ខេត្តរតនគីរី ៖ ប្រភព ព័ត៌មានពីមន្ត្រីប៉ូលិសប៉ុស្តិ៍ភូមិឡុំ និងភ្នំក្រហមបានអោយដឹងកាលពីរសៀលពីពេលថ្មីៗនេះបានឲ្យដឹងថា មេប៉ុស្តិ៍ ភ្នំក្រហម លោក ហង្ស វុធធិន និងមេប៉ុស្តិ៍ភូមិឡុំ លោក រចំ ជីប និងលោក ស៊ី កយ អនុប្រធានប៉ុស្តិ៍បើកដៃ ឲ្យឈ្មួញដឹកឈើប្រណិតខុសច្បាប់ទៅលក់នៅ ប្រទេសវៀតណាមទាំងយប់ទាំងថ្ងៃ តាមរថយន្តទំនើប និងម៉ូតូដឹកជញ្ជូនឈើ ជាពិសេសនោះមានបុគ្គលមួយរូបឈ្មោះ រ៉ាយ សុខ ដែលជាមន្ត្រីនគរបាលការពារច្រករបៀង និងភ្នំក្រហមជាអ្នករកស៊ីខ្លួនឯងផ្ទាល់ ។
ជាក់ស្តែងនៅយប់ថ្ងៃទី២៣ ខែកុម្ភៈ ឆ្នាំ២០១៤ រថយន្តឡង់គ្រីស័១គ្រឿងរបស់លោកដឹកឈើប្រណិតពេញខូចកណ្តាលផ្លូវ ពេលនោះគេសង្កេតឃើញលោក រ៉ាយ សុខ ដឹកសំភារៈមកជួសជុលរថយន្តឡង់គ្រីស័រដែលខូចនោះហើយ ក៏បើកបរដោយសុវត្ថិភាពដឹកឈើប្រណិតនោះទៅលក់នៅប្រទេសវៀតណាមបាត់ ស្រមោល ចំណែកសមត្ថកិច្ចបានត្រឹមឈរមើលហើយបើករថយន្តចេញរៀងៗខ្លួន។ ហើយនៅរសៀលថ្ងៃទី២៦ ខែកុម្ភៈនគរបាលការពារព្រំដែនគោកលេខ៦២៣ ចាប់បានរថយន្តដឹកឈើប្រណិត១គ្រឿងប្រភេទធ្នង់រួចហើយក៏ចរចាគ្នា ដោះលែងទៅវិញមិនបានផ្តល់ព័ត៌មានអ្នកយកព័ត៌មានឡើយ សង្ស័យពួកគេចរចាបង់លុយអោយសមត្ថកិច្ចទើបមានការស៊ុមគ្រលុំគ្នា ដោះលែងវត្ថុតាងរថយន្ត និងអ្នកបើកបរ ។
ជុំវិញ ការប្រព្រឹត្តិ ឬបើកដៃអោយឈ្មួញរកស៊ីរត់ពន្ធដឹកឈើប្រណិតដឹកតាមរថយន្តនឹងម៉ូតូ តាមច្រករបៀងភូមិឡុំ និងភ្នំក្រហម ព្រមទាំងមន្ត្រីនគរបាលប៉ុស្តិ៍ម្នាក់ឈ្មោះលោក រ៉ាយ សុខ រកស៊ីដឹកឈើប្រណិតខុសច្បាប់ ទៅលក់នៅប្រទេសវៀតណាមនោះ មិនដឹងជា លោក លី វណ្ណរ៉ា មេបញ្ជាការមូលដ្ឋានកងទ័ពការពារព្រំដែនគោកចំណុះអោយប្រតិបត្តិសឹក រងខេត្តរតនគិរី និងលោក វរសេនីយ៍ ងួន សុវណ្ណា មេបញ្ជាការនគរបាលការពារព្រំដែនគោកលេខ៦២៣ បានជ្រាបឬមិនបានជ្រាបនោះទេ ឬដឹងហើយឮហើយប៉ុន្តែធ្វើមិនដឹងមិនឮ សង្ស័យត្រូវថ្នាសណ្ដំ ឬទទួលលាភសក្ការៈរាល់ថ្ងៃខែ ករណីការដឹកឈើខាងលើនេះ សារព័ត៌មានយើងមិនអាចសូមការទំនាក់ទំនង់បានទេ៕