ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងបង្កើតក្រុមការងារចរចា របស់គណបក្សទាំងពីរ ដោយមានសមាសភាពម្ខាងៗ ៣ រូប ដែលរួមមាន៖ ខាងគណបក្សប្រជាជនកម្ពុជា គឺលោក ព្រំសុខា លោក សក់ សេដ្ឋា និងលោក កើត រិទ្ធ។ ចំណែកខាងគណបក្សសង្គ្រោះជាតិ មានលោក យឹម សុវណ្ណ លោក ប៉ុល ហំម និងលោក គួយ ប៊ុនរឿន។
មន្ត្រីជាន់ខ្ពស់គណបក្សប្រជាជនកម្ពុជាបានអះអាងថាក្រុមការងារបច្ចេ ទេសគណបក្សប្រជាជនកម្ពុជា និងគណបក្សសង្គ្រោះជាតិ នឹងជួបពិភាក្សាគ្នានៅថ្ងៃទី៣ ខែមករា ឆ្នាំ២០១៤ វេលាម៉ោង៩ព្រឹក នៅវិមានព្រឹទ្ធសភា ដើម្បីដោះស្រាយបញ្ហាដែលនៅសេសសល់ មុននឹងឈានទៅដល់ការចរចារវាងថ្នាក់ដឹកនាំកំពូលរវាងគណបក្សប្រជាជន កម្ពុជា និងគណបក្សសង្គ្រោះជាតិ។
លោក យឹម សុវណ្ណ បានបញ្ជាក់ថា របៀបវារៈរបស់គណបក្សសង្គ្រោះជាតិ សម្រាប់កិច្ចចរចាក្រុមការងារ ពេលនេះ គឺការកែទម្រង់ប្រព័ន្ធបោះឆ្នោត និងការបោះឆ្នោតឡើងវិញ។ ការបោះឆ្នោតឡើងវិញ ដែលជាមធ្យោបាយតែមួយគត់ ដើម្បីដោះស្រាយ និងបញ្ចប់វិបត្តិនយោបាយ ដែលគណបក្សប្រឆាំង ធ្វើបាតុកម្មតវ៉ា ទៅតាមឆន្ទៈប្រជាពលរដ្ឋ នៅពេលសព្វថ្ងៃ។
លោកព្រុំ សុខា មន្ត្រីជាន់ខ្ពស់គណបក្សប្រជាជនកម្ពុជា បានមានប្រសាសន៍ឲ្យដឹងនៅព្រឹកថ្ងៃទី១ ខែមករា នេះថា ក្រុមការងារគណបក្សទាំងពីរបានឯកភាពគ្នាកំណត់យកថ្ងៃទី៣ ខែមករា ឆ្នាំ២០១៤ ជួបគ្នាពិភាក្សា ដោយកំណត់យកវិមានព្រឹទ្ធសភានៅវេលាម៉ោង៩ព្រឹក។ លោកបានបញ្ជាក់ថា សម្រាប់គណបក្សប្រជាជនកម្ពុជា នឹងយកអ្វីដែលបានឯកភាពគ្នាកាលពីថ្ងៃទី១៦- ១៧ ខែកញ្ញា ឆ្នាំ២០១៣ នៅវិមានរដ្ឋសភា យកមកបន្តការជជែកគ្នាបន្តទៅទៀត។
គណបក្សសង្គ្រោះជាតិ ចង់ឲ្យក្រុមការងារចរចា រវាងគណបក្សប្រជាជនកម្ពុជា និងគណបក្សសង្គ្រោះជាតិ ជួបប្រជុំគ្នាជាថ្មី គឺមុនថ្ងៃដែលគណបក្សសង្គ្រោះជាតិ ដឹកនាំបាតុកម្ម ហែក្បួនជាថ្មីទៀត នៅថ្ងៃអាទិត្យ ទី៥មករា។ នេះបើតាមការបញ្ជាក់របស់លោក យឹម សុវណ្ណ អ្នកនាំពាក្យគណបក្សសង្គ្រោះជាតិ នៅព្រឹកថ្ងៃទី១ មករានេះ។
