កណ្តាល ៖ ពលរដ្ឋនៅក្នុងភូមិចំនួន ៣ គឺភូមិលេខ ១ ភូមិលេខ ២ និងភូមិលេខ ៣ ស្ថិតក្នុងឃុំប្រាសាទ ស្រុកស្អាង បាននាំគ្នាផ្តិតមេដៃប្តឹង ទៅអាជ្ញាធរដកចៅអធិការវត្ត, លោកតាអាចារ្យចេញពីវត្តប្រាសាទ និងលោកនាយប៉ុស្តិ៍ នគរបាលរដ្ឋបាលឃុំប្រាសាទផងដែរ ដោយចោទប្រកាន់ថា ព្រះចៅអធិការវត្ត, តាអាចារ្យ និងលោកនាយប៉ុស្តិ៍ បានឃុបឃិតបើកដៃ ឲ្យមានករណីលួចជីកដី ដែលគេអះអាងថា មានកំណប់នៅក្រោមកាំជណ្តើរ សាលាឆាន់វត្តប្រាសាទ កាលពីយប់ថ្ងៃទី១ ខែឧសភាកន្លងទៅនោះ។ប៉ុន្តែព្រះចៅអធិការវត្ត,លោកតាអាចារ្យ បានបដិសេធ ចំពោះការចោទប្រកាន់នេះតែ ទទួលស្គាល់អំពីការជីកនេះ គឺដើម្បីរកវត្ថុនោះមករក្សាទុកតែប៉ុណ្ណោះ។
គួរបញ្ជាក់ថា ព្រះចៅអធិការវត្តព្រះនាម ពក ហេង។ចំណែកតាអាចារ្យវត្តឈ្មោះប៊ូជួបនិងនាយប៉ុស្តិ៍ឈ្មោះមិត្តពូន។
រឿងរ៉ាវនេះ គឺកាលពីម៉ោងប្រហែល៨យប់ថ្ងៃទី១ខែឧសភារហូតដល់ម៉ោងប្រមាណជាង១រំលងអធ្រាត្រឈានចូលថ្ងៃទី២ខែឧសភាមានបុរស២នាក់បានធ្វើសកម្មភាពជីកដីនៅក្រោមកាំជណ្តើរសាលាឆាន់វត្តប្រាសាទដែលគេអះអាងថាមានកំណប់មានតម្លៃនៅក្រោមដីនោះហើយត្រូវបានសមត្ថកិច្ចកងរាជអាវុធហត្ថស្រុកស្អាងចាប់ឃាត់ខ្លួន។នៅពេលចា ប់ខ្លួនខណៈដែលបុរស២នាក់កំពុងធ្វើសកម្មភាពជីកដីនោះលោកមេប៉ុស្តិ៍និងតាអាចារ្យវត្តក៏នៅទីនោះដែរ។
ប្រភពព័ត៌មានពីប្រជាពលរដ្ឋបានឲ្យដឹងថាមូលហេតុតដែលពួកគាត់នាំគ្នាផ្តិតមេដៃសុំឲ្យអាជ្ញាធរដកចៅអធិការវត្ត,លោកតាអាចារ្យវត្តនិងលោកនាយប៉ុស្តិ៍នោដោយសារពួកគាត់ដឹងថាចៅអធិការវត្ត,លោកតាអាចារ្យនិងនាយប៉ុស្តិ៍បានឃុបឃិតនាំឲ្យមានករណីលួចជីកដីរកកំណប់ក្រោមកាំជណ្តើរវត្តប្រាសាទនេះ។
ប្រភពដដែលបន្តថា មុនថ្ងៃកើតហេតុលួចជីកដីរកកំណប់នេះពួកគាត់ឃើញព្រះចៅអធិការវត្ត, តាអាចារ្យ និងលោកនាយប៉ុស្តិ៍បានប្រជុំគ្នាតែមិនដឹងថា និយាយពីរឿងអ្វីខ្លះនោះទេ ។ ប៉ុន្តែបានប៉ុន្មានថ្ងៃក្រោយមក ស្រាប់តែមានករណី លួចជីកដីរកកំណប់នេះ បានកើតឡើងហើយពេលដែលបុរស ២ នាក់កំពុងធ្វើសកម្មភាពជីករកកំណប់ លោកតាអាចារ្យវត្តនិងនាយប៉ុស្តិ៍ក៏នៅទីនោះដែរ ។
ពាក់ព័ន្ធនឹងបញ្ហានេះ លោក ឈាង លី មេឃុំប្រាសាទបានប្រាប់ថា ករណីប្រជាពលរដ្ឋនាំគ្នាផ្តិតមេដៃស្នើសុំឲ្យអាជ្ញាធរដកព្រះចៅអធិការវត្ត, លោកតាអាចារ្យនិងលោកនាយប៉ុស្តិ៍នោះ លោកបានដឹងខ្លះៗដែរ ប៉ុន្តែរហូតមកដល់ថ្ងៃទី១២ ខែឧសភានេះ គឺមិនទាន់ឃើញពាក្យបណ្តឹង ឬស្នាមមេដៃប្រជាពលរដ្ឋណាម្នាក់បានដាក់ចូលមកដល់ ដៃអាជ្ញាធរនៅឡើយទេ។
ព្រះតេជគុណ ពក ហេង មានសង្ឃដីការ កាលដែលលោកតាអាចារ្យ ប៊ូ ជួបមកសុំព្រះតេជគុណនោះ ព្រះតេជគុណបានប្រាប់ឲ្យរកកម្លាំង ដើម្បីជួយជីកផង និងធ្វើជាសាក្សីដឹងឮផង ។ ប៉ុន្តែនៅថ្ងៃកើតហេតុ ព្រះតេជគុណបានតើន ពីសឹងមក ស្រាប់តែឃើញ មានហេតុការណ៍នេះ កើតឡើងតែម្តង ។
លោកតាអាចារ្យវត្ត ប៊ូ ជួបបាននិយាយថា មូលហេតុ ដែលលោកតា បានប្រាប់ឲ្យគេជីកដីនៅក្រោម កាំជណ្តើរដូច្នេះ គឺលោកតាចង់រកព្រះជាង ៤០ អង្គ និងថាសស្ពាន់ចំនួន ២ ដែលលោកតា បានកប់តាំងពីជំនាន់បារាំងមកម្ល៉េះ ។ កាលណោះ លោកតាមានអាយុ ២១ ឆ្នាំ ជាភិក្ខុសង្ឃមួយអង្គ ក្នុងចំណោមព្រះសង្ឃ ៤ អង្គ ដែលគង់នៅក្នុងវត្តប្រាសាទនេះ ។
ចំណែកលោក មិត្ត ពូន នាយប៉ុស្តិ៍នគរបាល រដ្ឋបាល ឃុំប្រាសាទ មិនអាចទំនាក់ទំនងសុំការពន្យល់បានទេ ។
បើយោងតាម ប្រភពព័ត៌មាន ពីប្រជាពលរដ្ឋបានឲ្យដឹងថា លោក មិត្ត ពូន បានចាកចេញពីប៉ុស្តិ៍ ដោយនាំយកត្រា ទៅជាមួយទៀត រហូតមកដល់ពេលនេះ លោកនៅតែមិនទាន់បង្ហាញ វត្តមាន នៅក្នុងប៉ុស្តិ៍នៅឡើយ ។ ការមិនបង្ហាញវត្តមាននេះ បានធ្វើឲ្យប្រជាពលរដ្ឋមួយចំនួន ដែលពួកគាត់ត្រូវសុំស៊ីញ៉េបោះត្រា លើលិខិតស្នាមពាក់ព័ន្ធនិងការងារផ្សេងៗនោះ គឺមានការលំបាក និងមានការរិះគន់យ៉ាងខ្លាំង ទៅលើមេប៉ុស្តិ៍រូបនេះ ។
ទាក់ទិននឹងករណីអត់ មានត្រា ដើម្បីធ្វើការបំរើ ប្រជាពលរដ្ឋនេះ លោក សេង សុជាតិ អធិការស្រុកស្អាង បានប្រាប់ឲ្យដឹងថា ករណីនេះ លោកកំពុងចាត់ឲ្យមន្ត្រីទៅធ្វើការ ៕
