ខេត្តសៀមរាប ៖ ក្រុមពលរដ្ឋដែលរស់នៅតាមមាត់ស្ទឹងសៀមរាបក្នុងស្រុកបន្ទាយស្រី ស្រុក ប្រាសាទ បាគងនិងស្រុកអង្គរធំ បានសម្ដែងការព្រួយបារម្ភយ៉ាងខ្លាំងបន្ទាប់ពីមានការលបលួចបូមខ្សាច់ កើតមានជាច្រើនកន្លែង ទំនងជាអជ្ញាធរនិងមន្ទីរពាក់ព័ន្ធនានាត្រូវថ្នាំសណ្ដំខ្លះហើយទើបគេសង្កេតឃើញ
មិនមានការចុះបង្ក្រាបសោះឡើយ ។
បើតាមប្រភពពត៌មានពីប្រជាពលរដ្ឋម្នាក់រស់នៅស្រុកបន្ទាយស្រី បានលើកឡើងក្នុងលក្ខ័ណសុំមិនបញ្ចេញឈ្មោះថា សកម្មភាពបូមខ្សាច់កំពុងកើតមានយ៉ាងគំហុកនៅក្បែរមាត់ស្ទឹងបណ្ដាលឲ្យប្រជាពលរដ្ឋ ជួបប្រទះហានិភ័យជាច្រើនដូចជា ប្រឈមនឹងការបាក់ស្រុតផ្ទះ ទឹកល្អក់មិនអាចប្រើប្រាស់បាន ។
ពលរដ្ឋដដែលបានបន្ដលើកឡើងទៀតថា កន្លងមកពួកគាត់ធ្លាប់បានស្នើឲ្យអជ្ញារពាក់ព័ន្ធក្នុងស្រុក ជួយដោះស្រាយកង្វល់របស់ពួកគាត់ផងដែរ ប៉ុន្ដែហាក់បីដូចជាគ្មានពន្លឺបន្ដិចសោះ ដោយអជ្ញាធរបានលើកឡើង ថា កន្លែងកំពុងធ្វើអាជីវកម្មនោះមានច្បាប់ហើយគេមានខ្នងធំ ខ្សែសាលាខេត្ត។
ស្រដៀងគ្នានេះផងដែរពលរដ្ឋរស់នៅស្រុកប្រាសាទបាគងបានលើកឡើងថា ពួកគាត់មានការភ័យ ខ្លាចជាមួយនឹងកន្លែងបូមខ្សាច់ជាច្រើនកន្លែងដែលធ្វើឲ្យបាក់ដី ស្រុត មកប៉ះពាល់ដីស្រែរបស់ពួកគាត់ និងទឹកស្ទឹងដែលពួកគាត់ប្រើប្រាស់ជាប្រចាំមិនត្រូវបានឲ្យគាត់ប្រើប្រាស់ទឹកកខ្វក់ហូរតាមស្ទឹង ហើយបែរជាអជ្ញាធរ ពាក់ព័ន្ធនានាមិនខ្វាយខ្វល់ពីទុក្ខលំបាករបស់ពលរដ្ឋសោះឡើយ ។
ជុំវិញការលើកឡើងរបស់ប្រជាពលរដ្ឋខាងលើនេះ លោកអភិបាលស្រុកបន្ទាយស្រីមិនអាចស្វែងរកសុំការពន្យល់ពីលោកបានទេ យ៉ាងនេះក្ដីលោក ភូ សំអាត អភិបាលស្រុកប្រាសាទបាគងធ្លាប់បានលើកឡើង ថា កន្លែងបូមខ្សាច់ខ្លះមានច្បាប់ កន្លែងខ្លះឥតច្បាប់ ប៉ុន្ដែលោកថានឹងឲ្យមន្ដ្រីរបស់លោកចុះទៅពិនិត្យមើល ភាពមិនប្រក្រតីនេះ ។ចំណែកលោកប្រធានមន្ទីរឧស្សាហកម្មរ៉ែនិងថាមពលខេត្តសៀមរាប ក៏មិនអាចទាក់ ទងសុំការពន្យល់បានដែរទាក់ទងទៅនឹងករណីនេះ ។
ទោះជាមានការលើកឡើងយ៉ាងនេះក្ដីក្រុមប្រជាពលរដ្ឋ បានស្មើឲ្យអជ្ញាធរពាក់ព័ន្ធនានាក្នុងខេត្ត ជួយអន្តរាគមន៍ ទៅលើក្រុមឈ្មួញមូបខ្សាច់អនាធិបតេយ្យនេះផង ព្រោះសព្វថ្ងៃនេះមានករណីបូមខ្សាច់ជា ច្រើនរូបភាពកំពុងបង្កផលប៉ះពាល់ដល់ការរស់នៅរបស់ពួកគាត់ជាខ្លាំង ជាពិសេសទៀតនោះរថយន្ដដឹក ខ្សាច់បើកដោយគ្មានលក្ខណៈបច្ចេកទេសទាល់តែសោះផ្ទុយពីពាក្យស្លោកទីក្រុងស្អាត រមណីដ្ឋានស្អាត សេវាល្អ ។
យោងតាមប្រភពដាច់ដោយឡែកមួយទៀតបានបង្ហើបថា ក្រុមឈ្មួញបូមខ្សាច់ទាំងនោះភាគច្រើន គេអាងមានខ្នងបង្អែក ព្រមទាំងអំណាចបុណ្យស័ក្ដ ទើបគេហ៊ានធ្វើព្យុះធ្វើភ្លៀងបានស្រេចតែចិត្តហើយខាង អជ្ញាធរក៏មិនហ៊ានលូកដៃចូលទៅកកូរ កកាយ ពីបញ្ហាបូមខ្សាច់ខុសច្បាប់នោះដែរ ។ ចំនែកកន្លែងដែលគ្មាន ខ្នងបង្អែកនោះគេប្រើលុយ ជះមកលើមន្ដ្រីជំនាញពាក់ព័ន្ធមួយចំនួនជាថ្នូរនឹងការបូមខ្សាច់ដោយសេរី ៕ ដោយ ៖ វរជន
