ភ្នំពេញ ៖ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលធ្វើការផ្តោតលើអ្នករត់ម៉ូតូឌុប និងសេវាកម្មមួយចំនួនទៀត ប្រកាសធ្វើបាតុកម្មនៅថ្ងៃអាទិត្យ ជំរុញឲ្យរដ្ឋាភិបាលបញ្ចុះតម្លៃប្រេងសាំងឲ្យមកត្រឹម៤០០០រៀលក្នុងមួយ លីត្រ។
អនុប្រធានសមាគម លោក សុខ ឈុនអឿង ប្រាប់អ្នកសារព័ត៌មានយើងថា សមាគមដែលមានសមាជិកជាអ្នករត់ម៉ូតូកង់បី ជាង៤ពាន់នាក់ក្នុងរាជធានីភ្នំពេញ និងអ្នករត់ម៉ូតូឌុបច្រើនពាន់នាក់ទៀត ប្រកាសធ្វើបាតុកម្មនៅថ្ងៃអាទិត្យ ទី២៩ ខែធ្នូ ជំរុញឲ្យរដ្ឋាភិបាលបញ្ចុះតម្លៃប្រេងសាំង ដើម្បីសម្រួលដល់ជីវភាពរស់នៅរបស់ពួកគេ ដែលមានមុខរបរតូចតាច។
លោកបន្តទៀតថា ប្រេងសាំងបច្ចុប្បន្ននេះ មានតម្លៃជាង៥ពាន់រៀលក្នុងមួយលីត្រ ថ្លៃជាងប្រទេសជិតខាង ហើយធ្វើឲ្យប៉ះពាល់ដល់អ្នករកស៊ីក្រៅប្រព័ន្ធ ដែលរកចំណូលបានត្រឹមមួយម៉ឺន ឬតិចជាងនេះក្នុងមួយថ្ងៃ។
ស្របពេលដែលកម្មកររោងចក្រច្រើនម៉ឺននាក់ បានផ្ទុះបាតុកម្មក្នុងសប្តាហ៍នេះ ជំរុញឲ្យថៅកែរោងចក្រដំឡើងប្រាក់ឈ្នួលគោលឲ្យពួកគេដល់១៦០ដុល្លារ ក្នុងមួយខែ៕
