សៀមរាប ៖ ប្រជាពលរដ្ឋក្រីក្រជាច្រើន គ្រួសារត្រូវបានមេទាហានដែលមានអំណាចធំមួយប្រចាំស្រុកបន្ទាយស្រី បានយកគ្រឿងចក្រ មកឈូសឆាយលើចំការដំណាំពួកគាត់ ដែលបានអាស្រ័យជាង១០ឆ្នាំ កន្លងមកហើយ កាលពីដើមឡើយពួកគាត់ប្រកបមុខរបរធ្វើស្រែចំការបង្កបង្កើនផល អាស្រ័យចិញ្ចឹមជីវិត យ៉ាងស្រុកស្រួលបំផុត មិនដែលមានអ្នកណាមករករឿង ឬ អុកឡុកម្តងណាឡើយ ទើបតែពេលនេះបានលេចមុខមេទាហាន ជើងខ្លាំង ម្នាក់ឈ្មោះថា ចាន់ សារឿន ជាមេទាហានប្រចាំនៅកងពលតូចអន្តរាគមន៍លេខ៤ ស្រុកបន្ទាយស្រី មករំលោភយកដីស្រែចំការ របស់ពួកគាត់ព្រមទាំងយកកាំភ្លើងAKស្វាយបទជាច្រើន ដើម មកគំរាមពួកគាត់ អោយចេញពីដីស្រែចំការដែលពួកគាត់កំពុងតែបង្កបង្កើនផល ។ ករណីទំនាស់ដីធ្លីនេះ បានកើតឡើងនៅ ភូមិពាក់ស្នែង ឃុំពាក់ស្នែង ស្រុកអង្គរធំ ខេត្តសៀមរាប ។
លោក ស៊ត សេង តំណាងអោយប្រជាពលរដ្ឋជាង ១០០ គ្រួសារបានប្រាប់អ្នកយកពត៌មានយើងថាៈ លោក ចាន់ សារឿន ជាមេទាហានប្រចាំទិស នៅកងពលតូចអន្តរាគមន៍លេខ៤ បានមកវាតយកដីស្រែ ចំការ របស់គាត់ជា ច្រើនហិកតា ដោយបញ្ហាអោយកូនទាហានបំពាក់ដោយអាវុធគ្រប់ដៃបានដេញពួកគាត់ ឱ្យចេញពីដីដែលគាត់ កំពុងអាស្រ័យផល បើមិនចេញទេ ប្រយ័ត្នបាញ់ស្លាប់ ។ បើសិនពួកគាត់ មិនចេញ និងអាចមានអ្នកស្លាប់ ដូច្នេះហើយ ពួកគាត់ត្រូវបង្ខំចិត្តចាក ចេញទាំងទឹកភ្នែកដោយអយុត្តិធម៌ជាទីបំផុត ។
លោក ស៊ត សេង បន្តទៀតថាគាត់ខ្លាចកាំភ្លើងណាស់ ព្រោះកាលពីឆ្នាំ 1999 បងប្រុសរបស់គាត់ត្រូវជនមិនស្គាល់មុខ បានបាញ់សំលាប់យ៉ាងអនោចអធម ជាទីបំផុតខណៈដែលបងរបស់គាត់កំពុងដាំ ស្រូវចិញ្ចឹមជីវិត ហើយរហូតមកដល់ ពេលនេះពុំទាន់រកឃាតករឃើញនៅឡើយទេ ។
លោក នែម ខ្លូត មេភូមិ ពាក់ស្នែង បានអោយដឹងថា ដីស្រែចំការដែលប្រជាពលរដ្ឋបានដាំដុះពិតជា របស់ពួកគាត់មែន ។ ចំណែកលោក សុខ ស៊ា ជំទប់ទី១ ឃុំពាក់ស្នែង ក៏និយាយប្រដៀងគ្នានេះដែរថា ដីដែលប្រជាពលរដ្ឋអាស្រ័យផល នោះ គឺមានតាំងពីយូរណាស់មកហើយ។លោកជំទប់១ឃុំពាក់ស្នែង បានបន្តទៀតថា ប្រជាក្រីក្រទាំងនេះ ពួកគាត់រស់ដោយសារតែស្រែចំការ បើទាហាននាំគ្នារំលោភយកទៀតប្រជាពលរដ្ឋពិតជាវេទនាមិនខាន ។
ប្រជាពលរដ្ឋទាំង 100គ្រួសារ សំណូមពរទាំងទ្រហូរយំ អោយសម្តេចតេជោ ហ៊ុន សែន និងលោកជំទាវ ជួយអន្តរាគមន៍ដល់ពួកគាត់ផង បើមិនដូច្នេះទេ ពួកគាត់ត្រូវស្លាប់ដាច់ពោះដោយសារ ស្នាដៃមេទាហាន ឈ្មោះ ចាន់ សារឿន នេះហើយ ។ អ្នកយកព័ត៌មានយើងពុំ អាចសុំការបំភ្លើពីលោក ចាន់ សារឿន បានទេ ព្រោះ ទូរស័ព្ទចូល 4-5ដង ហើយគ្មានអ្នកទទួល ៕
ដោយ ច័ន្ទ សុភាព