ខេត្តព្រះសីហនុ ដីឆ្នេរសមុទ្រ នៅចំណុច ភូមិអូរត្រេះ ឃុំអូរត្រេះ ស្រុកស្ទឹងហាវ ខេត្តព្រះសីហនុ ត្រូវបាន គេរំលោភ យក ប៉ុន្តែន្ត្រីជំនាញ គ្រប់ជាន់ ថ្នាក់ រាប់ទាំងអភិបាល ខេត្តព្រះសីហនុ ផងដែរ បានរក្សាភាពស្ងៀមស្ងាត់ ចំពោះសកម្មភាពនេះទៅវិញ?។
មនុស្សដែលរំលោភ យកដីសាធារណះ ធ្វើកម្មសិទ្ធិត្រូវបានគេរាយការណ៍ថាឈ្មោះ សុង ជាអនុប្រធានសន្តិសុខ រោងចក្រប្រេងកាត ដែលបានចាក់គ្រឹះធ្វើរបង ចាក់ដីលយចូលក្នុងផ្ទៃសមុទ្រ ជម្រៅជាង ៥០ម៉ែត្រ នៅចំណុចភូមិអូរត្រេះ ឃុំអូរត្រេះ ស្រុកស្ទឹងហាវ ខេត្តព្រះសីហនុ បំពានច្បាប់ដោយចំហរតែ គ្មាននរណាអើពើទប់ស្កាត់នោះទេ មិនដឹងជាលោក សុង រត់ការបង់លុយ ឲ្យមន្ត្រីជំនាញនិងសមត្ថកិច្ចពាក់ព័ន្ធ អស់ប៉ុន្មានទេ ទើបមានសិទ្ធិអំណាចធ្វើអ្វីៗ តាមតែទំនើងចិត្ត ថែមទាំងយកឈ្មោះ អ្នកមានអំណាច មកបិទមុខផងដែរ។
ដីឆ្នេរសមុទ្រដែលលោក សុង កំពុងធ្វើសកម្មភាព ចាក់ដីយកធ្វើជាកម្មសិទ្ធិផ្ទាល់ខ្លួន ដោយខុសច្បាប់នោះ មានទំហំ ៣៧ ម៉ែត្រ លយចូលក្នុង ផ្ទៃសមុទ្រជាង ៥០ម៉ែត្រ តាមរយៈការរៀបរបង ជាជញ្ជាំងកម្ពស់ ៤ម៉ែត្រ ប្រើប្រាស់រថយន្តធំៗ ដឹកដីក្រហម និងថ្មគ្រប់ប្រភេទយកទៅ ចាក់បំពេញដីនោះ រាប់រយគ្រឿងក្នុងមួយថ្ងៃៗ។ សកម្មភាពចាក់ដីរំលោភយកឆ្នេរសមុទ្រ មកធ្វើជាកម្មសិទ្ធិផ្ទាល់ខ្លួន មន្ត្រីជំនាញបានឆ្លើយដាក់គ្នា ដោយខាងអភិបាលស្រុកស្ទឹងហាវ បានទម្លាក់ការទទួលខុសត្រូវ លើជំនាញជលផល សូម្បីតែមន្ត្រីជំនាញផ្នែកសុរិយោដី និងសំណង់ របស់លោក សូ សុខ ក៏រក្សាភាពស្ងៀមស្ងាត់ មិនហ៊ានហើបមាត់នោះទេ ហើយទុកឱកាសឲ្យលោក សុង ចាក់បំពេញដីឆ្នេរសមុទ្រ យ៉ាងសុខស្រួលបំផុត។
មានការរំលឹកថា អំឡុងពេលប្រកាសតែងតាំង អនុប្រធានជលផលឈូងសមុទ្រ កាលពីខែមករា កន្លងទៅនេះ លោក ណៅ ធួក ប្រធានរដ្ឋបាលជលផល បានព្រមានថា ករណីចាក់ដីរំលោភយកឆ្នេរសមុទ្រ ធ្វើជាកម្មសិទ្ធិផ្ទាល់ខ្លួន ឬការបំពានយកដី ព្រៃលិចទឹកយកទៅធ្វើជាកម្មសិទ្ធិ កំពុងរៀបចំឯកសារ ពីគ្រប់ផ្នែកពាក់ព័ន្ធទាំងអស់ ដើម្បីដកហូតយកដីឆ្នេរ និងដីព្រៃលិចទឹក ទាំងនោះ មកធ្វើជាទ្រព្យសម្បត្តិ សាធារណៈវិញ ហើយថែមទាំងចាត់វិធានការ ប្តឹងទៅតុលាការ ចំពោះជនល្មើស ដែលទន្ទ្រានយកដីព្រៃលិចទឹក ឬដីឆ្នេរសមុទ្រ យកទៅធ្វើជាកម្មសិទ្ធិផ្ទាល់ខ្លួនផងដែរ ដូច្នេះគេកំពុងតាមដាន មើលសកម្មភាពរបស់លោក សុង ថាតើនឹងត្រូវសមត្ថកិច្ចពាក់ព័ន្ធ កសាងសំណុំរឿង បញ្ជូនទៅតុលាការ តាមការលើកឡើង របស់លោក ណៅ ធួក ឬក៏អត់។
