ភ្នំពេញ ៖ អតីតមន្ត្រីគណបក្ស នរោត្តម រណប្ញទ្ធិ បានលើកឡើងថា ក្រោយពី ការយាង ចូលឆាក នយោបាយ ឡើងវិញ របស់សម្តចក្រុមព្រះ នរោត្តម រណឫទ្ធិ នោះ មានមតិចំរុះ បានលើក ឡើងផ្សេងៗគ្នា ប៉ុន្តែទោះបីជាយ៉ាងណា ក៏ដោយ នេះជាសង្គម ប្រជាធិបតេយ្យ ដែលប្រជាពលរដ្ឋ មានសិទ្ធិ ក្នុងការបញ្ចេញមតិ ហើយសម្តេចក្រុមព្រះ នរោត្តម រណឫទ្ធិ ក៏ជាប្រជាពលរដ្ឋខ្មែរមួយរូប ដែល មានសិទ្ធិដូចប្រជាពលរដ្ឋទូទៅ ដែលត្រូវបានធានាដោយរដ្ឋធម្មនុញ្ញ។
លោក ប៉ែន សង្ហារ មន្ត្រីខុទ្ទកាល័យសម្តេចក្រុមព្រះ នរោត្តម រណឫទ្ធិ បានថ្លែងថា សម្តេចក្រុមព្រះ នរោត្តម រណឫទ្ធិ ដែលជាបណ្ឌិតច្បាប់ និងជាសាស្ត្រាចារ្យច្បាប់នៅប្រទេសបារាំង បានចាប់ផ្តើមអាជីពជាអ្នកនយោបាយនៅដើមទសវត្សរ៍ឆ្នាំទី៨០ ពីឋានៈជាព្រះអង្គម្ចាស់នៃការតស៊ូ ដើម្បីសេរីភាព រហូតក្លាយជានាយករដ្ឋមន្ត្រីទី១ នៅឆ្នាំ១៩៩៣ ប្រធានរដ្ឋសភាពីឆ្នាំ១៩៩៨ ដល់ឆ្នាំ២០០៦ និងបានដឹកនាំគណបក្សនយោបាយចូលរួមប្រកួតប្រជែងក្នុងការបោះឆ្នោត ចំនួន៤ លើក ដោយទទួលបានជោគជ័យ១លើកនៅឆ្នាំ១៩៩៣ ដែលបានប្រែក្លាយប្រទេសកម្ពុជាពីប្រទសកុម្មុយនីស្ត ទៅជាប្រទេសប្រជាធិបតេយ្យសេរីពហុបក្ស ដែលប្រកាន់យករបបរាជានិយមអាស្រ័យធម្មនុញ្ញ ។ សម្តេចក្រុមព្រះ នរោត្តម រណឫទ្ធិ ធ្លាប់បាននាំមកជូនជាតិនូវសមិទ្ធផលមួយចំនួន និងធ្លាប់បានចូលរួមដោះស្រាយវិបត្តិជាប់គាំងនយោបាយបានចំនួន៣ លើក គឺនៅឆ្នាំ១៩៩៣ ឆ្នាំ ១៩៩៨ និងឆ្នាំ២០០៣ ។ ក្នុងការដោះស្រាយវិបត្តិជាប់គាំនយោបាយនេះ ថ្វីត្បិតតែមិនទទួលបាននូវពេញចិត្តពីសំណាក់សកម្មជនប្រឆាំងក៏ ពិតមែន ក៏ប៉ុន្តែក៏បានធ្វើឲ្យប្រទេសជាតិមានស្ថេរភាពនយោបាយដែរ។
តាម មន្ត្រីដដែលបានអះអាងថា ថ្វីត្បិតតែខកខានមិនបានដឹកនាំគណបក្សនយោបាយចូលរួមក្នុងការបោះឆ្នោត នាអាណត្តិទី៥ ដោយកាលៈទេសៈបង្ខំ និងធ្លាប់បានប្រកាសលាឈប់ពីឆាកនយោបាយចំនួនពីរលើកក្នុងអាណត្តិទី ៤ កន្លងមកក៏ដោយ ក៏សម្តេចក្រុមព្រះ នរោត្តម រណឫទ្ធិ ដែលជាអ្នកនយោបាយ គឺព្រះអង្គតែងតែចិញ្ចឹមចិត្តថា នឹងត្រលប់មកធ្វើនយោបាយឡើងវិញ ហើយព្រះអង្គក៏ធ្លាប់បានមានព្រះបន្ទូលប្រាប់ដល់អ្នកសារព័ត៌មានថា អ្នកនយោបាយតែងតែញៀននឹងការធ្វើនយោបាយ ។ ដូច្នេះមិនមែនជារឿងអ្វីចំឡែកទេ ដែលសម្តេចក្រុមព្រះ នរោត្តម រណឫទ្ធិ មកធ្វើនយោបាយឡើងវិញនោះ។ រឿងមិនចំឡែកត្រង់ថា អ្នកនយោបាយធ្វើនយោបាយ។
ទន្ទឹម នឹងការលើកឡើងខាងលើនេះមានមតិមួយចំនួនបានលើកឡើងថា ការបង្កើតគណបក្សថ្មីរបស់សម្តេចក្រុមព្រះ នរោត្តម រណឫទ្ធិ អាចនឹងនាំឲ្យមានការបំបែកសម្លេងគណបក្សដ៏ទៃ ជាពិសេសគណបក្សប្រឆាំងគណបក្សសង្គ្រោះជាតិ ប៉ុន្តែបើស្តាប់សំដីលោក កឹម សុខា អនុប្រធានគណបក្សសង្គ្រោះជាតិបានថ្លែងថា ការបង្កើតគណបក្សនោះ មិនអាចធ្វើឲ្យបែកសម្លេងគណបក្សប្រឆាំងមួយនេះនឹងមិនអាចបំបែកបានទេ ហើយសម្តេចក្រុមព្រះ ក៏បានមានព្រះបន្ទូលថា បើចងបំបែកសម្លេង មិនមែនបង្កើតពេលនេះទេ គឺត្រូវបង្កើតតាំងពីមុនការបោះឆ្នោតឆ្នាំ២០១៣។
