ប្រជាពលរដ្ឋខេត្តកំពង់ឆ្នាំង រិះគន់អាជ្ញាធរចំពោះការផ្ដល់សេវារដ្ឋបាលថ្នាក់ក្រោមជាតិ ដូចជា ការចម្លងសំបុត្រកំណើត និង សំបុត្ររៀបអាពាហ៍ពិពាហ៍ ជាដើម ថាមានតម្លៃខ្ពស់ និងមិនបានចេញវិក្កយបត្រត្រឹមត្រូវ។ ពួកគាត់បញ្ជាក់ថា ការអនុវត្ត បែប នេះ គឺជាទង្វើផ្ទុយទៅនឹងអនុក្រឹត្យរបស់រដ្ឋាភិបាល និងថា ជាចេតនានៃការប្រព្រឹត្តអំពើពុករលួយ ។
ប្រជាពលរដ្ឋនៅឃុំក្រាំងលាវ ឲ្យដឹងនៅថ្ងៃទី១៣ ខែមីនា ថា មន្ត្រីទទួលបន្ទុកចម្លងសំបុត្រកំណើត និងមន្ត្រីថ្នាក់ឃុំខ្លះ បាន ដាក់ តម្លៃធ្វើលិខិតស្នាមផ្សេងៗតាមទំនើងចិត្ត ដោយមិនគិតពីជីវភាពពលរដ្ឋ និងអនុក្រឹត្យលេខ៦៨ថ្មី របស់រាជរដ្ឋាភិបាល កម្ពុជា ស្ដីពីការផ្ដល់សេវារដ្ឋបាលនៅរដ្ឋបាលថ្នាក់ក្រោមជាតិ។ប្រជាពលរដ្ឋម្នាក់រស់នៅឃុំក្រាំងលាវ ស្រុករលាប្អៀរ លោក គ្រោះ សារៀន មានប្រសាសន៍ថា កាលពីពេលថ្មីៗ លោក និងដន្លងបានចំណាយប្រាក់ជិត ១០ម៉ឺនរៀល ដើម្បីចម្លងសំបុត្រ កំណើតចំនួន ៤ សន្លឹក នៅសាលាស្រុកអស់ ២ម៉ឺនរៀល និងលិខិតសម្រាប់រៀបអាពាហ៍ពិពាហ៍កូននៅថ្ងៃទី១៣ ខែមីនា នេះ អស់ចំនួន ៤ម៉ឺនរៀល។ លោកបន្តថា រាល់វិក្កយបត្រទាក់ទងនឹងលិខិតស្នាមទាំងនោះ ទាំងថ្នាក់ឃុំ និងស្រុក មិនបានចេញឲ្យ ឡើយ៖ «ខ្ញុំឲ្យដន្លងខ្ញុំទៅសុំ! ខ្ញុំថាបងឯងទៅសុំគេមើល ក្រែងលោបានខ្លះ មិនដែលការមួយក៏យកអីដល់ ៥ ទៅ ៦ម៉ឺនម្ល៉េះ ស្រាប់តែគាត់ទៅសុំ គាត់ថាបានម្នាក់ត្រឹម ២ម៉ឺន ស្រីក៏យក ២ម៉ឺន ប្រុសក៏យក ២ម៉ឺន។
គ្រាន់ថាសុំឲ្យខាងរដ្ឋាភិបាលកុំឲ្យយកសំបុត្រការហ្នឹងថ្លៃពេក»។តារាងកំណត់តម្លៃសេវារដ្ឋបាលនៅរដ្ឋបាលថ្នាក់ក្រោមជាតិ បានដំឡើងថ្លៃទ្វេដង ដូចជាសេវាចម្លងសំបុត្រកំណើត និងលិខិតបញ្ជាក់កំណើត បញ្ជាក់សំបុត្រអាពាហ៍ពិពាហ៍ និងលិខិត បញ្ជាក់ មរណភាព ជាដើម គឺពី ៤០០រៀល មកដល់ ៥ពាន់រៀលក្នុង ១ សន្លឹក ។ ចំណែកសមាជិកក្រុមប្រឹក្សាស្រុករលាប្អៀរ លោក តេង សុខុម បញ្ជាក់ថា មានប្រជាពលរដ្ឋជាច្រើននៅតាមឃុំមួយចំនួននៃស្រុកនេះបានត្អូញត្អែរជុំវិញបញ្ហានេះ ប្រាប់ទៅ លោក។ លោកថា ក្រុមប្រជាពលរដ្ឋទាំងនោះបានបង្ហើបប្រាប់លោកថា អាជ្ញាធរភូមិបានថា ការដំឡើងថ្លៃសេវា សាធារណៈ ផ្សេងៗ គឺបណ្ដាលមកពីគណបក្សសង្គ្រោះជាតិ ទាមទារឲ្យដំឡើងប្រាក់ខែមន្ត្រីរាជការខ្ពស់ ។
ឆ្លើយតបនឹងបញ្ហានេះ អភិបាលស្រុករលាប្អៀរ លោក ឈឹម វុទ្ធា មានប្រសាសន៍ថា សម្រាប់ស្រុករបស់លោក បានអនុវត្ត អនុ ក្រឹត្យលេខ៦៨ នេះចាប់ពីខែកុម្ភៈ ឆ្នាំ២០១៤ មក ប៉ុន្តែការចេញវិក្កយបត្រ ឬមិនចេញយ៉ាងណា លោកមិនទាន់ក្ដាប់ច្បាស់ នោះទេ ។ លោកបន្តថា ការចំណាយប្រាក់ច្រើនក្នុងការធ្វើលិខិតស្នាមផ្សេងៗ អាចបណ្ដាលមកពីប្រជាពលរដ្ឋនិយម ពឹងពាក់ អ្នកដទៃឲ្យមកជួយធ្វើ ជំនួស៖ «គោលការណ៍ដែលត្រូវយក គឺកំណត់ទៅតាមអនុក្រឹត្យដែល បានកំណត់របស់រាជ រដ្ឋាភិបាល លេខ៦៨ ហ្នឹង ជាពិសេសថ្ងៃនេះនៅថ្នាក់ខេត្តកំពុងតែធ្វើសន្និបាត»។មន្ត្រីសម្របសម្រួលសមាគមអាដហុក(Adhoc) ប្រចាំ ខេត្តកំពង់ឆ្នាំង លោក សំ ច័ន្ទគា ថ្លែងថា ដើម្បីឲ្យទទួលបាននូវតម្លាភាពនៃការទទួល និងផ្ដល់សេវាកម្មរដ្ឋបាលថ្នាក់ក្រោម ជាតិ នេះ អាជ្ញាធរត្រូវតែបិទផ្សាយតម្លៃសេវានៅគ្រប់ទីកន្លែងផ្ដល់សេវា និងផ្សព្វផ្សាយឲ្យកាន់តែទូលំទូលាយដល់មូលដ្ឋាន៖ «ថ្លៃអាករផ្សេងៗ លើសេវាសាធារណៈក្រោមជាតិនេះ យើងមិនប្រកែកអីទេ ប៉ុន្តែរដ្ឋាភិបាលត្រូវតែពិនិត្យ និងដាក់ទណ្ឌ កម្ម ធ្ងន់ធ្ងរទៅលើនរណាដែលបានប្រព្រឹត្តអំពើពុករលួយ នៅក្នុងហ្នឹង ៕