ភ្នំពេញ ៖ រហូតមកដល់ពេលនេះ ផ្សារមួយចំនួនធំមិនទាន់បានអនុវត្ដបទបញ្ជា របស់លោកអភិបាល រាជធានីភ្នំពេញ ប៉ា សុជាតិវង្ស ទាក់ទិនជុំវិញបញ្ហាយកថ្លៃផ្ញើកង់ ម៉ូតូ រថយន្ដ តាមសៀវភៅបន្ទុកនៅឡើយទេ ដែល តម្រូវឱ្យបង់ថ្លៃ ផ្ញើ កង់ ២០០ រៀល ម៉ូតូ ៣០០ រៀល និងរថយន្ដ ៥០០ រៀល ។
លោក ប៉ា សុជាតិវង្ស អភិបាលរាជធានីភ្នំពេញ បានប្រកាសដាក់បទបញ្ជា កាលពីដើមខែមីនា ឆ្នាំ២០១៤ កន្លងទៅថា គ្រប់ផ្សារទាំងអស់ក្នុងរាជធានីភ្នំពេញ តម្រូវឱ្យយកតម្លៃផ្ញើកង់ ម៉ូតូ រថយន្ដ តាមសៀវភៅបន្ទុក ហើយក៏បានព្រមាន ដកហូត អាជ្ញាប័ណ្ណត្រឡប់មកវិញ ចំពោះម្ចាស់ ផ្ញើ កង់ ម៉ូតូ រថយន្ដទាំងនោះ ប្រសិនបើមិនអនុវត្ដតាមសៀវភៅបន្ទុក។
រហូតមកដល់ពេលនេះ គេបានសង្កេតឃើញផ្សារថ្មី បានអនុវត្ដមុនគេនូវបទបញ្ជានេះ ដោយយកថ្លៃផ្ញើកង់ ២០០រៀល ម៉ូតូ ៣០០រៀល និងរថយន្ដ ៥០០រៀល ប៉ុន្ដែបានបាត់សណ្ដាប់ធ្នាប់បន្ដិចមកវិញ ត្រង់ថាគ្មានអ្នករៀបចំ ឱ្យមានរបៀបចំពោះកន្លែង ផ្ញើ ដោយទុកឱ្យម្ចាស់ជាអ្នករៀបខ្លួនឯង។ ក្រោយការរិះគន់ចំពោះសកម្មភាពខ្វះការទទួលខុសត្រូវនេះ ប្រធានផ្សារថ្មីបាន ហៅម្ចាស់ផ្ញើកង់ ម៉ូតូ និងរថយន្ដ មកណែនាំ រួចហើយឥឡូវនេះសណ្ដាប់ធ្នាប់ បានមានរបៀបរៀបរយវិញហើយ។ ដោយឡែក ផ្សារអូឡាំពិក ដែលកន្លងទៅគ្មានសណ្ដាប់ធ្នាប់ ដោយរថយន្ដចតស្ទើរតែពេញទ្រូងផ្លូវ និងជុំវិញផ្សារ ទើបតែចាប់ផ្ដើមអនុវត្ដ បទបញ្ជាសាលាក្រុង ក្នុងសបា្ដហ៍នេះ រីឯផ្សារមួយចំនួនទៀត មិនទាន់គោរពបទបញ្ជានៅឡើយទេ ។ ដូចជា ផ្សារអូរឫស្សី, បឹងកេងកង, ដើមថ្កូវ, ច្បារអំពៅ និងផ្សារមួយចំនួនធំ ទៀត ។
សហការីទៅអង្កេត កាលពីពេលថ្មីៗ ក្នុងគោលបំណងតាមដាន ថាតើកន្លែងផ្ញើកង់ ម៉ូតូ រថយន្ដ ទាំងបីខាងលើនេះ យកថ្លៃតាមសៀវភៅបន្ទុករបស់ក្រសួងសេដ្ឋកិច្ច និងហរិញ្ញវត្ថុ និងសាលា រាជធានី ភ្នំពេញហើយឬនៅ? ប៉ុន្តែផ្សារទាំងនោះមិនទាន់អនុវត្តតាមសៀវភៅបន្ទុកនៅឡើយទេ ៕