ភ្នំពេញៈ ក្រសួងយុត្តិធម៌ កំពុងរៀបចំសេចក្ដីព្រាងច្បាប់ស្ដីពីលក្ខន្តិកៈនៃចៅក្រម និងសហព្រះរាជអាជ្ញា ដើម្បី ពង្រឹង ប្រព័ន្ធយុត្តិធម៌នៅប្រទេសកម្ពុជា ដោយសេចក្ដីព្រាងច្បាប់នោះ ត្រូវអះអាងថា ធ្វើឡើងដើម្បីឆ្លើយតបទៅ នឹងស្មារតីនៃរដ្ឋធម្មនុញ្ញមាត្រា១៣៥ ថ្មី និងដើម្បីពង្រឹងនីតិរដ្ឋឲ្យកាន់តែរឹងមាំថែមទៀតក្នុងបំណងធានា ឯករាជ្យ ភាពនៃអំណាចតុលាការ ស្របតាមរដ្ឋធម្មនុញ្ញ និងស្របតាមគោលការណ៍ទាក់ទង នឹងឯករាជ្យភាពនៃអង្គចៅក្រមដែលអនុម័តដោយអង្គការសហប្រជាជាតិ។
ថ្លែងនៅទីស្តីការក្រសួងព្រឹកថ្ងៃ ១២ មីនា លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បានមានប្រសាសន៍ថា ស្រប តាមគោល នយោបាយរបស់រាជរដ្ឋាភិបាល ស្ដីពីកំណែទម្រង់ច្បាប់ និងប្រពន្ធ័យុត្តិធម៌ និងយោងទៅតាមសភាពចាំបាច់ ដែលកម្ពុជាជាសមាជិកអាស៊ាន និងជាសមាជិកនៃអង្គការពាណិជ្ជកម្មពិភពលោកផង។ កម្ពុជាចាំ បាច់ ត្រូវមានប្រពន្ធ័ច្បាប់មួយ ដែលមានរចនាសម្ពន្ធ័ច្បាស់លាស់ ដើម្បីពង្រឹង និងលើកកម្ពស់ឯករាជ្យភាពនៃអំណាចតុលាការ ដែលជាគោលការណ៍សំខាន់មួយ ក្នុងការធានាមុខងារចៅក្រម និងព្រះរាជអាជ្ញា។
លោកបានបន្តថា សាវតានៃសេចក្ដីព្រាងច្បាប់នេះ ត្រូវបានរៀបចំឡើងដោយក្រុមការងារ របស់ក្រសួងយុត្តិធម៌ ជាមួយនឹងជំនួយបច្ចេកទេស កិច្ចសហប្រតិបត្តិការបារាំង និងបានពិនិត្យចប់សព្វគ្រប់ក្នុងឆ្នាំ២០០៧ ហើយបានបញ្ចូនទៅឧត្តមក្រមប្រឹក្សា នៃអង្គចៅក្រម ដើម្បីផ្ដល់យោបល់ក្នុង ឆ្នាំ២០០៧។ បន្ទាប់ពីទទួលបានយោបល់ពីឧត្តមក្រុមប្រឹក្សានៃអង្គចៅក្រម ក្រសួងយុត្តិធម៌ ក៏បានបញ្ចូនសេចក្ដីព្រាងច្បាប់នេះ ទៅទីស្ដីការគណៈរដ្ឋមន្ត្រី ក្នុងអំឡុងឆ្នាំ២០០៧ ដដែលម្ដងរួចមកហើយ។
លោកបញ្ជាក់ថា ក្រុមការងារក្រសួងយុត្តិធម៌ បានពិនិត្យ និងរៀបចំសេចក្ដីព្រាងច្បាប់នេះឡើងវិញ ស្របតាមគោលនយោបាយរបស់រាជរដ្ឋាភិបាល ដែលបានដាក់សេចក្ដីព្រាងច្បាប់ នេះជាអាទិភាព ក្នុងការអនុវត្តយុទ្ធសាស្ត្រកំណែទម្រង់ស៊ីជម្រៅនៃប្រព័ន្ធយុត្តិធម៌ ហើយ៕