ខេត្តសៀមរាប ៖ រឿងក្ដីរដ្ឋប្បវេណីលេខ ២៩ចុះថ្ងៃទី២២ខែមករាឆ្នាំ២០១៤របស់សាលាដំបូង ខេត្តសៀមរាប ដែលដឹកនាំដោយកញ្ញា ទីវ គឹមកល្យាណ ព្រះរាជអជ្ញាររងអមសាលាដំបូងខេត្ត សៀមរាប បានចុះអនុវត្តដីការរុះរើសំណង់រោងលក់ឡានដែលមានទំហំ(៨,៥មx១៨,៥ម) ដែលមានទីតាំងភូមិទ្រាំង សង្កាត់ស្លក្រាម ក្រុងសៀមរាប ។
លោក ទីវ សូភ័ណ អាយុ៦១ឆ្នាំ រស់នៅផ្ទះលេខ១១៤ ផ្លូវលេខ១៣៦ សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ ជាដើមបណ្ដឹង បានធ្វើការប្ដឹងលោកតឹក ប៉ុន ជាជនរងគ្រោះ និងជាចុងចោទ ទាមទារឲ្យតុលាការចេញសាលក្រមសម្រេចនិងបង្គាប់អោយចុងចម្លើយរុះរើ ចេញនូវសំណង់នានានិងរាល់ទ្រព្យសម្បត្តិរបស់ខ្លួនចេញពីដីដែលជាកម្មសិទ្ធិរបស់ឈ្មោះ ទីវ សូភ័ណ និងឈ្មោះង៉ោ សុខចេញនិងទាមទារសំណងជំងឺចិត្តព្រមទាំងការខូចខាតចំនួន ៧០០០ដុល្លា នេះបើតាមការឲ្យដឹងពីលោកមេធាវី ឈាង ប៊ុនណា អត្តលេខ ៧៨៦ ជាសមាជិកគណៈមេធាវីនៃព្រះរាជណាចក្រកម្ពុជាមានការិយាល័យ ក្រុមមេធាវីសូឡូមុងគ្រុប ដែលមានអសយដ្ឋានអគារលេខ ៣០៣ សង្កាត់អូឬស្សី៤ ខណ្ឌ៧មករា រាជធានីភ្នំពេញ និង ជាមេធាវីតំណាងដោយអណត្តិអោយលោក ទីវ សូភ័ណ ។
ចំណែកលោក តឹក ប៉ុន ចុង ចម្លើយ បានប្រាប់អ្នកយកពត៌មានយើងថា លោកសព្វថ្ងៃជាជនរងគ្រោះទាំងស្រុង ដោយ លោក បាន ជួលដីតពីឈ្មោះវ៉ាន់ ប៊ុនហ៊ាងដែលលោកអះអាងថាជាម្ចាស់ដី ដោយមាន លោកខៀវ សត ចៅ សង្កាត់ស្លក្រាម ជាសាក្សីអោយភាគីទាំងសងខាងបានព្រមព្រៀងគ្នាជួលដីក្នុងរយៈ ពេល ២ឆ្នាំ និង១០ ខែ ដែលចាប់គិតពីថ្ងៃទី០១ខែឧសភា ឆ្នាំ ២០១៣ រហូតដល់ថ្ងៃទី០១ខែមីនា ឆ្នាំ ២០១៦ បាន ជួលដីនេះក្នុងតម្លៃ៤០០ដុល្លាក្នុង១ខែ និងកក់ប្រាក់មុនចំនួន២ខែ ស្មើនឹង ៨០០ដុល្លា នៃដើមខែដំបូង ហើយ លោកជួលមិនទាន់បានប៉ុន្មានខែផងក៏លេចចេញឈ្មោះ ទីវ សូភ័ណ បានអះអាងថាខ្លួនជាម្ចាស់ពិតប្រាកដ ព្រមទាំងបញ្ជូនមេធាវីរបស់ខ្លួន ឈ្មោះ ឈាង ប៊ុនណា មករារាំងនិងផ្អាកដំនើរការអាជីវកម្មដោយមិនមានជូនដំនឹងឲ្យដឹងមុន ។ ពេលមេធាវីលោក ទីវ សូភ័ណមកដល់ក៏បានបង្ហាញដីការឲ្យរុះរើភ្លាមជាបន្ទាន់ដោយមាន កញ្ញា ទីវ គឹមកល្យាណ ជាព្រះរាជអជ្ញាររងចូលរួមផងដែរ ។
លោក តឹក ប៉ុន បានបន្ដទៀតថា រឿងភ្លាមៗពេកលោកមិនដឹងធ្វើយ៉ាងម៉េច ក៏រុះរើតាមដីការយ៉ាងអយុត្តិធម៌ជាទីបំផុត ហើយ មិនត្រឹមតែប៉ុណ្ណោះខាងមេធាវីរបស់លោកទីវ សូភ័ណបញ្ជាឲ្យសងជំងឺចិត្តចំនួន៧០០០ដុល្លា ទៅឲ្យកូនក្ដីរបស់គាត់ បើមិនមានលុយទេនិងត្រូវរឹបអូសឡានចំនួន២គ្រឿង(ឡាន២គ្រឿង នៅក្នុងសំណង់ដីដែលត្រូវរុះរើនេះជាឡានគេផ្ញើឲ្យលក់)។ មជ្ឍដ្ឋានអ្នកឃើញហេតុការណ៍ បាននិងយាយតៗគ្នាថា ករណីនេះពិតជាសាហាវដូចរឿងហូលីវូតអញ្ចឹង ប្លន់ស្រស់ៗតែម្ដង ។
ពត៌មានចុងក្រោយបានឲ្យដឹងនៅថ្ងៃនេះវេលាម៉ោង ២និង៣០នាទីពីលោកមេធាវី ដើមបណ្ដឹង ឈាង ប៊ុនណា ថា និតិវិធីតុលាការបានផ្អាកសិន មិនដឹងជាមូលហេតុអ្វី ។ ចំនែក កូនក្ដីរបស់លោកក៏មិនដឹងថាយ៉ាងម៉េចដែរ តែបើកូនក្ដីរបស់លោកប្ដឹងបន្ដ នោះលោកនឹងចាត់ ការសំណុំរឿងបន្ដទៀត ។ ចំនែកលោក កើត វណ្ណរ៉េត ព្រះរាជអជ្ញារអមសាលាដំបូងខេត្ត សៀមរាបទើបតែឡើងកាន់តំណែងថ្មី បានឲ្យដឹងថា នេះជានិតិវិធីរបស់តុលាការ ។
អ្នកយកពត៌មានរបស់យើងមិនអាចសុំការបំភ្លឺពីលោក ទីវ សូភ័ណ ជាម្ចាស់ ដើម បណ្ដឹងបានទេ ព្រោះមេធាវីមិនប្រាប់លេខទូរស័ព្ទកូនក្ដីរបស់គាត់ ៕