ថ្នាក់ដឹកនាំគណបក្សសង្គ្រោះជាតិ នៅព្រឹកថ្ងៃព្រហស្បតិ៍នេះអំពាវដល់ពលករចំណាកស្រុកក្រៅប្រទេសឲ្យវិលត្រឡប់មកប្រទេសរបស់ខ្លួនវិញដើម្បីចូលរួមរៀបចំប្រទេសឲ្យជឿនលឿន បំបាត់អំពើពុករលួយនឹងឲ្យសម្បូរការងារធ្វើ។
ការអំពាវនាវនេះ ធ្វើឡើងបន្ទាប់ពីបញ្ចប់ ការហែក្បួនឃោសនាបោះឆ្នោតក្រុមប្រឹក្សា រាជធានី ខេត្ដ ក្រុង ស្រុក ខណ្ឌ នៅខេត្ដសៀមរាបវេលាម៉ោងជាង១១ ថ្ងៃនេះ។
ប្រធានគណបក្សសង្គ្រោះជាតិ លោក សម រង្ស៊ីថ្លែងទៅកាន់អ្នកគាំទ្រជិត១ម៉ឺននាក់ នៅខាងមុខព្រះអង្គចេកព្រះអង្គចមថា ប្រទេសកម្ពុជា មានការងារធ្វើច្រើនពលរដ្ឋខ្មែរមិនចំបាច់ទៅធ្វើការនៅក្រៅប្រទេសនោះទេហើយលោកអំពាវនាដល់ពលករចំណាកស្រុកនៅក្រៅប្រទេស ជាពិសេសនៅប្រទេសថៃវិលត្រឡប់មកជួបក្រុមគ្រួសារ នៅលើទឹកដីរបស់ខ្លួនវិញនឹងចូលរួមរៀបចំប្រទេសឲ្យបានជឿនលឿន ដើម្បីមានការងារធ្វើច្រើន។
លោកបន្ថែមថា គណបក្សសង្គ្រោះជាតិ កំពុងឈានទៅរកការដឹកនាំប្រទេសព្រោះមានពលរដ្ឋខ្មែរ ពិសេសយុវជន បានគាំទ្រច្រើនដូចព្យុះស៊ូណាមិកដែលអាចធ្វើការផ្លាស់ប្ដូរថ្នាក់ដឹកនាំប្រទេសបាន។
ដោយឡែក អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ដោយ ប្រកាន់ជំហរថា គណបក្សនេះ នៅតែជាអ្នកមានជ័យជម្នះលើគណបក្សប្រជាជនកម្ពុជា។ លោក កឹម សុខា សច្ចានៅមុខព្រះអង្គចេកព្រះអង្គចមថា លោកនឹងការពារឆន្ទះប្រជាពលរដ្ឋ មិនក្បត់ប្រជាពលរដ្ឋបើទោះបីលោកនាយករដ្ឋមន្ដ្រី ហ៊ុន សែន យកលុយរាប់កោដ្ឋមកទិញក៏ដោយ។លោកបានប្ដេជ្ញាថា នឹងយកអំណាចពិតប្រាកដមកជូនប្រជារាស្ដ្រខ្មែរនិងសន្យាបញ្ចប់អំណាចផ្ដាច់ការនៅកម្ពុជា ឲ្យទាល់តែបានជាដាច់ខាត។
មន្ដ្រីជាន់ខ្ពស់ គណបក្សប្រជាជនកម្ពុជា លោក ជៀម យាប មានប្រសាសន៍ថាការអំពាវនេះ ជាសិទ្ធិរបស់ថ្នាក់ដឹកនាំគណសង្គ្រោះជាតិ ឲ្យតែលោក សមរង្ស៊ី និងលោកកឹម សុខា មានថវិកាផ្ដល់ឲ្យពួកគាត់។ លោកថាចំណែកគណបក្សកាន់អំណាច មិនចង់ឲ្យពលរដ្ឋខ្មែរធ្វើចំណាកស្រុកទេប៉ុន្ដែមិនមានថវិកាចិញ្ចឹមពួកគេ។
អ្នកស្រាវជ្រាវបញ្ហាសង្គម លោក កែម ឡី មានប្រសាសន៍ថាប្រទេសកម្ពុជាមានការងារធ្វើច្រើន ប៉ុន្ដែរដ្ឋាភិបាលរៀបចំគោលនយោបាយមិនត្រូវនឹងជំនាញពលរដ្ឋ។ លោកថា បើសិនចង់ឲ្យពលករចំណាកស្រុកវិលត្រឡប់មកធ្វើការនៅប្រទេសខ្លួនវិញលុះត្រារដ្ឋាភិបាលរៀបចំគោលនយោបាយ ប្រាក់ខែអប្បរមា ចាប់ពី១៥០ដុល្លារដល់២០០ដុល្លារឡើងទៅ និងរៀបចំច្បាប់ការងារនិងច្បាប់ជំរុញឲ្យមានការងារធ្វើជាដើម។ លោកដាក់ពាក្យស្លោកមួយថា”ថ្ងៃនេះអត់ការងារធ្វើ ថ្ងៃស្អែកក្រីក្រ” ៕
ដោយ ៖ វរជន
