ទី កំសាន្តព្រែកលៀប គឺជាទីកន្លែងបន្ធូរអារម្មណ៍ របស់បងប្អូនប្រជាពលរដ្ឋទូទៅ ទៅលំហែកាយ ជាពិសេសគឺពួកយុវវ័យ ក៏ចូលចិត្តទៅទីនោះដែរ ប៉ុន្តែគេសង្កេតឃើញ មានព្រះសង្ឃពេញនិយម ទៅកាន់ទីនោះដែរ។ ដោយស្ថិតក្នុងខ្ចូស ព្រះសង្ឃចំនួនបីអង្គ លោកគង់លើអង្រឹង និងរួមមាននារីពីរនាក់ ស្លៀកពាក់អាវស សំពត់ខៀវ អង្គុយ ក្បែរទៀត។
តាមរយៈរូបភាពចំនួនពីរសន្លឹក ក៏មានមតិរិះគន់ជាច្រើន ដោយអ្នកខ្លះ បាននិយាយថា៖ ព្រះសង្ឃគឺជាបុគ្គល ដែលប្រជាពលរដ្ឋគោរព ព្រះសង្ឃជាបុគ្គលមួយរូប ដែល បានបួសរៀននូវ ព្រះធម៌វិន័យជាច្រើន ដើម្បីយកមកទូន្មាន ដល់ជនទាំងឡាយ ឲ្យត្រង់ត្រាប់ស្តាប់នូវពុទ្ធឱវាទ និងវារចាក ក្នុងអំពើទុច្ចរិតផ្សេងៗ។
លោកពូម្នាក់ សូមមិនបញ្ចេញឈ្មោះ បានឲ្យដឹងថា៖ ព្រះធ្វើបែបនេះ គឺខុសតែម្តង ទោះបីជាលោកទៅគង់ បែបធម្មតាក៏ដោយ ព្រោះទីនោះជាទីកំសាន្ត របស់យុវវ័យ ចុះ បើនៅខ្ចូសក្បែរនោះ មានគូរស្នេហ៍ ដែលទៅលេងដែរនោះ តើទៅជាយ៉ាង? បើព្រះសង្ឃ ហេវហត់ អស់កំលាំង ចង់សំរាក គឺព្រះសង្ឃមានកន្លែងរបស់លោក ដូចជាសាលាឆាន់ សាលាឆទាន មិនមែនទៅកន្លែងបែបនេះទេ។
Facebook របស់ឈ្មោះ Vireakboth Khmer បានមានមតិថា តាមការមើលទៅលើរូបនេះ គឺហាក់បីដូចជា គ្មានអ្វីគួរឲ្យខុសទៅនឹងវិន័យអីនោះទេ ព្រោះលោកមិន បានទៅបះកាយ ស្ត្រីឯណា ឬ គ្រាន់តែលោកគង់អញ្ចឹងខុសដែរ? បរិស័ទខ្មែរមួយចំនួន និយាយខុសវិន័យនេះ ខុសវិន័យនោះ តែធាតុពិតមិនដែល ទាំងបានបើកគម្ពីរ
បើកបិដកមើលសោះ ក៏សឹងតែមានដែរ ដូច្នេះហើយទើបចេះតែ ចាំចាប់កុំហុសព្រះសង្ឃយ៉ាងនេះ..សូមរៀនមើលខ្លួនឯងជាមុនសិន មុននឹងចាប់កំហុសអ្នកដទៃ។ អាត្មានិយាយនេះ មិនមែនកាន់ជើងសង្ឃ ដែលប្រព្រឹត្តខុសនោះទេ តែសូមពិចារណាផង មុននឹងធ្វើអ្វីមួយ ព្រោះវាប៉ះពាល់ដល់សង្ឃ និងសាសនាទាំងមូល។
លោកបានបន្តថា៖ ឬក៏គិតថា ឲ្យតែឃើញសង្ឃ និមន្តទៅទីសាធារណៈ សុទ្ធតែខុសវិន័យ ឬក៏ចង់ ឲ្យលោកនៅតែនឹងកុដិ នឹងវត្តមិនឲ្យចេញក្រៅទេ។ ចាត់ទុកអាត្មាជាអ្វី ក៏ចាត់ ទុកទៅ សំខាន់នោះគឺត្រូវដឹងខ្លួនឯងថា តើយើងបានធ្វើអ្វីខ្លះ ហើយដើម្បីសាសនា ឬគ្រាន់តែចាំតិះដៀលសង្ឃ ហៅថាជួយសាសនា។ ព្រះពុទ្ធទ្រង់ត្រាស់សម្ដែង ឲ្យដើរ តាមផ្លូវមជ្ឈិមបដិបទា គឺផ្លូវកណ្តាល មិនតឹងពេក មិនធូរពេក….រឿងអ្វីក៏ដោយ សុទ្ធតែមានហេតុ និងផលរបស់វា ដូច្នោះបើ យើងមិនដឹងហេតុច្បាស់ទេ សូម មេត្តាកុំចេះតែទាញរកផលស្មានៗនោះ។
ចំណែក ក្នុង Facebook របស់ឈ្មោះ Noun Sreymom វិញ បានសរសេរថា៖ នេះជាសិទ្ធលោកទេ វាគ្មានអ្វីខុសទេ កុំអោយតែនៅកន្លែងស្ងាត់ នៅតែពីរអ្នកអង្គានេះ ជាកន្លែងសាធារណៈ គ្មានបុគ្គលណាហាមគេ មិនអោយមកទេ កុំអោយប្រព្រឹត្តខុសនឹងច្បាប់ វិន័យរបស់សង្ឃ។
នេះដោយសារតែសម័យបច្ចេកវិទ្យាទំនើប ទើបអាចធ្វើឲ្យដឹងនូវចំណុចខ្លះ ដែលព្រះសង្ឃបានធ្វើនៅកន្លែង ដែលមិនសមរម្យចំនួនហើយ ដោយសារតែបច្ចេកវិទ្យា នេះហើយ បានធ្វើឲ្យព្រះសង្ឃមួយចំនួនតូច ប្រព្រឹត្តប្រាសចាកពីធម៌វិន័យ ដូចជា ករណីព្រះសង្ឃ នៅវត្តស្រះចកជាដើម។
ការធ្វើបែបនេះ មួយចំនួនតូចនោះ បានធ្វើឲ្យកិត្តនាម របស់ព្រះពុទ្ធសាសនា ដែលជាសាសនារបស់រដ្ឋ ធ្លាក់ចុះ និងធ្វើឲ្យប្រជាពលរដ្ឋ ខ្លះបាត់បង់ជំនឿ លើព្រះសង្ឃ ៕