កំពង់ឆ្នាំង ៖ អ្នកកាសែតម្នាក់បានស្លាប់ និងពលរដ្ឋ ២នាក់រងរបួសធ្ងន់ និងស្រាល ដោយសារតែក្រុមអ្នក រកស៊ីប្រព្រឹត្ត បទល្មើស ១០នាក់ ព្រួត គ្នាវាយ កាល ពីវេលាម៉ោង 9 និង 30 នាទីយប់ ថ្ងៃទី 31 ខែ មករា ឆ្នាំ 2014 នៅក្នុងភូមិ ក្បាល កន្លង់ ឃុំ ពាមឆ្កោក ស្រុក ជលគីរី ខេត្ត កំពង់ឆ្នាំង ។
ជនរងគ្រោះជាអ្នកយកព័ត៌មានកាសែត មាគ៌ាកម្ពុជា លោក សួន ចាន់ អាយុ 44 ឆ្នាំ រស់នៅក្នុងភូមិ ឃុំកើតហេតុបានស្លាប់ នៅរសៀលថ្ងៃទី 1 ខែ កុម្ភៈ ឆ្នាំ 2014 ខណៈបញ្ជូនបន្តទៅសង្រ្គោះនៅមន្ទីរពេទ្យរាជ ធានីភ្នំពេញ ដល់ពាក់ កណ្តាល ផ្លូវ និង ជនរងគ្រោះចំនួន 2 នាក់ទៀតបានឃើញហេតុការណ៍រត់ទៅជួយតែត្រូវជនល្មើសព្រួតវាយ បណ្តាលអោយជនរងគ្រោះឈ្មោះ គូ ឥន ភេទ ប្រុស អាយុ 27 ឆ្នាំ រងរបួសធ្ងន់ទី2ឈ្មោះ សួន ជីម ភេទ ប្រុស អាយុ 22 ឆ្នាំ រងរបួសស្រាល ទាំងពីរនាក់ នេះ មានទីលំនៅភូមិឃុំកើតហេតុខាងលើ ដូចគ្នា ហើយបច្ចុប្បន្នជនរងគ្រោះទាំងពីរនាក់នេះកំពុងសំរាកព្យាបាលនៅក្នុងមន្ទីរពេទ្យបង្អែក ខេត្តកំពង់ឆ្នាំង ។
ក្រុមគ្រួសារជនរងគ្រោះទាំងបីនាក់ខាងលើ បានអោយដឹងថា ជនសង្ស័យចំនួន 4 នាក់ ទី1 ឈ្មោះ យីម ណាន់ ទី2 ឈ្មោះ យីម នុន ទី3 ឈ្មោះសាំង សេងហៀង និង ទី4 ឈ្មោះ រ៉ុម រ៉ា មុនពេលកើតហេតុ ពួកគេបានយកដុំថ្ម មកគប់ទៅ លើដំបូលរោងឆ្អើត្រី របស់ ជន រងគ្រោះ ឈ្មោះ សួន ចាន់ ដែលធ្វើឲ្យលោក ចេញមករកមើល ហើយសួរថា ពីណាគេ មកគប់អីហ្នឹង ? លុះមួយសន្ទុះក្រោយមក លោក សួន ចាន់ បានដើរទៅទិញបារីជក់ដល់ត្រង់ចំណុចខាងមុខផ្ទះ ឈ្មោះ រុំ ទឿន ស្រាប់តែជនសង្ស័យ 4 នាក់ ខាងលើ នាំ បក្ខពួក ទាំងអស់ចំនួន10 នាក់ យកគល់ឬស្សី និង ដុំថ្ម ព្រួត វាយលោក សួន ចាន់ឲ្យសន្លប់ដេកស្តូកស្តឹង ក្នុងថ្លុកឈាមនៅនឹង កន្លែងកើត ហេតុ តែម្តង ។
ជនរងគ្រោះជាប្រជាពលរដ្ឋចំនួន 2 នាក់ទៀត ឈ្មោះ គូ ឥន និង ឈ្មោះ សួន ជីម ឃើញហេតុការដូចនោះ បានរត់ ចេញបំរុងទៅ ជួយ ប៉ុន្តែត្រូវជនសង្ស័យ ព្រួតវាយបណ្តាលអោយ រងរបួសធ្ងន់ និង ស្រាលផងដែរ ។ ករណីខាង លើ មន្រ្តីនគរបាល ស្រុកជលគីរី លោក រី ផល្លី បានអះអាងនៅព្រឹកថ្ងៃទី 2 ខែ កុម្ភៈ ឆ្នាំ 2014 ថា បានកំណត់មុខ សញ្ញា ជនសង្ស័យបានអស់ហើយ តែជនសង្ស័យ បាន រត់គេច ខ្លួនបាត់អស់ នៅយប់ថ្ងៃកើតហេតុ។
ទោះយ៉ាងណាក៏ដោយក្រុមគ្រួសារជនរងគ្រោះ បានអះអាងថារឿងរ៉ាវខាងលើ នេះផ្តើមចេញពីរឿង គំនុំដោយ សារ លោក សួន ចាន់ តែងតែចេញទៅថតយករូបភាពបទល្មើស ឆក់ត្រីជាក់ស្តែង មកធ្វើការចុះផ្សាយ នៅលើអត្ថបទ សារ ព័ត៌មាន របស់ខ្លួនមិនតែប៉ុណ្ណោះ លោកបានយករូបភាពពាក់ព័ន្ធបទល្មើសនេសាទជាច្រើនអោយទៅអ្នកកាសែត ក្នុង ស្រុកផ្សេងទៀត បន្តធ្វើការចុះផ្សាយធ្វើអោយ ដឹងដល់ សមត្ថកិច្ចថ្នាក់លើ និងធ្វើការចុះបង្រ្កាបបទល្មើសរបស់ ពួកគេ ជាបន្តបន្ទាប់ ។
ក្រុមគ្រួសារជនរងគ្រោះបន្តអះអាងថា មន្រ្តីនគរបាលមូលដ្ឋានមិនបានឃាត់ខ្លួនជនសង្ស័យ ក្រោយពេលកើត ហេតុ ពេញមួយយប់ បណ្តាលអោយជនសង្ស័យរត់គេចខ្លួនដោយសុវត្ថិភាព ។ ក្រុមគ្រួសារជន រងគ្រោះកំពុងតែមាន ការ ព្រួយបារម្ភថាជនល្មើស និង អាច រួចខ្លួនពីសំណាញ់ច្បាប់ ដោយសារជនសង្ស័យទាំងនោះជាអ្នកមានលុយ និង ជាអ្នក រកស៊ីបទល្មើសនេសាទ គ្រប់ប្រភេទ ដូច ជា ឆក់ ត្រីប្រភេទត្រជាក់ និងក្តៅ ដាក់របាំងលបរ៉ូយ៉ាលស្បៃមុង និង ចិញ្ចឹម ត្រីឆ្តោខុសច្បាប់ ហើយមាន ទំនាក់ទំនងល្អជាមួយសមត្ថកិច្ច មូល ដ្ឋាន និង សមត្ថកិច្ចជំនាញរដ្ឋបាលជលផល នៅ តាមគោលដៅទៀតផង ។
យ៉ាងណាក៏ដោយ លោក សៀង សេង ចាងហ្វាងសារព័ត៌មាន «មាគា៌កម្ពុជា » បានអំពាវនាវដោយទទូច ដល់កង កម្លាំង មានសមត្ថ កិច្ច គ្រប់លំដាប់ថ្នាក់ មេត្តាជួយចាប់ខ្លួនជនសង្ស័យ ទាំងអស់នោះ យកមកផ្តន្ទាទោសតាមច្បាប់ផង ៕
