ភ្នំពេញ ៖ ក្នុងសន្និសីទសារព័ត៌មាននៅព្រឹកថ្ងៃ សៅរ៍នេះ ឯកឧត្តម សម រង្ស៊ី មានប្រសាសន៍ថា គណបក្សសង្គ្រោះជាតិ ចង់ឲ្យមានការជជែកគ្នាជាទ្រង់ទ្រាយធំមួយ ដែលមានការចូលរួមពីគណបក្សនយោបាយ សហជីព សង្គមស៊ីវិល និងអ្នកពាក់ព័ន្ធផ្សេងទៀត ដើម្បីជជែកពីបញ្ហាប្រទេស ដោយយកប្រយោជន៍ជាតិជាធំ ប្រកបដោយឆន្ទៈក្នុងស្មារតីស្ថាបនាវិជ្ជមាន ។
ឯកឧត្តម សម រង្ស៊ី បន្តថា ប្រទេសកម្ពុជា កំពុងតែមានបញ្ហាអាប់អួរមួយចំនួនជាពិសេសការទាមទារដំឡើងប្រាក់ឈ្នួល ដល់កម្មករ។
ឯកឧត្តម សម រង្ស៊ី ប្រធានគណបក្សសង្គ្រោះជាតិមានប្រសាសន៍ជាលក្ខណៈផ្ញើសារទៅកាន់គណបក្សប្រជាជនកម្ពុជា ជាពិសេសទៅសម្តេចនាយករដ្ឋមន្ត្រី ហ៊ុន សែន ថា ឯកឧត្តមស្នើឲ្យមានការជួបជុំគ្នាជាទ្រង់ទ្រាយធំ ដោយនាំមកនូវគំនិតថ្មី ដើម្បីរកដំណោះស្រាយទៅលើបញ្ហាដែលកំពុងកើតឡើងនៅកម្ពុជា។
ឯកឧត្តម សម រង្ស៊ី បន្តថា ល្មមដល់ពេលគណបក្សនយោបាយជួបគ្នាហើយនៅសប្តាហ៍ក្រោយ គឺដើមឆ្នាំ២០១៤ ដើម្បីកុំឲ្យមានបញ្ហាស្មុគស្មាញ ដោយរកគំនិតថ្មីខ្លះ កុំយកតែគំនិតចាស់ៗ ។ ឯកឧត្តម ចង់មានន័យថា កុំឲ្យការតវ៉ាហួសវែងឆ្ងាយ និងកុំឲ្យកាន់តែធំធ្ងន់ធ្ងរ ។
ឯកឧត្តម សម រង្ស៊ី បញ្ជាក់ថា គំនិតថ្មី គឺសំដៅឲ្យលទ្ធិប្រជាធិបតេយ្យ មានលក្ខណៈរស់រវើក ៕
