សៀមរាបៈ ប្រជាពលរដ្ឋទូទាំងខេត្តសៀមរាបបានដាក់ការស្តីបន្ទោសយ៉ាងធ្ងន់ធ្ងរទៅលើ អាជ្ញាធរមានសមត្ថកិច្ច ពាក់ព័ន្ធគ្រប់ជាន់ថ្នាក់ និងមន្ត្រីជំនាញរដ្ឋបាលព្រៃឈើថា ធូររលុងក្នុងការបង្ក្រាបបទល្មើសសត្វព្រៃដែលបណ្តែតបណ្តោយអោយឈ្មួញធ្វើចរាចរសត្វព្រៃ ពេញខេត្តដោយមិនគិតអំពីផលប្រយោជន៍ធនធានធម្មជាតិ ជាពិសេសសត្វព្រៃ នេះតែម្តង ជាក់ស្តែងភោជនីយដ្ឋានមួយកន្លែងដែលមានដាក់ស្លាកយីហោថា ភោជនីយដ្ឋានស្រីមុំ២ គឺជាទីកន្លែងលក់ ម្ហូបសត្វព្រៃគ្រប់ប្រភេទ ថែមទាំងមានលក់ដុំ និងរាយទៅតាមតម្រូវការបុគ្គល មួយចំនួនដែលចូលចិត្តសាច់សត្វព្រៃ ក៏ដូចជាការលើកទឹកចិត្តដល់ម្ចាស់ហាងស្រីមុំ២នេះផង ដែរ ។
ហាងនេះមានទីតាំងនៅតាមបណ្តោយផ្លូវ៦០មក្នុងតំបន់កំសាន្ត ឃ្យុង យូ ខាងជើង សាលាខេត្តចំងាយ២០០ម ឋិតនៅក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ។
ប្រភពពីហាងស្រីមុំ២ បានអោយដឹងថាៈ ភោជនីយដ្ឋានស្រីមុំ២ បានបើកជាយូរឆ្នាំមកហើយ មិន ដែលមានក្រុមសមត្ថកិច្ចពាក់ព័ន្ធ និងមន្ត្រីជំនាញរដ្ឋបាលព្រៃឈើមួយណាហ៊ានអើតក្បាល មកអុកឡុក ឬរំខានដល់ហាងនេះម្តងណាឡើយ មានតែនាំលាភសក្ការៈសំបូរសប្បាយដល់ ម្ចាស់ហាងរីកមុខរីកមាត់រីកថ្លើមទៀតផង ។ ហើយមានកំលាំងចិត្តក្នុងការស្វែងរក សត្វព្រៃប្លែកៗដ៏កម្រ ដើម្បីយកមកធ្វើម្ហូបឆ្ងាញ់ៗជូនភ្ញៀវ ជាពិសេសបានល្បីហាងផង ។ នេះជាជ័យលាភី ដ៏ជោគជ័យធំមួយក្នុង ការដំណើរការបើកហាងដំបូងក្នុងខេត្តសៀមរាបហើយជាការប្រពៃណាស់ដែលភោជនីយដ្ឋានស្រីមុំ២ មានម្ហូបសត្វព្រៃឈានមុខគេទូទាំង ខេត្ត ក៏ដូចជាលើកទឹកចិត្ត និងជំរុញអោយសត្វព្រៃគ្រប់ប្រភេទរលាយហិនហោច ដាច់ពូជនៅ ប្រទេសកម្ពុជា។
ប្រភពដដែលបន្តទៀតថា ម្ចាស់ភោជនីយដ្ឋានស្រីមុំ២ គឺជាមន្ត្រីជាន់ខ្ពស់មួយរូបរបស់ កងរាជអាវុធហត្ថខេត្ត ដូច្នេះសមត្ថកិច្ចពាក់ព័ន្ធល្មមៗវេទនាក្នុងការចុះបង្ក្រាប គឺមាន តែប្តូរមកលេងកំសាន្ត ឬពិសារភោជនីហារវិញទេ ទើបស្រួលចិត្ត ព្រោះប្រឆាំងវា ទើសទាល់ ទុកមុខរាប់គ្នាថ្ងៃក្រោយល្អជាង ។
ចំណែកលោកពូ សាលៀប មានអាយុ ៤៨ ឆ្នាំ ជាអ្នករត់ម៉ូតូឌុប នៅមុខភោជនីយដ្ឋាន ស្រីមុំ២ បាននិយាយស្រដៀងគ្នានេះដែរថា ជារៀងរាល់ព្រឹកគាត់ឃើញមានឡានសាមយុង នីសាន់ និងម៉ូតូដឹកសត្វព្រៃដែលឈ្មួញបានដាក់ក្នុងការ៉ុងជិះចូលក្នុងហាង ។
លោកពូដដែលបន្តថា ហាងនេះសំបូរសត្វព្រៃលក់ណាស់ ហើយគ្មានអ្នកណាហ៊ានប៉ះពាល់ទេ ព្រោះជាហាង ប៉េអឹម ហើយគាត់ឧស្សាហ៍ឃើញឡានទំនើបៗជាច្រើនគ្រឿងជិះចេញចូល ឥតឈប់ឈរ។ ទោះបីជាប្រមុខរាជរដ្ឋាភិ បាលសម្តេចតេជោហ៊ុន សែន បានប្រកាសតាមកាសែត វិទ្យុ ទូរទស្សន៍ថាសូមអោយកងកំលាំងប្រដាប់អាវុធទាំងអស់ ដកខ្លួនចេញពីអំពើល្មើស ច្បាប់ ហើយងាកមកបង្ក្រាប និងជួយការពារធនធានធម្មជាតិ ដូចជា ព្រៃឈើ សត្វព្រៃ ជាដើម ។ល។ អោយមានប្រសិទ្ធភាពខ្ពស់បំផុត ។ បើទោះបីជាប្រមុខថ្នាក់ដឹកនាំខំប្រឹងប្រកាស បែកពពុះមាត់យ៉ាងណាក្តី ក៏ម្ចាស់ហាងស្រីមុំ២ នៅតែផ្គើន និងមិនចាប់អារម្មណ៍ឡើយអោយតែ បានលុយដាក់ហោប៉ៅ ស៊ីឆ្ងាញ់ ដេកស្រួល គឺវា សុខណាស់ទៅហើយ។
ប្រជាពលរដ្ឋបានដាក់សំណួរថាៈ តើអស់លោកស្ថាប័នណាខ្លះមានឆន្ទៈក្នុងការបង្ក្រាប ជំនួញជួញដូរសត្វព្រៃក្នុងភោជ នីយដ្ឋានស្រីមុំ២បាន? អ្នកយកព័ត៌មានយើងពុំអាចស្វែងរក សុំការពន្យល់ពីម្ចាស់ហាងបានទេជុំវិញការចោទប្រកាន់ ខាងលើនេះ ព្រោះទូរស័ព្ទនៅក្រៅ តំបន់សេវា ៕