សៀមរាប ៖ ប្រជាពលរដ្ឋក្រីក្រប្រមាណជាង៤០នាក់ នៅខេត្ដសៀមរាប បារម្ភដាច់បាយ និងរឹបអូសយកទ្រព្យសម្បត្ដិពីធនាគារ ដោយពួកគាត់អះអាងថា អាជ្ញាធរអប្សរាផ្ដាច់មុខរបរពួកគាត់ មិនឲ្យក្រាលកន្ទេលលក់ឲ្យភ្ញៀវទេសចរអង្គុយលេ នៅខាងមុខ ប្រាសាទអង្គរវត្ដ។
នៅព្រឹកថ្ងៃពុធនេះ ពួកគេបានប្រមូលផ្ដុំគ្នានៅខាងមុខប្រាសាទអង្គរវត្ដ ដោយស្នើឲ្យលោកនាយករដ្ឋមន្ដ្រី ហ៊ុន សែន និងអាជ្ញាធរ អប្សរា ផ្ដល់ទីធ្លាជាប់កស្សិណខាងមុខអង្គរវត្ដ ដើម្បីដាក់កន្ទេលលក់ឲ្យភ្ញៀវអង្គុយលេងកំសាន្ដ និងទទួលទានអាហារ ដូចមុន ដើម្បីជួយសម្រួលជីវភាពគ្រួសារ ។
ពលរដ្ឋនៅភូមិត្រពាំងសេះ សង្កាត់គោកចក ក្រុងសៀមរាប អ្នកស្រី តូច សំណាង ប្រាប់អ្នកសារព័ត៌មានថា សមត្ថកិច្ចប៉ូលិសបេតិកភ័ណ្ឌ បានមកហាមឃាត់ពួកគាត់ មិនឲ្យយកម្ហូប និងក្រាលកន្ទេលឲ្យភ្ញៀវអង្គុយលេងជាប់នឹងកស្សិណអង្គរ ក្រោមហេតុផល ប៉ះពាល់ដល់ស្មៅ និងបរិស្ថាន ខណៈដែលអ្នកស្រីប្រកបមុខរបរនេះ ជាង១០ឆ្នាំមកហើយ ។
អ្នកស្រីថា សមត្ថកិច្ចទាំងស្ថាប័ននោះ បានគំរាមដកហូតកន្ទេល និងចាប់ខ្លួន ព្រមទាំងជេប្រមាថមើលងាយ ពីក្រុមអ្នកប្រមូល សំរាមផងដែរ។
ជាមួយគ្នានោះដែរ ស្រី្ដពិការជើងឆ្វេង អ្នកស្រី នឿម គឹមណែត ឲ្យដឹងថា ក្នុងមួយថ្ងៃអ្នកស្រីរកបានត្រឹម១ម៉ឺន ទៅ២ម៉ឺនប៉ុណ្ណោះ ប៉ុន្ដែបើអាជ្ញាធរអប្សរាហាមគាត់ ពួកគាត់ប្រឈមនឹងដាច់បាយ និងរឹបអូសទ្រព្យសម្បត្ដិពីធនាគារ។ ។ អ្នកស្រីថា ពួកគាត់ដាក់កន្ទេលនេះមិនបានបង្កឲ្យមានកាកសំណល់នៅទីនោះឡើយ។
ករណីនេះ អគ្គនាយកអាជ្ញាធរអប្សរា លោក ប៊ុន ណារិទ្ធិ មានប្រសាសន៍ថា ការក្រាលកន្ទេលនៅជាប់កស្សិណអង្គរនេះ បានប៉ះពាល់ដល់សោភ័ណ្ឌភាព ធ្វើឲ្យបរិស្ថានមិនល្អ និងខូចស្មៅដែលអាជ្ញាធរបានថែរក្សា ។ លោកថា ប្រជាពលរដ្ឋអាចបង្កើតមុខរបរផ្សេងទៀត ក្រៅពីតំបន់នោះ។
តំបន់ប្រាសាទអង្គវត្ដ ត្រូវបានចុះបញ្ជីជាសម្បត្ដិបេតិកភ័ណ្ឌពិភពលោកនៅឆ្នាំ១៩៩៣ ដោយអង្គការយូណេស្កូ។ ក្រុមប្រជាពលរដ្ឋ ឲ្យដឹងថា ពួកគេប្រកបមុខរបរក្រាលកន្លេលឲ្យភ្ញៀវទេសចរអង្គុយកំសាន្ដនេះ នៅឆ្នាំ១៩៩៨ ដោយមិនប៉ះពាល់ដល់បរិស្ថាន នឹងសោភ័ណ្ឌភាពប្រាងសាទនេះឡើយហើយបច្ចុប្បន្នមិនពេញនិយមទេ ដោយសារ មានកន្លែងកំសាន្ដ នៅអតីតអង្គរឃ្យុងយូ ៕
ដោយ ៖ វរជន
