សៀមរាប ៖ ទាហ៊ាន ២ នាក់ប្រើឈុតសម្លៀកបំពាក់ប៉ារ៉ា បើករថយន្តម៉ាកឌុយមីកពណ៍ត្រេអ៊ី ពាក់ស្លាកលេខ ខេមរភូមិន្ទ 2-1475 និងមានកាំភ្លើងខ្លីមួយដើម រកស៊ីដឹកឈើប្រណិត យកឈ្មោះកងពលលេខ៦ របស់លោកឈុំ-ខេង មកប្រើ ត្រូវបានលោក កើត-វណ្ណារ៉េត ព្រះរាជអាជ្ញាតុលាការខេត្តសៀមរាប បញ្ជាអោយកម្លាំងសមត្ថកិច្ចចុះចាប់បញ្ជូនទៅរដ្ឋបាលព្រៃឈើនៅវេលាម៉ោង១០យប់ ថ្ងៃទី១៩ ខែមិថុនា ឆ្នាំ២០១៤ នៅចំណុច៣១៧មណ្ឌលជនពិការ ឃុំបាឡាំង ស្រុកប្រាសាទបាគង។
យោងតាមសម្តីរបស់លោក សំ-រិទ្ធសុខុន ព្រះរាជអាជ្ញារងតំណាងអយ្យការ សាលាដំបូងខេត្តសៀមរាបបានអោយដឹកថា លោកបានទទួលទូរស័ព្ទពីអ្នកសារព័ត៌មានថា មានរថយន្តភិនភាគខាងលើដឹកឈើខុសច្បាប់ចេញដំណើរពីស្រុកស្វាយលើ សំដៅមកក្រុងសៀមរាប តាមដងផ្លូវគ្រួសក្រហមមណ្ឌលជនពិការ លោកក៏បានសុំយោបល់ពីព្រះរាជអាជ្ញាចុះបង្ក្រាបរថយន្តខាងលើបានជោគជ័យទៅតាមផ្លូវច្បាប់ ដែលមានកម្លាំងសហការពីកងរាជអាវុធហត្ថ និងខាងរដ្ឋបាលព្រៃឈើខេត្ត។
លោក វែង-លី មន្ត្រីរដ្ឋបាលព្រៃឈើប្រចាំស្រុកប្រាសាទបាគងបានអោយដឹងថា រថយន្តខាងលើប្រើរូបភាពបន្លំភ្នែកសមត្ថកិច្ចដោយ ដាក់ឈើប្រណិតប្រភេទនាងនួនជាច្រើនដុំនៅខាងក្នុង ហើយយកឈើនីវសន្លឹកដាក់ព័ទជុំវិញ គ្របកៅស៊ូបាតង់ជិត។ លោកបានបន្តថា ចំណែកនៅក្នុងកាបីន ក្រោយខ្នងតៃកុង ម្ចាស់ឈើបានដាក់ឈើនាងនួនមុខធំៗ ប្រវែង១ម៉ែត្រ រួចយកភួយ ការ៉ុងអង្ករ ខោអាវ គ្របពីលើយ៉ាងស្អាត បើមិនរើមើលគឺច្បាស់ជាមិនដឹងនោះទេ។ លោកវែង-លីបន្ថែមថា វត្ថុតាងទាំងឈើ និងរថយន្តបានបញ្ជូនយកទៅទុកនៅ ផ្នែករដ្ឋបាលព្រៃឈើបន្ទាយស្រីទាំងយប់ ចំណែកឯទាហ៊ាន២នាក់ និងថៅកែស្រីម្នាក់អោយទៅផ្ទះវិញរងចាំការដោះស្រាយតាមផ្លូវច្បាប់។
នៅរសៀលថ្ងៃទី២០ ខែមិថុនានេះ លោក សំ-រិទ្ធសុខុន ព្រះរាជអាជ្ញារងបានបញ្ជាក់បន្ថែមថា តាមផ្លូវច្បាប់បើប្រភេទឈើក្រញូងគឺត្រូវចាប់ទាំងមនុស្សបញ្ជូនមកតុលាការ តែប្រភេទឈើលេខ២គឺ អនុវត្តទៅតាមច្បាប់របស់រដ្ឋបាលព្រៃឈើ ត្រូវអោយម្ចាស់ចូលខ្លួនបង់ពិន័យអន្តរកាលតាមច្បាប់។
លោក ឈុំ-ខេង ប្រធានកងពលលេខ៦ ប្រចាំដីក្រហមស្រុកត្រពាំងប្រាសាទ ខេត្តឧត្តរមានជ័យ បានប្រាប់អ្នកយកព័ត៌មានយើងតាមទូរស័ព្ទនៅព្រឹកថ្ងៃទី២០នេះថា ទាហ៊ាន២នាក់ខាងលើជាទាហ៊ាននៅកងពលលេខ៩ មិនមែនទាហ៊ានកងពលលេខ៦របស់លោកទេ។ លោកឈុំ-ខេង បន្ថែមថា ទាហ៊ានម្នាក់ក្នុងចំណោម២នាក់ឈ្មោះ ចាក មានឋានៈ រងវីរៈកងពលលេខ៩។
តាមកាអង្កេតឃើញថា រយៈពេលប្រហែល៣ខែនេះ មានឈ្មួញរកស៊ីដឹកឈើខុសច្បាប់ដោយប្រើរថយន្តប្រភេទ ឌុយមីក ពណ៍ត្រេអ៊ី ពាក់ស្លាកលេខ ខេមរៈភូមិន្ទ រាប់សិបគ្រឿង ដឹកឈើពីខេត្តព្រះវិហារ ខេត្តឧត្តរមានជ័យ យកមកលក់ចែកចាយក្នុងខេត្តសៀមរាប ឆ្លងកាត់តាមដងផ្លូវស្រុកស្វាយលើស្រុកវ៉ារិននឹងស្រុកបន្ទាយស្រីទាំងយប់ទាំងថ្ងៃ ដោយគ្មានការបង្ក្រាបពីសមត្ថកិច្ចពាក់ព័ន្ទទាល់តែសោះ ។ តែបើនៅស្រុកវ៉ារីនវិញ គីមានមេឈ្មួញជើងខ្លាំងបីនាក់ ទើបតែទិញ ឈ្មោះប៉េអឹមដើម្បីរកស៊ីដឹកឈើប្រណិតខុសច្បាប់ ។ ទីមួយមានឈ្មោះនិតទីពីឈ្មោះ ណាត និងទីបីឈ្មោះគុច ។ មេឈ្មួញជើងខ្លាំងទាំងបីនាក់គីជាកូនចៅរបស់លោកវរសេនីយ៍ត្រី ហេ យែម (ហៅលោកដូប្រធានស្នាក់ការសន្តិសុខប៉េអឹមលេខ ៦៧២ ប្រចាំទិសត្រពាំងក្រសាំងឃុំ ស្រែណូយស្រុកវ៉ារិនខេត្តសៀមរាមហើយក៏ធ្លាប់ជាអ្នករត់ការកាងឈើនឹងរកស៊ីឈើខុសច្បាប់ទៀតផងហើយហូតមកដល់ពេលនេះពួកគេនៅតែដឹកឈើខុសច្បាប់ដដែលដោយប្រើរូភាពឡានព័ណត្រេអ៊ីស្លាក់លេខខេមរភូមិន្ទដើម្បីបន្លាចសមត្ថកិច្ចតាមដងផ្លួវ)។
អ្នកយកព័ត៌មានយើងមិនអាចសុំការបំភ្លឺពីមេកងពលលេខ៩បានទេ ព្រោះទូរស័ព្ទទំនាក់ទំនងមិនបាន ពាក់ព័ន្ទសម្តីបដិសេធរបស់លោក ឈុំ-ខេង មេកងពលលេខ៦ ហើយលោកបានអះអាងថា ទាហ៊ាន២នាក់ខាងលើជាទាហ៊ាន របស់កងពលលេខ៩ មិនមែនជាទាហ៊ានរបស់លោកនោះទេ។
ពលរដ្ឋអ្នកតាមដានហេតុការណ៏សូមសំនូមពរទៅស្ថាប័ណកងទ័ពដែលមានលោក ជា-ម៉ន មេភូមិភាគ៤ លោក នួន-នៅ រងភូមិភាគ៤ មេត្តាបើកនេត្រាមើលក្រុមឈ្មួញទុច្ចរិតយករថយន្តកងទ័ពទៅដឹកឈើខុសច្បាប់យ៉ាងអាណាធិប្បតេយ្យទាំងនេះផង ជាសវៀងខូចឈ្មោះដល់សម្តេចតេជោ ហ៊ុន-សែន ដែលជានាយករដ្ឋមន្ត្រីនៃព្រះរាជាណាចក្រកម្ពុជា មិនតែប៉ុណ្ណោះពលរដ្ឋក៏សូមសំណូមពរទៅលោក អ៊ុក-រ៉ាប៊ុន រដ្ឋមន្ត្រីក្រសូងកសិកម្មមេត្តានែនាំលោក ទា-គឹមសុទ្ធ អោយខំប្រឹងប្រែងធ្វើការបង្ក្រាបបទល្មើសព្រៃឈើផងទាន៕
