ខេត្តសៀមរាបៈ ជាថ្មីម្តងទៀត និងបន្ថែមទៅលើសកម្មភាពក៏ដូចជាយន្តការដែល កំពុងមានស្រាប់ក្នុងទិសដៅប្រយុទ្ធប្រឆាំងអំពើពុករលួយដែលជាឧបសគ្គដ៏ធំរាំងស្ទះដល់ការអភិវឌ្ឍន៍ប្រទេសជាតិ ។ រដ្ឋាភិបាលកម្ពុជា សម្តេច ហ៊ុន សែន បានថ្លែង ក្នុងសារលិខិតដ៏កំរមួយដែលខ្លឹមសារ គឺរដ្ឋាភិបាលអណត្តិនេះ ចាត់ទុកការទប់ស្កាត់ និងបង្រាប ឬ គាស់រំលើងអំពើពុករលួយជារឿងអាទិភាពបំផុតដែលត្រូវតែធ្វើដាច់ខាតមានន័យថាៈ រដ្ឋាភិបាលមិន អនុញ្ញតិ្តអោយនរណាម្នាក់ទោះមានបុណ្យសក្តិ ឬ គ្មានក៏ដោយក្នុងការប្រព្រឹត្តអំពើពុករលួយនោះបានទេ។
តែយើងងាកមកមើលសកម្មភាពចិញ្ចឹមជីវិតប្រចាំថ្ងៃ របស់លោក វ័នគាអធិការ ប្រចាំស្រុកស្វាយលើនេះវិញម្តង គឺលោកនាយប៉ូលិសរូបនេះហាក់កំពុងធ្វើផ្គើននឹង បទ បញ្ជានេះខ្លាំងណាស់ ពោលគឺមួយថ្ងៃៗភារកិច្ច ចំបងរបស់គាត់គឺ ដើរប្រមូលលុយយ៉ាងប្រសេចប្រសាច ពីឈ្មួញទុច្ចរិតរកស៊ីឈើខុសច្បាប់ដែលឆ្លងកាត់តំបន់គាត់ ឈរជើង ហើយទង្វើបែបនេះត្រូវបានគាត់អនុវត្តន៍យូរមកហើយ តែគ្មានឃើញថ្នាក់លើ ណាមួយមករំលត់បញ្ហានេះទេ មានតែបង្កើនថែម មិនដឹងថាមកពីមូលហេតុអ្វី?
មានលេចឮពាក្យចេញ ពីប្រភពអ្នករកស៊ីឈើថា លោក វ័នគា គាត់មានឱកាសធ្វើដូច្នេះបានក៏ព្រោះតែគាត់ចេះចែករំលែកទៅគ្រប់ស្ថាប័នពាក់ព័ន្ធពិសេសយល់ការងារ រាក់ជ្រៅជាមួយមេគាត់ ហើយសល់ពីនេះគឺគាត់ ប្រមូលយកទៅធ្វើមានធ្វើបានតែម្តង។ ក្រៅតែពីរឿងប៉ិនប្រសប់ក្នុងការក្តាប់មុខសញ្ញាឈ្នួញ រកស៊ីឈើហើយ លោក វ័ន គា ក៏ពូកែខាងនាំក្បួនឡានយីឌុបដឹកឈើឆ្លងកាត់ស្រុកស្វាយលើខេត្តសៀមរាបបានដោយសុវត្ថិភាពទៀងផង ហើយឈ្នួញមួយណាមិនខ្លាចអំណាច លោកវ័នគានោះ សូម្បីតែចំនួនឈើ និងប្រភេទឈើក៏ឈ្នួញមិនហ៊ានលាក់បាំងពីភ្នែក លោក វ័នគា បានដែរ ។
ប៉ុណ្ណឹងហើយគ្មានឃើញគណៈបញ្ជាការឯកភាពខេត្តសៀមរាប ទើបឡើងថ្មីហ៊ាន កោសខ្យល់អោយ លោក វ័នគា ទេ ឥឡូវមជ្ឈដ្ឋានកំពុងរង់ចាំមើលចំណាត់ការ ពី
អង្គភាពប្រឆាំងអំពើពុករលួយ របស់លោក ទេសរដ្ឋមន្ត្រី ឱម យិរទៀង វិញម្តង ជាមួយលោក វ័នគា ជើងខ្លាំងខាងប្រមូលលុយពីបទល្មើសខុសច្បាប់នឹងរត់ការឈើ ថែមទាំងដឹកឈើខ្លូនឯងផង ប្រចាំស្រុកស្វាយលើខេត្តសៀមរាបនេះបាន ៕
