សៀមរាប ៖ សកម្មភាពរថយន្តសាន់យ៉ុងដឹកឈើខុសច្បាប់ពីស្រុកស្វាយលើយក មកលក់ចែកចាយតាមដេប៉ូឈើ ក្នុងខេត្តសៀមរាប ជាយូរឆ្នាំណាស់មកហើយដែលពុំធ្លាប់មានការបង្ក្រាបទាល់តែសោះ នោះ ឥឡូវហាក់មានការប្រែប្រួលចម្លែក ខុសពីធម្មតាស្រាប់តែឃើញមេព្រៃចុះចាប់រថយន្តដឹកឈើទាំងនោះទាំង ទឹកមុខ ទើសទាល់ក្រោមការបញ្ជារបស់ព្រះរាជអាជ្ញាឡើងថ្មី។
លោក កើត-វណ្ណារ៉េត ព្រះរាជអាជ្ញាសាលាដំបូងខេត្តសៀមរាប បានបញ្ជាអោយលោក សំរិទ្ធសុខុន ព្រះរាជាអាជ្ញារងតំណាងអយ្យការ សហការជាមួយកម្លាំងរបស់ខណ្ឌរដ្ឋបាលព្រៃឈើខេត្តសៀមរាប ចុះចាប់បានរថយន្តដឹកឈើខុសច្បាប់៣គ្រឿង។
ហេតុការណ៍ចុះបង្ក្រាបនេះបានធ្វើឡើងវេលាមោង៤ទាប់ភើ្លថ្ងែទី១៩ ឆ្នាំ ២០១៤ ថិតនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាម ។ ហើយក៏បានបញ្ជូនវត្ថុតាង(ឈើ) និងមធ្យោបាយដឹកជញ្ជូន(រថយន្ត៣គ្រឿង) យកទៅទុកនៅផ្នែករដ្ឋបាលព្រៃឈើបន្ទាយស្រី ក្នុងភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប។
យោងតាមសម្តីរបស់លោក លឹង្គ-សុខា មន្ត្រីផ្នែករដ្ឋបាលព្រៃឈើក្រុងសៀមរាប បានអោយដឹកថា រថយន្តខាងលើដឹកឈើប្រភេទលេខ២ តាមច្បាប់របស់រដ្ឋបាលព្រៃឈើ ឈើដែលជាវត្ថុតាងគឺត្រូវរឹបអូសទុកជាសម្បត្តិរដ្ឋ ចំណែកឯរថយន្តដែលជាមធ្យោបាយដឹកជញ្ជូនម្ចាសអាចចូលខ្លួនមកដោះ ស្រាយ ដោយបង់ពិន័យអន្តរកាលយករថយន្តទៅវិញតាមផ្លូវច្បាប់។
ប្រភពព័ត៌មានពីប្រជាពលរដ្ឋសុំមិនបញ្ជេញឈ្មោះបានអោយដឹកថា រថយន្តដឹកឈើដែលខាងរដ្ឋបាលព្រៃឈើបានចាប់ខាងលើគឺជារបស់ ចែផល្លី អាយុ ៥០ឆ្នាំ គាត់ដើរប្រមូលទិញឈើនៅស្រុកស្រយ៉ងកោះកែរ្តិ៍ នឹងស្រុកស្វាយលើ ដឹកជារៀងរាល់យប់ចូលក្រុងសៀមរាប ដោយមិនមានច្បាប់បង់ពន្ធជូនរដ្ឋនោះទេ។ ប្រភពបន្តថា ចែផល្លី ដើរអួតក្អេងក្អាងថា គាត់បានបង់លុយអោយមេព្រៃគ្រប់លំដាប់ថ្នាក់តាមដងផ្លូវ ជាពិសេសលោក យ៉ាន់-ស៊ីវ៉ាត នាយសង្កាត់រដ្ឋបាលព្រៃឈើស្រុកស្វាយលើនឹងលោករឹមសមអុននេះតែម្តង ទើបគាត់អាចរកស៊ីបាន ហើយម្យ៉ាងទៀតគាត់ថា គ្មានអ្នកណាហ៊ានចាប់រថយន្តរបស់គាត់ទេ ព្រោះគាត់ក៏មានសាច់ញាតិធ្វើការធំដែរ។ ប្រភពបន្ថែមថា ចែផល្លី ដឹកឈើតាំងពីរថយន្តចាស់មួយគ្រឿង រហូតដល់ថ្ងៃនេះ មានរថយន្ត៣គ្រឿង មានជីវភាពធូធា មានសាច់ឈាមធាត់ឡើងត្រលុកទ្រលុន មានលុយរាប់ម៉ឺនដុល្លារ។
ពាក់ព័ន្ធនិងការចោទប្រកាន់ខាងលើ ចែផល្លី បានប្រាប់អ្នកយកព័ត៌មានយើងតាមទូរស័ព្ទនៅព្រឹកថ្ងៃទី១៩ដដែលនេះថា រថយន្តខាងលើមិនមែនជារថយន្តរបស់គាត់ទេ ព្រោះយប់មិញគាត់មិនបានជិះរថយន្តដឹកឈើនោះទេ។ ចែផល្លី បន្តថា គាត់ពុំបានបង់លុយអោយរដ្ឋបាលព្រៃឈើតាមដងផ្លូវដូចការចោទប្រ កាន់ខាងលើនេះទេ តែបើជួបមេព្រៃ ឬសមត្ថកិច្ចតាមដងផ្លូវគាត់គ្រាន់តែជូនលុយថ្លែ បាយ គុយទាវ កាហ្វេ ឬថ្លៃសាំងអោយមន្ត្រីជំនាញទាំងនោះតែប៉ុណ្ណោះ។
អ្នកយកព័ត៌មានយើងពុំអាចសុំការបំភ្លឺពីលោក យ៉ាន-ស៊ីវ៉ាត នាយសង្កាត់រដ្ឋបាលព្រៃឈើស្រុកស្វាយលើបានទេ ព្រោះទូរស័ព្ទមិនចូល។
មជ្ឈដ្ឋានប្រជាពលរដ្ឋបានរិះគន់ធ្ងន់ៗថា មូលហេតុដែលអ្នករកស៊ីដឹកឈើខុសច្បាប់មិនចេះរាងចាល មិនចេះអស់មិនចេះចប់ ព្រោះតែច្បាប់របស់មេព្រៃនៅធូរលុង ដោយអោយអ្នករកស៊ីដឹកឈើទាំងនោះ អាចបង់លុយផាកពិន័យយករថយន្តដឹកឈើដែលចាប់បានទៅវិញ ដោយគ្រាន់តែផាកពិន័យ ដូច្នេះអ្នករកស៊ីខុសច្បាប់ទាំងនោះច្បាស់ជា ទៅដឹកឈើស្រង់ដើមឡើងវិញជាមិនខាន។ ពលរដ្ឋបន្តរិះគន់ថា បើចាប់ហើយ កុំអោយយករថយន្ត ឬមធ្យោបាយដឹកជញ្ជួនទៅវិញ នោះចាប់តែពីរបីដងអ្នករកស៊ីអស់លុយទិញរថយន្ត ពួកគេនិងឈប់រកស៊ីដោយខ្លូនឯងបាត់ទៅហើយ។ យី!ច្បាប់ស្រុកខ្មែរអន់អីអន់យ៉ាងនេះ ធ្វើការដូចវែកចកក្នុងបឹងអញ្ចឹង៕
