ភ្នំពេញ ៖ ឈើប្រណីតប្រភេទធ្នង់ និងនាងនួន ប្រមាណចំនួន៥៨កំណាត់ ស្នើនិង ០,៨២៣ម៉ែត្រគូប ក្នុងនោះឈើធ្នង់ ចំនួន ៤៤ កំណាត់ ស្នើនិង ០,៣៨៣ម៉ែត្រគូប និងឈើនាងនួន ចំនួន ១៤កំណាត់ ស្មើនិង ០,៤៤០ ម៉ែត្រគូប ត្រូវបានសមត្ថកិច្ចចំរុះ ដោយមានការចូលរួមពីស្ថាប័នតុលាការរាជធានីភ្នំពេញ ចុះបង្ក្រាបកាលពីរសៀលថ្ងៃទី ២៧ ខែកុម្ភៈ ឆ្នាំ២០១៤ នៅចំណុចផ្ទះគ្មានលេខ ផ្លូវបេតុង ក្រុមទី១ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក អ៊ុន វណ្ណារិទ្ធ នាយរងសង្កាត់រដ្ឋបាលព្រៃឈើភ្នំពេញប្រាប់ឱ្យដឹងថា ប្រតិបត្តិការចុះបង្ក្រាបឈើប្រណីតនេះដឹកនាំដោយលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ អមដោយលោក ហួត ឈួរ ក្រឡាបញ្ជីតុលាការរាជធានីភ្នំពេញ និងមានការចូលរួមពីលោក ហ៊ុន សុងពោ នាយផ្នែកទទួល បន្ទុកសេដ្ឋកិច្ចអាវុធហត្ថផ្ទៃប្រទេស សហការជាមួយអាជ្ញាធរមូលដ្ឋាន ទើបការងារនេះទទួលបានជោគជ័យ។
លោក អ៊ុន វណ្ណារិទ្ធ ប្រាប់បន្តឱ្យដឹងថា នៅក្នុងការចុះបង្ក្រាបនេះ សមត្ថកិច្ចដកហូត បានឈើប្រណីតប្រភេទធ្នង់ និងនាងនួន ប្រមាណចំនួន ៥៨ កំណាត់ ស្នើនិង ០,៨២៣ម៉ែត្រគូប និងម៉ូតូរ៉ឺម៉កសណ្តោង ០១គ្រឿង ម៉ាក DEALIM ពណ៌ក្រហម គ្មានស្លាកលេខ ហើយក្រៅពីនេះ គឺគ្មានអ្វីទៀតនោះទេ។
លោក នាយរងសង្កាត់រដ្ឋបាលព្រៃឈើភ្នំពេញ ប្រាប់បញ្ជាក់ដោយពិនិត្យឃើញថា ការធ្វើសន្និធិឈើប្រណីតខាងលើប្រាស់ចាកច្បាប់ ស្តីពីព្រៃឈើ សមត្ថកិច្ចបានរឹបអូសយកទៅរក្សាទុក នៅទីស្នាក់ការផ្នែករដ្ឋបាលព្រៃឈើ កណ្តាល ដែលមានទីតាំងនៅភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ដើម្បីរង់ចាំកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមច្បាប់នៃព្រៃឈើ ៕