ខេត្តរតនគិរី ៖ បុរសម្នាក់បានស្លាប់នៅនិងកន្លែងដោយសារក្រុមក្មេងទំនើងចំនួន ៣ នាក់វាយ និងដំបងជ្រុង ដោយសារមកទារលុយដែលជំពាក់ ធ្វើអោយមានការភ្ញាក់ផ្អើលដល់ប្រជាពលរដ្ឋ និងកម្លាំងសមត្ថកិច្ច ។ ហេតុការណ៍ គួរអោយរន្ធត់នេះបានកើតឡើង នៅវេលាម៉ោង៨និង៣០នាទី ថ្ងៃទី៨ ខែមេសា ឆ្នាំ២០១៤ ចំណុចផ្លូវបំបែកជា៤ ភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី។
សមត្ថកិច្ចប៉ូលិសបានបញ្ជាក់អោយដឹងថា មុនពេលកើតហេតុជនរងគ្រោះមានគ្នាពីរនាក់ជិះម៉ូតូម៉ាក C125 ពណ៌ខ្មៅ ពាក់ស្លាកលេខ រតនគិរី 1A-1618 បានមកទាrលុយថ្លៃជំពាក់លុយស្រាថ្នាំ ស្រាស និងថ្លៃប្រេងសាំង ចំនួន៦៥០០០រៀល ដែលបានជំពាក់ប្រពន្ធរបស់ខ្លួន ។ នៅពេលនោះ ក៏ បានជួបក្រុមក្មេងទំនើងចំនួនបីនាក់នៅផ្លូវបំបែកជិតខារ៉ាអូខេដាន់វើល ហើយទាស់ពាក្យសំដីគ្នាយ៉ាងខ្លាំង ហើយក្រុមក្មេងទំនើងដែលជំពាក់លុយនោះបានទាញដំបងជ្រុងវ៉ៃចំក្បាលនិងកញ្ចឹងករ និងគុម្ពត្រចៀក បែកហូរឈាមស្លាប់នៅនិងកន្លែងភ្លាមៗ ហើយអ្នកដែលរួមដំណើរជាមួយ ក៏បានចុះពីលើម៉ូតូរត់មកប្រាប់ប្រពន្ធនៅឯផ្ទះ ថាប្តីត្រូវគេព្រួតគ្នាវ៉ៃ ។
ប្រពន្ធបានរត់មកឃើញប្តីស្លាប់ក៏បានស្រែកទ្រហោយំអោបបីទាំងឈាមក្រហម ប្រឡាក់ពេញខ្លួន ធ្វើអោយមានការភ្ញាក់ផ្អើលប្រជាពលរដ្ឋ ។ ក្រោយមកកម្លាំងសមត្ថកិច្ចប៉ូលិស ប៉េអឹម មកដល់បានពិនិត្យសាកសព ហើយមានដំបងជ្រុង ៣ កំណាត់នៅនិងកន្លែងកើតហេតុ ហើយក្រុមក្មេងទំនើងដែលបានព្រួតគ្នាវ៉ៃរហូតដល់ស្លាប់នេះ បានរត់គេចខ្លួនបាត់ប្រហែលជាកន្លះម៉ោងក្រោយពេលកើតហេតុ សមត្ថកិច្ចក៏ចាប់បានខ្លួនបានម្នាក់ឈ្មោះ អាតឿ និង២នាក់ទៀតសមត្ថកិច្ចកំពុងតាមចាប់ខ្លួន ។
សមត្ថកិច្ចបានអោយដឹងថា ជនរងគ្រោះដែលត្រូវក្មេងទំនើងព្រួយវាយឲ្យស្លាប់នេះមានឈ្មោះចែ ធឿន (ហៅអាត្រេន) អាយុ២៧ ឆ្នាំ មុខរបររត់ម៉ូតូឌុប និងធ្វើការជាកម្មករ និងមានប្រពន្ធ និងកូនស្រីតូចៗ ២នាក់ មានស្រុកកំណើតនៅភូមិរបាំង ១ ឃុំរបាំង ស្រុកលំផាត់ខេត្តរតនគិរី ។ បន្ទាប់ពីសមត្ថកិច្ចធ្វើកុសល វិច្ឆ័យរួចមក ក៏ បានប្រគល់សពជនរងគ្រោះទៅអោយប្រពន្ធ និងសាច់ញ្ញាតិ យកមsកធ្វើបុណ្យតាមប្រពៃណី ៕
នឿនឦសាន្ត