សៀមរាប ៖ សមត្ថកិច្ចចម្រុះ ដែលដឹកនាំដោយលោកស្រីព្រះរាជអាជ្ញារង កញ្ញា ទីវ គឹម កល្យាណ ,កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការខេត្តសៀមរាប, សាខាគយ និងរដ្ឋាករ ខេត្តសៀមរាបបានចុះឆែកឆេររកឃើញទំនិញដែលពុំមានក្រដាសពន្ធ (ឯកសារដើម) ហើយ បាន ដកហូតដើម្បីឲ្យម្ចាស់យកក្រដាសពន្ធដើមមកបង្ហាញសមត្ថកិច្ចជា ក្រោយ និងមានអីវ៉ាន់មួយចំនួនទៀតត្រូវបានរកឃើញថា ពុំមានបង់ពន្ធត្រឹមត្រូវតាមផ្លូវច្បាប់នោះទេ។
ប្រតិបត្តិការ ដែលដឹកនាំផ្ទាល់ដោយ កញ្ញា ទីវ គឹម កល្យាណ តំណាង អយ្យការ និង លោកវរសេនីយ៍ឯក អ៊ំ អមរា ស្នងការរង ទទួលបន្ទុក បង្ក្រាបបទល្មើស និងលោកវរសេនីយ៍ត្រី ស៊ឿន សេន ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការនគរបាល ខេត្តសៀមរាប និង មន្ត្រីគយស្នាក់ការសាខាខេត្តសៀមរាប បានធ្វើឡើងចាប់ពីម៉ោង១២ថ្ងៃត្រង់ ហើយបញ្ចប់នៅម៉ោង៣រសៀលថ្ងៃទី៩ ខែឧសភា ឆ្នាំ២០១៤នៅទីតាំងក្នុងដីឡូត៍( ឃ្លាំង) ស្ថិតនៅក្រុមទី២ ភូមិតាវៀន សង្កាត់សាលាកំរើក ក្រុងសៀមរាប។
ក្នុង ប្រតិបត្តិការនេះ ជំហានដំបូងគឺផ្ដើមឡើងពីការសង្ស័យរបស់កម្លាំងនគរបាលប្រឆាំង បទល្មើសសេដ្ឋកិច្ច ដោយបានឃាត់រថយន្តប្រភេទកាមរី ពណ៌ត្រាវ១គ្រឿង ពាក់ស្លាកលេខ បាត់ដំបង 2A 5937មួយគ្រឿងដែលបានឈប់ពីមុខទីតាំងឃ្លាំងនេះ(សង្ស័យថាដឹក អីវ៉ាន់ចេញចែកចាយ)ក៏បាន ស្ទាក់សួរនាំ នេះក៏បានបែកធ្លាយ រហូតដល់សុំដីកាពីតុលាការដើម្បីឆែកឆេរ ឃ្លាំងនេះ ហើយក៏ឈានទៅដល់ការរកឃើញ អីវ៉ាន់មួយចំនួន ដែលស្ដុក នៅក្នុងឃ្លាំងនេះគឺពុំមានឯកសារគ្រប់គ្រាន់ទៅតាមផ្លូវច្បាប់។
ពេលនោះសមត្ថកិច្ចចម្រុះបានធ្វើការដកហូតបណ្ដោះអាសន្ននូវអីវ៉ាន់ មួយចំនួនដូចជា ទី១. ទឹកភេសជ្ជះ ( តែ អូឈិ ) ចំនួន១២៤ កេស (អត់ពន្ធ), ទី២. ប្រេងឆារ ចំនួន ៣៧៨កេស (១ប៊ីដុងចំណុះ ៥លីត្រ ) ( អត់មានលិខិត ឯកសារ ដើម ), ទី៣. តែម៉ាក ធី ផត ៤១ កេស (អត់ពន្ធ) ក្រៅ ពីនោះ ពុំបានរកឃើញថា អត់មានលិខិតស្នាមនោះទេ(អីវ៉ាន់ជាច្រើនទៀត) គឺបានន័យថា សុទ្ធតែត្រឹមត្រូវតាមច្បាប់ហើយ។ នេះបើយោងតាមការឲ្យដឹងពី មន្ត្រីជំនាញ ដែលចុះមក អនុវត្តន៍ការងារនេះ។
បើតាម ការឲ្យដឹងពីក្រុមមន្ត្រីជំនាញបានឲ្យដឹងថា ម្ចាស់ ទីតាំង ឃ្លាំង ទំនិញ មាន ឈ្មោះ លី វ៉ាន់ ភេទ ស្រី ត្រូវជា ប្រពន្ធ របស់លោក ស៊ន់ ហុក អាយុ៥៩ឆ្នាំមានទីលំនៅ ទីតាំង ខាងលើនេះ។ ខណៈពេលដែលសមត្ថកិច្ច ព្យាយាមធ្វើទៅតាមនីតិវិធីច្បាប់ (ដកហូតយកឥវ៉ាន់)ដើម្បី ឲ្យម្ចាស់ទំនិញយកលិខិតស្នាមដើមជូនសមត្ថកិច្ចជំនាញដើម្បី ពិនិត្យ នោះស្រាប់តែ ស្ត្រី នោះបាន ទ្រហោ យំ តែម្ដង ដោយគាត់ស្រែកយំយ៉ាងខ្លាំងៗថា គាត់រកស៊ីនេះស្របច្បាប់តើ? ម៉េច សមត្ថកិច្ច ដកហូត យក ឥវ៉ាន់គាត់ៗ សុំឲ្យសមត្ថកិច្ចរក្សាទុកឥវ៉ាន់ នៅក្នុង ឃ្លាំង គាត់នោះហើយ។ តែទោះបីជាយ៉ាង ណាកញ្ញា ទីវ គឹមកល្យាណ ដែលជាព្រះរាជអាជ្ញារងពុំបាន ធ្វើតាមការស្នើសុំ ស្ត្រី នោះទេ គឺគាត់ អនុវត្តន៍ទៅតាមតែនីតិវិធីច្បាប់ តែប៉ុណ្ណោះ ប្រសិនជា ម្ចាស់យកឯកសារដើមមកបង្ហាញ ឲ្យជំនាញ គយពិនិត្យឃើញថា ត្រឹមត្រូវហើយ នោះជា ការស្រេច ពុំមានបញ្ហា អ្វីនោះទេ។ នេះជាការសម្រេច ចិត្តដ៏ត្រឹមត្រូវ របស់ កញ្ញា ព្រះរាជអាជ្ញារង ដែលបានដឹកនាំកម្លាំង។នេះបើតាមការឲ្យដឹងពីអ្នក ចោមរោម មើលហេតុការណ៍ប្រតិបត្តិការមួយនេះ។
ទោះបីជាមានការទ្រហោយំពីស្ត្រីនោះ យ៉ាងណាក៏ដោយ ដោយមានការពន្យល់ពីផ្លូវច្បាប់ពីមន្ត្រីជំនាញ ឲ្យស្ត្រីម្ចាស់ឃ្លាំងនោះបានយល់ទើប ស្ត្រី នោះពុំមានប្រតិកម្ម បន្តទៀតនោះ គឺសមត្ថកិច្ចបានធ្វើការដកហូតយកអីវ៉ាន់ដែល ពិនិត្យឃើញថាមិន ប្រក្រតី នោះទៅរក្សាទុក នៅស្នាក់ការការិយាល័យ សាខាគយ និងរដ្ឋាករ ខេត្តសៀមរាបជាបណ្ដោះអាសន្ន ដើម្បីរង់ចាំឲ្យម្ចាស់យក ឯកសារ ឬ លិខិត ស្នាម ផ្សេងៗ មកឲ្យ ជំនាញពិនិត្យពេលក្រោយ រីឯអីវ៉ាន់ ដែលអត់ពន្ធត្រូវបង់ពន្ធជូនរដ្ឋទៅតាមផ្លូវច្បាប់ផងដែរ។ តែអ្វីដែលគួរឲ្យកត់សម្គាល់នោះគេសង្កេតឃើញថា ប្រតិបត្តិការនេះ មាន មន្ត្រី គយ មួយ ចំនួន ហាក់ពុំមានការសប្បាយចិត្ត នោះទេ ។ រីឯមន្ត្រី គយ ខ្លះ ផ្សេងទៀត ហាក់ខិតខំប្រឹងប្រែង អនុវត្តន៍ការងារនេះ ទៅតាមផ្លូវច្បាប់ជាមួយជំនាញផ្សេងៗដែលចុះមកធ្វើការឆែកឆេរឃ្លាំង មួយនេះ ដោយ ឃើញ បែបនេះ ហើយត្រូវបានគេនាំគ្នានិយាយថា បែបគយដែលមកនេះមាន២ ក្រុមទេ ដឹង បាន ជាបែប នេះ ? (ដោយមាន ក្រុមមួយមានឆន្ទៈក្នុងការដកហូតយកអីវ៉ាន់នេះទៅរក្សាទុក។ តែមួយក្រុមទៀត ព្យាយាម ពន្យល់ឲ្យរក្សាទុកឥវ៉ាន់នេះនៅទីតាំងដដែល)!? តែទោះបីជាយ៉ាងណាប្រតិបត្តិការនេះ ត្រូវបានបញ្ចប់នៅរសៀលថ្ងៃដដែលនេះដោយជោគជ័យ ៕
ដោយ ៖ វរជន
