ខេត្តសៀមរាប៖ គេសង្កេតឃើញថា តាំងពីលោកកើតវណ្ណារ៉េត ឡើងកាន់តំណែងជាព្រះរាជអាជ្ញាអមសាលាដំបូងខេត្តសៀមរាបប៉ុន្មានខែកន្លងទៅនេះ បទល្មើសព្រៃឈើហាក់មានការបង្ក្រាបយ៉ាងក្តៅគគុគគួរអោយកត់សម្គាល់។
ជាក់ស្តែងនៅថ្ងៃទី១៧ ខែមិថុនា ឆ្នាំ២០១៤ វេលាម៉ោង៩ព្រឹកនេះ លោក លី-សុផា នាយសង្កាត់រដ្ឋបាលព្រៃឈើស្តីទី ឃុំស្រែណូយ ស្រុកវ៉ារិន ខេត្តសៀមរាប បានដឹកនាំកម្លាំងចុះបង្ក្រាបគោយន្តកែច្នៃដឹកឈើអត់ច្បាប់មួយគ្រឿង ក្រោមបញ្ជារបស់លោក ទា-គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប និងលោក កើត-វណ្ណារ៉េត ព្រះរាជអាជ្ញាសាលាដំបូងខេត្តសៀមរាប នៅចំណុចភូមិព្រៃខ្នុរ ឃុំស្រែណូយ ស្រុកវ៉ារិន។
តាមប្រភពច្បាស់ការពីប្រជាពលរដ្ឋនៅឃុំស្រែណូយបានអោយដឹងថា ម្ចាសគោយន្តដឹកឈើខាងលើមានឈ្មោះ ចិត្រ ភេទប្រុស អាយុប្រហែល ជាង៣០ឆ្នាំ មានអាស័យដ្ឋានភូមិព្រៃខ្នុរខាងលើ។ ពលរដ្ឋបន្តថា លោកចិត្រដឹកឈើពីចំណុចភូមិអូរកូនតឹង ឃុំស្រែណូយ យកទៅលក់ចែកចាយនៅស្រុកវ៉ារិន ស្រុកស្រីស្នំ ស្រុកពួក ខេត្តសៀមរាប។ ពលរដ្ឋបន្តទៀតថា លោកចិត្រដឹកឈើស្ទើជារៀងរាល់ថ្ងៃដោយមិនមានសមត្ថកិច្ចណាគេអើពើនោះទេ ដោយពួកគាត់សង្ស័យថា ប្រហែលជាមានការត្រូវរូវគ្នារវាងអ្នករកស៊ី និងសមត្ថកិច្ចពាក់ព័ន្ទ។
ប្រភពពីអ្នកសារព័ត៌មានជាច្រើននៅឃុំស្រែណូយបានបង្ហើបដែរថា លោកចិត្រ មិនត្រឹមតែរកស៊ីដឹកឈើអត់ច្បាប់នោះទេ ថែមទាំងយករថយន្តពណ៍ត្រេអ៊ី ពាក់ស្លាក់លេខ ខេមរភូមិន្ទ 2-9740 បើកកាង និងរតការឈើតាមដងផ្លូវ ដែលរថយន្តខាងលើជារថយន្តរបស់រដ្ឋ និងជាកម្មសិទ្ធរបស់កងទ័ព។ ពួកគាត់បន្ថែមថា ទង្វើបែបនេះធ្វើអោយមជ្ឈដ្ឋានទូទៅគេរិះគន់ថា យករថយន្តកងទ័ពទៅរតការឈើបែបនេះធ្វើអោយប៉ះពាល់ដល់សេចក្តីថ្លៃថ្លូររបស់អង្គភាពកងទ័ពដែលជាអង្គភាពធ្លាប់តែមានកេរិ៍ឈ្មោះស្អាតស្អំ។
ពលរដ្ឋឃុំស្រែណូយសាទរចំពោះរដ្ឋបាលព្រៃឈើ និងតុលាការ ដែលបានបង្ក្រាបបទល្មើសព្រៃឈើខាងលើនេះ ព្រោះកន្លងមកឈ្មួញដឹកឈើខុសច្បាប់រូបនេះ (លោកចិត្រ) អួតក្អេងក្អាងថាជាខ្សែអភិបាលស្រុកហើយ គ្មានអ្នកណាហ៊ានចាប់ឈើរបស់គេទេនៅទឹកដីខេត្តសៀមរាបនេះ។សូមបញ្ជាក់ថា ឈើនៅលើរថយន្តខាងលើគឺនៅសល់តែពាក់កណ្តាលទេ ឯពាក់កណ្តាលទៀតត្រូវបានលោកចិត្រប្រើកម្មករ អោយទំលាក់ចុះនៅព្រៃក្រោយផ្ទះរបស់គាត់មុនមេព្រៃទៅដល់ ៕
