ខេត្តកណ្តាល ៖ រថយន្តទួរីស១២កៅអីមួយគ្រឿងមានដឹកឈើប្រណីត ត្រូវបានសមត្ថកិច្ចកងរាជអាវុធហត្ថស្រុកពញាឮសហការជាមួយជំនាញរដ្ឋបាល ព្រៃឈើអង្គស្នួល បង្ក្រាបបានកាលពីវេលាម៉ោង២និង១០នាទីរសៀល ថ្ងៃទី១៨ ខែមីនា ឆ្នាំ២០១៤ តាមបណ្តោយផ្លូវលំ ស្ថិតក្នុងភូមិត្រពាំងពុទ្ធ្រា ឃុំទំនប់ធំ ស្រុកពញាឮ ខេត្តកណ្តាល ។
លោក មុំ សាម៉ុន មេបញ្ជាការមូលដ្ឋានកងរាជអាវុធហត្ថស្រុកពញាឮបានឲ្យដឹងថា រថយន្តដឹកឈើប្រណីតដែលត្រូវបានបង្ក្រាបនេះជាប្រភេទរថយន្តទួរីស ១២កៅអី ម៉ាកTOPIC ពណ៌ឈាមជ្រូក ពាក់ស្លាកលេខភ្នំពេញ 2Q-5640 មានផ្ទុកឈើប្រណីតប្រភេទឈើធ្នង់ចំនួន១១ដុំស្មើនឹង១,០៦៨ម៉ែត្រគូប ។
លោកមេបញ្ជាការបានបន្តថា នៅមុនពេលកើតហេតុលោកបានដឹកនាំកម្លាំងកងរាជអាវុធហត្ថស្រុកពញឮ ល្បាតនៅក្នុងភូមិសាស្ត្រឃុំទំនប់តាមបណ្តោយផ្លូវជាតិលេខ៥១ដែលជា ផ្លូវឆ្លងកាត់ពីស្រុកពញាឮឆ្ពោះទៅស្រុកអង្គស្នួល ខណៈកំពុងល្បាតក៍បានប្រទះឃើញរថយន្តដែលមានភិនភាគដូចខាងលើ ដោយមានការសង្ស័យលោកក៍បានដឹកនាំកម្លាំងស្ទាក់រថយន្តឲ្យឈប់ដើម្បី ធ្វើការឆែកឆេរ ។ នៅគ្រានោះអ្នកបើកបររថយន្តបានព្យាយាមបើករថយន្តគេចចូលទៅតាមផ្លូវលំ រហូតដល់វាលស្រែកអ្នកបើកបរក៍បានឈប់រថយន្តទុកចោលហើយគេចខ្លួនបាត់ តែម្តង ។ ក្រោយមកលោកក៍បាននាំយករថយន្តមកកាន់ទីបញ្ជាការមូលដ្ឋាន កងរាជអាវុធហត្ថស្រុកពញាឮ ដើម្បីធ្វើកំណត់ហេតុនិងប្រគល់បន្តទៅឲ្យជំនាញរដ្ឋបាលព្រៃឈើ អង្គស្នួលយកទៅចាត់ការតាមជំនាញ ៕