ខេត្ដសៀមរាប ៖ រថយន្តកាមរីឆ្លាម ១ គ្រឿងដឹកឈើក្រញូង បានឆាបឆេះយ៉ាងសន្ធោសន្ធៅនៅសល់តែគ្រោងឆ្អឹងដោយសារ បើកបរលឿនជ្រុល ទៅ បុករឺម៉កម៉ូតូ ដឹកស្រូវធ្វើដំណើរស្របទិសគ្នា រួចហើយ ជ្រុលបុកដើមឈើ ។ គ្រោះថ្នាក់ចរាចរណ៍នេះបានកើតឡើង នៅម៉ោង៩និង១០នាទីព្រឹកថ្ងៃទី៧ខែឧសភាឆ្នាំ២០១៤ស្ថិតនៅភូមិខ្នារ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប បណ្ដាលឲ្យអ្នកបើករឺម៉កម៉ូតូរងរបួសធ្ងន់ បាក់ជើងខាងស្ដាំចំណែកអ្នកបើករថយន្តបង្ករបើកទ្វាររត់គេចខ្លួនបាត់ស្រមោល ។
នាយនគរបាលប៉ុស្តិ៍ខ្នារសណ្ដាយលោកអ៊ឹមអុនបានឲ្យដឹងថារថយន្តបង្ករម៉ាកកាមរីឆ្លាមពណ៌ស ពាក់ស្លាកលេខភ្នំពេញ២A-២៦៣៣ បានបើកមកពីទិសខាងជើង ស្របនឹងរឺម៉កបើកមកពីខាងជើង ដូចគ្នា លុះមកចំណុចកើតហេតុខាងលើរថយន្តក៍បានបុករឺម៉កពីក្រោយពេញទំហឹងតែម្ដង។
សាក្សីបានឃើញហេតុការណ៍និយាយថាពួកគាត់បានឃើញរថយន្តនេះបុករឺម៉កពីក្រោយ ហើយរេទៅខាងឆ្វេងបុកនិងដើមកាស្យាទៅមុខលែងរួច ភ្លាមៗនោះពួកគាត់បានឃើញមនុស្ស ៣នាក់ ចេញពីរថយន្តបង្ករត់គេចខ្លួនបាត់ស្រមោល។
មន្ត្រីប៉ូលិសបន្តថាជនរងគ្រោះដែលជាអ្នកបើករឺម៉កមានឈ្មោះកែវ វណ្ណៈ ភេទប្រុសអាយុ ៤៣ ឆ្នាំរស់នៅភូមិត្រពាំងសេះសង្កាត់គោក ចកក្រុង.ខេត្តសៀមរាបក្រោយពេលកើតហេតុត្រូវបានហៅរថយន្ត សង្គ្រោះដឹកយកទៅកាន់មន្ទីរពេទ្យភ្លាមៗផងដែរ។ចំណែករឺម៉កត្រូវបានយកទៅរក្សា ទុកនៅ ប៉ុស្តិ៍រដ្ឋបាលខ្នារសណ្ដាយ ឯស្រូវក្រុមគ្រួសាររងគ្រោះបានមកយកទៅលំនៅឋាន។
ជំនួញឈើគ្រញូងនៅតែសំរុកលួចឆ្មក់ដឹកឆ្លងកាត់ខេត្តសៀមរាបជាហូរហែឆ្ពោះទៅកាន់ខេត្តកំពង់ចាម ប៉ុន្ដែកន្លងមកត្រូវបាន សមត្ថកិច្ចបង្ក្រាប ហើយមួយចំនួនទៀតក៏ប្រឹងលោតឆ័ត្រយកតែប្រាស់ អាយុ ជាក់ស្ដែងដូចករណីខាងលើនេះ សំណាងល្អមិនមាននរណាម្នាក់បាត់បង់ជីវិតក្នុងហេតុការណ៍ នេះទេ។ គួរបញ្ជាក់ផងដែរថា បញ្ហាជំនួញក្រញួងនៅតែមានឥតឈប់ឈរ ហេតុដែលឈើក្រញួងចេញ
មកបានក៏ព្រោះតែបង់លុយឲ្យសមត្ថកិច្ចមុននិង និងពេលចេញដំណើរបើមិនដូច្នោះទេប្រាកដជាត្រូវជាប់អន្ទាក់សមត្ថកិច្ចហើយ ៕
ដោយ ៖ វរជន