្រាស់គ្រឿងញៀនជាដើម ដើម្បីចុះទៅជួយអន្តរាគមន៍ទាន់ពេលវេលា ដែលទាំងនេះ គឺជាការចូលរួមទាំងអស់គ្នា ដើម្បីអនុវត្តគោលនយោបាយ ភូមិឃុំសង្កាត់មានសុវត្ថិភាពរបស់រាជរដ្ឋាភិបាល ពោលធ្វើឡើង ដើម្បីសង្គមជាតិទាំងមូល ៕