ខេត្តសៀមរាប ៖ គណៈគ្រប់គ្រងវត្ដដំណាក់ទាំងមូល បានធ្វើលិខិតមួយច្បាប់ ទៅលោក ឃឹម ប៊ុនសុង អភិបាលខេត្ដសៀមរាប ឱ្យជួយទប់ស្កាត់ក្លឹបកម្សាន្ដហ៊ីបហប់ ដែលរំខានដល់ការរស់នៅរបស់ ព្រះសង្ឃ, កូនសិស្ស, និងពុទ្ធបរិស័ទជុំវិញវត្ដ។ ក្លឹបកម្សាន្ដហ៊ីបហប់ ស្ថិតនៅចំពីមុខវត្ដដំណាក់ ក្នុងភូមិវត្ដដំណាក់ សង្កាត់សាលាកំរើក ក្រុងសៀមរាប ។
លិខិត របស់គណៈគ្រប់គ្រងវត្ដ ដែលចុះហត្ថលេខា នៅថ្ងៃទី១៩ ខែកុម្ភៈ ឆ្នាំ២០១៤ មានគ្រូសូត្រស្ដាំ និងគ្រូសូត្រឆ្វេង និងមានបោះត្រា ពីភិក្ខុ ខេមនន្ទោ ឈន់ ឈឿន ដែលជាតំណាងឱ្យចៅអធិកាវត្ដដំណាក់ ដែលត្រារបស់ភិក្ខុខេមនន្ទោ ឈន់ ឈឿន បោះត្រាបញ្ច្រាសផងនោះ បានលើកហេតុផលលំបាក ចំពោះមុខចំនួន ៤ ចំណុច ដើម្បីឱ្យលោកអភិបាលខេត្ដសៀមរាប ជួយដោះស្រាយបញ្ហាក្លឹបកម្សាន្ដហ៊ីបហប់នេះ។
បញ្ហាទាំង ៤ ចំណុចនោះគឺ៖
១- គឺក្លឹបកម្សាន្ដហ៊ីបហប់ មានទីតាំងនៅមុខវត្ដដំណាក់ មានសំឡេងខ្លាំងៗ ចេញពីតូរ្យតន្ដ្រី រហូតធ្វើឱ្យកម្រើកដំបូលសាលាឆាន់ និងខ្ទ័រការ៉ូ។
២- គឺក្លឹបកម្សាន្ដនេះ ចាប់ផ្ដើមពីម៉ោង ៧ ឬ ៨ យប់ រហូតដល់ម៉ោង ៤ ទៀបភ្លឺ ជារៀងរាល់រាត្រី ដែលរំខានយ៉ាងខ្លាំងដល់ការរស់នៅរបស់ព្រះសង្ឃ, សិស្ស, ក៏ដូចជា ប្រជាពលរដ្ឋ ដែលរស់នៅជុំវិញវត្ដ និងជុំវិញក្លឹបនោះ។ ប្រជាជនទូទៅនឿយហត់ពេលថ្ងៃ ហើយត្រូវការសំរាកពេលយប់ ឱ្យស្ងប់ តែព្រះសង្ឃ, កូនសិស្សវត្ដ, និងពុទ្ធបរិស័ទ ត្រូវបានរំខានទៅវិញ។ ជាញឹកញាប់ សំឡេងខ្លាំងៗ ធ្វើឱ្យអ្នកទាំងអស់គ្នា ភ្ញាក់ពីដំណេកទាំងកណ្ដាលអធ្រាត ដោយបេះដូងញ័រ រន្ធត់ស្លុតយ៉ាងខ្លាំង ដោយសារសំឡេងហ៊ោកញ្ជ្រៀវ ដោយស្មានថា ចោរប្លន់ ឬជ័យឃោសសង្គ្រាមជាដើម។
៣- វត្ដដំណាក់ ប្រឹងប្រែងជំរុញឱ្យព្រះសង្ឃ និងយុវសិស្ស (ក្មេងវត្ដ) ខិតខំសិក្សារៀនសូត្រ ពិសេសចាប់ពីម៉ោង ៧ យប់ ដល់ម៉ោង ១១ យប់ ជារៀងរាល់ថ្ងៃ តែការរៀនសូត្ររបស់ព្រះសង្ឃ និងកូនសិស្ស បានទទួលការរំខាន ដោយសំឡេងតូរ្យតន្ដ្រីខ្លាំងៗ និងកន្ត្រាក់អារម្មណ៏។
៤- ក្លឹបកម្សាន្ដនេះ បានបង្កឱ្យមានបញ្ហាជាច្រើន ដូចជា អនាម័យ, សន្ដិសុខ និងសណ្ដាប់ធ្នាប់ ជាក់ស្ដែងតែងតែមានបញ្ហាទាស់ទែងគ្នាជាញឹកញាប់ និងអាចឱ្យមានការជំរុញ ឱ្យមានអំពើហិង្សា, ប្រើប្រាស់គ្រឿងញៀន, និងលួចប្លន់ជាដើម។ សកម្មភាពនេះ ជាវប្បធម៌អបាយមុខ ដែលផ្ទុយពីឱវាទ ព្រះពុទ្ធសាសនា មិនតែ ប៉ុណ្ណោះ ទីតាំងនៃក្លឹបកម្សាន្ដនេះ គឺនៅទល់មុខនឹងវត្ដ, ទីប្រជុំជនដួងព្រលឹងវប្បធម៌ និងសាសនាខ្មែរ ដែលធ្វើឱ្យប៉ះពាល់យ៉ាងធ្ងន់ធ្ងរ និងផ្ទុយពីឆន្ទៈនយោបាយ របស់រាជរដ្ឋាភិបាល ក្រោមការដឹកនាំរបស់សម្ដេចទាំង៣។