ភ្នំពេញ ៖ លោកប៉ា សុជាតិវង្ស អភិបាលនៃគណៈអភិបាលរាជធានីភ្នំពេញកាលពីព្រឹកថ្ងៃទី ១៨ កុម្ភៈ ឆ្នាំ២០១៤ បានរៀបចំកិច្ចប្រជុំផ្សព្វផ្សាយការងារមួយជាមួយអាជ្ញាធរខណ្ឌទាំង៩ និងមន្ត្រីមានសមត្ថកិច្ចពាក់ព័ន្ធមានមេ ប៉ូលិសនិងប៉េអិម ដែលកិច្ចប្រជុំនេះបានផ្តោតសំខាន់លើកិច្ចការពារសន្តិសុខ សុវត្ថិភាព សណ្តាប់ធ្នាប់សាធារណៈក្នុងរាជធានីភ្នំពេញ។ ហើយ ក្នុងឱកាសនោះលោកអភិបាលបានជម្រុញឲ្យអាជ្ញាធរខណ្ឌទាំងអស់ត្រូវ រៀបចំសណ្តាប់ធ្នាប់តាមផ្សារ និងតាមដងផ្លូវឲ្យមានរបៀបរៀបរយដោយត្រូវជ្រើសរើសយកបុគ្គលិក ជាប់កិច្ចសន្យាតាមខណ្ឌដើម្បីអនុវត្តការងារនេះផងដែរ។
លោកប៉ា សុជាតិវង្ស បានមានប្រសាសន៍ថា បន្ទាប់ពីបោះឆ្នោត និងបង្កើតរដ្ឋាភិបាល ស្ថាប័នជាតិគ្រប់លំដាប់ថ្នាក់រួចគឺបានដំណើរការ និងបំពេញតួនាទីជាធម្មតា រួមទាំងទំនាក់ទំនងអន្តរជាតិផងដែរ ក្នុងនោះក្នុងរយៈពេលចុងក្រោយនេះ ប្រព័ន្ធផ្សព្វផ្សាយបានចាប់អារម្មណ៍លើបញ្ហាសង្គមច្រើនជាងនយោបាយ។
លោក បន្តថា ការកែទម្រង់ដែលរាជរដ្ឋាភិបាលដាក់ចេញក្នុងអាណត្តិទី៥នេះ គឺត្រូវការពេលវេលា ប៉ុន្តែបញ្ហាចំពោះមុខដែលរាជធានីភ្នំពេញត្រូវធ្វើគឺគ្រប់ខណ្ឌ ទាំងអស់ត្រូវរៀបចំសណ្តាប់ធ្នាប់តាមដងផ្លូវ និងតាមផ្សារឲ្យមានរបៀបរៀបរយប្រយោជន៍សម្រួលដល់ការធ្វើដំណើរ និងការរស់នៅរបស់ប្រជាជនទូទៅ ។លោកអភិបាលបន្តថា ការកែទម្រង់អ្វីមួយ វាធ្វើឡើងមិនងាយស្រួលនោះទេ ដាច់ខាតត្រូវតែទទួលរងការឈឺចាប់ហើយ រួមទាំងការកែទម្រង់រដ្ឋបាល និងការកែទម្រង់មន្ត្រីរបស់យើង។ ជាធម្មតាទេការកែទម្លាប់មនុស្សពិតជាពិបាក ប៉ុន្តែដាច់ខាតការងារនេះយើងត្រូវតែធ្វើដើម្បីជាតិ និងប្រជាពលរដ្ឋរបស់យើង។
ក្រោម ការដឹកនាំរបស់លោកប៉ា សុជាតិវង្ស ជាគណៈអភិបាលរាជធានីភ្នំពេញអាណត្តិទី២នេះ បានដាក់ចេញជាផែនការជាអតិភាពមួយចំនួនដើម្បីធ្វើអោយរាជធានី ភ្នំពេញមានការរីកចំរើន និងកាត់បន្ថយបញ្ហាប្រឈមដែលកើតមានកន្លងមក និងកំពុងតែកើតមាននោះគឺរូបមន្ត “ផ្តុំ៣ ផ្តាច់២ ផ្តើម១ “ ក្នុង នោះការស្តារជួសជុលប្រឡាយលូ បញ្ហាសម្រាម បញ្ហាស្តាហេដ្ឋារចនាសម្ព័ន្ធផ្លូវថ្នល់ បញ្ហារៀបចំសណ្តាប់ធ្នាប់តាមដងផ្លូវ ការធ្វើចរាចរណ៍ក៏ស្ថិតក្នុងរូបមន្ត”ផ្តុំ៣ ផ្តាច់២ ផ្តើម១ ” នេះផងដែរ៕