ខេត្ដកណ្ដាល ៖ ប្រជាពលរដ្ឋជាច្រើនភូមិនៅក្នុងឃុំស្អាងភ្នំ ស្រុកស្អាង ខេត្ដ កណ្ដាល មានការព្រួយបារម្ភយ៉ាងខ្លាំង លើបញ្ហាកង្វះទឹកសម្រាប់បង្កបង្កើនផល របស់ពួកគាត់ ខណៈឃើញឈ្មួញបានដឹក ជញ្ជូនដីយកមកចាក់បឹងនោះ ដែលជា ប្រភពទឹកសម្រាប់ពួកគាត់បង្កបង្កើន ផលជាប្រចាំថ្ងៃនោះ ។ថ្មីនេះក៏មានសារព័ត៌មានក្នុងស្រុកបានផ្សព្វផ្សាយជាសាធារណដែរ។
ប្រជាពលរដ្ឋបានរាយការណ៍មកថា មានរថយន្ដធំៗរបស់ក្រសួងការពារជាតិយ៉ាងតិច៥គ្រឿងបានដឹកដីយកមកចាក់ បឹងអូរត្រុំ ឋិតក្នុងឃុំស្អាងភ្នំ ស្រុកស្អាង ព្រំប្រទល់ទំនប់៩៤ ស្រុកកណ្ដាលស្ទឹង កាលពីរសៀលថ្ងៃទី១២ ខែមិថុនា ឆ្នាំ ២០១៤នេះ ដែលអាជ្ញាធរគ្រប់ជាន់ថ្នាក់ មិនហ៊ានប៉ះពាល់ ដូច្នេះ ប្រជាពលរដ្ឋ បានព្រួយបារម្ភខ្លាចឈ្មួញលុបបឹងនេះ ធ្វើឱ្យពួកគាត់ជួបប្រទះខ្វះខាតទឹកសម្រាប់ បង្កបង្កើនផល ។
បើតាមការបញ្ជាក់ឱ្យដឹងពីមន្ដ្រីមូល ដ្ឋានបង្ហើបថា មេឈ្មួញដ៏ធំដែលកំពុង ប្រើប្រាស់រថយន្ដក្រសួងការពារជាតិដឹក ដីចាក់លុបបឹងអូរត្រុំមានឈ្មោះយាយលន់ ដែលបឹងនេះអតីតជាដែនឡូត៍លេខ១ដែល ប្រជាពលរដ្ឋជាច្រើនភូមិបានទឹកពីកន្លែង នេះសម្រាប់បង្កបង្កើនផល ស្រូវ ដំណាំ ប៉ុន្ដែយាយលន់ដែលគេចាត់ទុកថាជាអ្នក មានអំណាចមួយរូប អាចមានករណី ឃុបឃិតគ្នាជាមួយអាជ្ញាធរ មន្ដ្រីជំនាញ រហូតដល់យករថយន្ដក្រសួងការពារជាតិ ដឹកដីចាក់លុបជាការគំរាមកលើប្រជាពលរដ្ឋផងដែរ ។
អាជ្ញាធរឃុំ ស្រុកបានអះអាងផងដែរ ថា យាយលន់មានច្បាប់អនុញ្ញាតក្នុងការ ចាក់ដីដើម្បីយកគ្រឿងចក្រទៅកាយដី ធ្វើទំនប់ព័ទ្ធជុំវិញដីបឹងចំនួន៨០ហិកតា ប៉ុន្ដែនៅក្នុងលិខិតនោះ គឺមិនអនុញ្ញាត ឱ្យចាក់ប៉ះពាល់ដីអ្នកដទៃ ។
ករណីនេះសារព៍ត័យើងមិនអាចទាក់ទងបាន ទេពីយាយលន់ កាលពីរសៀលថ្ងៃទី១២ ខែមិថុនា ឆ្នាំ២០១៤ ដោយគ្មានលេខ ទូរស័ព្ទ ប៉ុន្ដែអ្នកមើលការនៅទីនោះ និយាយថា យាយលន់មានច្បាប់ក្នុងការ ដឹកជញ្ជូនដីលុបបឹងនេះ ។
តាមច្បាប់ភូមិបាល បឹងបួ ស្ទឹង អូរ ទន្លេ ជាដើម មិនអនុញ្ញាតឱ្យបុគ្គលណា គ្រប់គ្រងជាកម្មសិទ្ធិ ប៉ុន្ដែសកម្មភាព ចាក់ដីលុបបឹងរបស់យាយលន់ អាចពាក់ ព័ន្ធនឹងករណីឃុបឃិតណាមួយជាមួយ មន្ដ្រីអាជ្ញាធរជំនាញ ពិសេសប៉ះពាល់ ទៅនឹងអារម្មណ៍របស់ប្រជាពលរដ្ឋយ៉ាង ខ្លាំង បន្ទាប់ពីយាយលន់ បានប្រើប្រាស់ រថយន្ដក្រសួងការពារជាតិជាទុនបន្លាច ដល់ប្រជាពលរដ្ឋនៅទីនោះកុំឱ្យមានការតវ៉ា ៕
