សៀមរាប ៖ តំណាងប្រជាជនចំនួន៤២០គ្រួសារមកពីបីភូមិក្នុងឃុំពាក់ស្នែង ស្រុកអង្គរធំ ខេត្តសៀមរាបបានមកធ្វើការតវ៉ាសុំឲ្យអាជ្ញាធរខេត្តធ្វើការរំសាយ នូវសមាគមន៍កសិករអភិវឌ្ឍន៍ដែលពុំទាន់បានច្បាប់អនុញ្ញាតពីក្រសួង មហាផ្ទៃហើយបានធ្វើការបំពានរំលោភធ្វើឲ្យប៉ះពាល់ដីបង្កបង្កើនផល និងដីលំនៅដ្ឋានរបស់ប្រជាពលរដ្ឋនៅភូមិពាក់ស្នែងថ្មី ភូមិលាភ និងភូមិខ្ទីង ចំនួន៥.១០៦ហិចតា។
ក្នុង សកម្មភាពដែលប្រជាពលរដ្ឋធ្វើការតវ៉ានោះយើងសង្កេតឃើញមានបណ្តាញសារ ព័ត៌មានជាតិ និងអង្គការសង្គមស៊ីវិល នាវេលាម៉ោង១០និង៣០នាទីព្រឹកថ្ងៃទី១១ ខែមីនា ឆ្នាំ២០១៤ នៅមុខរដ្ឋបាលសាលាខេត្តសៀមរាប។
តាមសម្តីរបស់តំណាងប្រជាពលរដ្ឋទាំង៤២០គ្រួសារបានបញ្ជាក់ដល់អ្នកសារ ព័ត៌មានយើងឲ្យដឹងពីសកម្មភាពរបស់សមាគមន៍កសិករអភិវឌ្ឍន៍ដែលពុំ ទាន់មានច្បាប់អនុញ្ញាតនោះដែលមានឈ្មោះ ស៊ិន សិក ជាប្រធានសមាគមន៍បានធ្វើការបោះបង្គោលទៅលើដីស្រែចំការ និងលំនៅដ្ឋានរបស់គាត់ ដោយមានការប្រើប្រាស់នូវកម្លាំងប្រដាប់អាវុធធ្វើការគម្រាមដល់ ពួកគាត់ដើម្បីធ្វើការវាស់វែងបោះបង្គោលចែកដីគ្នា។ ក្នុងនោះតំណាងប្រជាពលរដ្ឋក៏បានឲ្យដឹងទៀតថា ទំហំផ្ទៃដីចំនួន៥.១០៦ ហិចតានេះគឺស្ថិតនៅក្នុងដីកាដកលេខ១១៤ របស់សាលាខេត្តកាលពីពេលកន្លងមក។ លោកក៏បានបញ្ជាក់ទៀតថា ក្នុងរយៈពេលកន្លងមកសាលាខេត្តបានចេញដីកាលេខ១១២ ដកហូតជម្រកដីព្រៃឈើស្ថិតក្នុងឃុំស្វាយចេក និងដីកាលេខ១១៣ ស្ថិតនៅឃុំជប់តាត្រាវរបស់ស្រុកអង្គរធំ។
ក្នុងឱកាសនោះដែរ ក៏ត្រូវបានលោក លី សំរិទ្ធ នាយករដ្ឋបាលសាលាខេត្តសៀមរាបក្នុងនាមតំណាងអភិបាលខេត្តក៏បានធ្វើ ការសម្របសម្រួល និងធ្វើការណែនាំព្រមទាំងសូមឲ្យបងប្អូនប្រជាពលរដ្ឋទាំងអស់ដែល មានដីធ្លី និងលំនៅដ្ឋានស្ថិតក្នុងតំបន់ប៉ះពាល់ជាមួយសមាគមន៍កសិករអភិវឌ្ឍន៍ សូមបងប្អូននៅកន្លែងណារក្សាកន្លែងនឹងដដែល ក្នុងការធ្វើស្រែចំការប្រកបរបរចិញ្ចឹមជីវិតរបស់ខ្លួន។លោកបាន បន្តទៀតថា នៅថ្ងៃខាងមុខនេះក្រុមគណៈកម្មការដោះស្រាយវិវាទដីធ្លីខេត្ត និងចុះទៅធ្វើការដោះស្រាយផ្ទាល់នៅកន្លែងដីប៉ះពាល់នោះព្រមទាំង អនុវត្តឲ្យបាននូវបទបញ្ជាលេខ០០១បប ក្នុងការអនុវត្តនូវនយោបាយចាស់សកម្មភាពថ្មីរបស់រាជរដ្ឋាភិបាល។
ក្រោយពីការសម្រុះសម្រួលរួចមកបងប្អូនជាតំណាងប្រជាពលរដ្ឋទាំង៤២០គ្រួសារ ក៏បានវិលត្រឡប់ទៅកាន់លំនៅដ្ឋានវិញដោយបានពាំនាំនូវក្តីសង្ឃឹម ជឿទុកចិត្តចំពោះអាជ្ញាធរខេត្តផងដែរ៕
