ភ្នំពេញ ៖ កាលពីថ្ងៃចន្ទបានបញ្ជាឲ្យអភិបាលក្រុង និងខេត្តទាំងអស់ នៅ ទូទាំង ប្រទេស ត្រួតពិនិត្យលើក្រុមហ៊ុន ដែលទទួលបាន អាជ្ញា ប័ណ្ណពីរដ្ឋាភិបាលឲ្យ ប្រមូល ភាស៊ីនៅតាមទីផ្សារ ខណៈដែលមានការរិះគន់យូរមកហើយថា ពួកគេ មានចរិត យាយី មកលើអាជីវករ។
ថ្លែងទៅកាន់ក្រុមឧត្តមមន្រ្តី ក្នុងពិធីប្រគល់សញ្ញាបត្រនិស្សិតសាលាភូមិន្ទរដ្ឋបាល លោក ហ៊ុន សែន បានបញ្ជាក់ថា អាជីវករនៅផ្សារបានប្តឹងអំពីការយាយីពីសំណាក់អ្នកទារភាស៊ី របស់ក្រុមហ៊ុនឯកជន ហើយប្រជាពលរដ្ឋបានទម្លាក់កំហុសមកលើគណបក្សប្រជាជនកម្ពុជាដែលកាន់ អំណាច។
លោក ហ៊ុន សែន បានថ្លែងថា៖ «អ្នកយកភាស៊ីផ្សារ យកលុយពីអ្នកលក់ ហើយទាត់កញ្រែ្ចងគេជាដើម។ ដល់ពេលគេបន្ទោស គេមកបន្ទោសលើ ហ៊ុន សែន។ ដូច្នេះ ត្រូវមើលកុំឲ្យអ្នកដេញភាស៊ីទៅធ្វើផ្តេសផ្តាស ហើយឲ្យឥរិយាបថអ្នកយកភាស៊ី ល្អបន្តិចមើល៎!»។
ការអត្ថាធិប្បាយរបស់លោក ហ៊ុន សែន បានធ្វើឡើងជាលើក ទី១ ចាប់តាំងពីការបោះឆ្នោតជាតិកាលពីខែ កក្កដា ឆ្នាំមុន ដែលគណបក្សប្រជាជនឈ្នះ ៥ អាសនៈនៃអាសនៈចំនួន ១២ នៅមណ្ឌល ភ្នំពេញ ចំណែកឯគណបក្សសង្គ្រោះជាតិទទួលបាន ៧ អាសនៈ។
លោក ឡង់ ឌីម៉ង់ អ្នកនាំពាក្យសាលារាជធានីថ្លែងថា សាលារាជធានីកំពុងរៀបចំវិធានការត្រួតពិនិត្យបញ្ហាដែលលោកនាយករដ្ឋ មន្រ្តីបានលើកឡើង។ លោកបន្តថា៖ «យើងមិនអាចនិយាយលម្អិតបានទេ ខណៈកំពុងរៀបចំវិធានការត្រួតពិនិត្យបញ្ហានេះនៅផ្សារតាមអនុសាសន៍ សម្តេច តេជោ»។
លោកបដិសេធមិនអត្ថាធិប្បាយទេថា តើក្រុមហ៊ុនប៉ុន្មាន ដែលទទួលបានអាជ្ញាប័ណ្ណប្រមូលភាស៊ីនៅ ភ្នំពេញ នោះ។
អាជីវករអាយុ ៤៤ឆ្នាំ ម្នាក់នៅផ្សារ សាមគ្គី សុំមិនបញ្ចេញឈ្មោះ បានប្រាប់ថា អ្នកទារភាស៊ីធ្វើបាបតែអ្នកលក់តាមចិញ្ចើមផ្លូវជុំវិញ ផ្សារ ប៉ុន្តែគ្មានបញ្ហាសម្រាប់អ្នកក្នុងផ្សារទេ។
អ្នកស្រី និយាយថា៖ «ខ្ញុំមិនឃើញមានបញ្ហាខ្លាំងនៅផ្សារទេ ប៉ុន្តែក្រៅផ្សារ ពិសេសអ្នកនៅតាមផ្លូវជុំវិញផ្សារ តែងមានបញ្ហាជាមួយនឹងអ្នកប្រមូលភាស៊ី ព្រោះពេលខ្លះទោះអាជីវករមិនលក់អីក៏ដោយ ក៏ត្រូវបង្ខំបង់ប្រាក់ដែរ បើអាជីវករមិនព្រមបង់ ក៏ឈ្លោះប្រកែកគ្នា។
អ្នកស្រីបន្ថែមថា ចំពោះអាជីវករលក់តាមផ្លូវរៀងរាល់ថ្ងៃពួកគេត្រូវបង់ថ្លៃអនាម័យ ២០០ រៀល ភាស៊ី ៥០០ រៀល និងថ្លៃសន្តិសុខ ៥០០ រៀលចំណែកឯអាជីវករលក់ក្នុងផ្សារបង់តែថ្លៃអនាម័យ និងពន្ធលើមុខទំនិញប៉ុណ្ណោះទេ ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានសម្តែងការស្វាគមន៍ចំពោះ អនុសាសន៍របស់លោកនាយករដ្ឋមន្រ្តី ប៉ុន្តែ ថា ការអនុវត្តជាក់ស្តែងប្រឆាំងនឹងការយាយីត្រូវតែមាន។
លោក យឹម សុវណ្ណ បានបញ្ជាក់ថា៖ «យើងគាំទ្រគ្រប់កំណែទម្រង់ទាំងអស់ដែលផ្តល់ប្រយោជន៍ដល់ប្រជាជន និងអ្នកបោះឆ្នោត»។
លោក ហ៊ុន សែន ក៏បានលើកឡើងជាថ្មីថា កុំខ្វល់ចំពោះភាពជាប់គាំងនយោបាយ ប៉ុន្តែត្រូវជំរុញស្ថាប័នរដ្ឋទាំងអស់ឲ្យដំណើរការតាមធម្មតា ត្រូវរក្សាស្ថិរភាពនយោបាយ សន្តិសុខសង្គម និងម៉ាក្រូសេដ្ឋកិច្ច និងពង្រីកកំណែទម្រង់ឲ្យស៊ីជម្រៅផ្អែកលើគោលនយោបាយដែលមានស្រាប់ និងឲ្យកាន់តែមានប្រសិទ្ធភាពថែមទៀត។ លោកក៏បានជំរុញការងារឲ្យមន្រ្តីរាជការប្រហែល ១៨ម៉ឺន នាក់ទទួលបានប្រាក់ខែតាមធនាគារ និងបង្កើតគណៈកម្មាធិការស៊ើបអង្កេតរបស់រដ្ឋាភិបាលស្តីពីបញ្ហា កម្មករកាត់ដេរ និងការដំឡើងប្រាក់ឈ្នួលផ្អែកលើកំណើនសេដ្ឋកិច្ច។
លោកនាយករដ្ឋមន្ត្រីក៏នឹងសម្លឹងផ្តោតទៅលើការផ្លាស់ប្តូរ មន្ត្រីថ្នាក់អភិបាល និងអភិបាលរងខេត្ត ហើយនិងអភិបាលស្រុក និងអភិបាលរងស្រុកណាដែលមានអាយុលើស ៦០ឆ្នាំ ផងដែរ ៕
បងប្អូន ជួយមើលចរិតក្រុមទាភាស៊ី នៅផ្សារដើមគរ
