សម្តេចនាយករដ្ឋមន្ត្រី ប្តេជ្ញាហើយប្តេជ្ញាទៀត គាស់រំលើងអំពើពុករលួយ នៅក្នុងសារលិខិតដើម្បីឧទ្ទិសដល់ទិវាប្រយុទ្ធប្រឆាំង អំពើពុករលួយ៩ធ្នូ សម្តេចតេជោនាយករដ្ឋមន្ត្រី បានបញ្ជាក់ជាថ្មីអំពីការប្តេជ្ញាចិត្តរបស់រដ្ឋាភិបាលអាណត្តិ ទី៥ ក្នុងការប្រយុទ្ធ ប្រឆាំងនឹងអំពើពុករលួយដោយគ្មានងាករេ។ សម្តេចនាយករដ្ឋមន្ត្រីទទួលស្គាល់ថា អំពើពុករលួយ គឺជាឧបសគ្គក្នុង ការ អភិវឌ្ឍន៍ ឧបសគ្គសម្រាប់ការរីកលូតលាស់សេដ្ឋកិច្ច និងការកាត់បន្ថយភាពក្រីក្រ ដែលត្រូវតែគាស់រំលើងជាដាច់ខាត។
ប្រមុខរដ្ឋាភិបាលកម្ពុជាក៏បានក្រើនរម្លឹកជាថ្មីម្តងទៀតដល់មន្ត្រីក្រោមឱវាទ ដែលជាមេដឹកនាំក្រសួង ប្រធានស្ថាប័ន និងមន្ត្រី អាជ្ញាធរគ្រប់លំដាប់ថ្នាក់រាប់ទាំងវិស័យឯកជនផង ឲ្យបោស សម្អាតផ្ទះរបស់ខ្លួនតាមរយៈការឆ្លុះកញ្ចក់ មុជទឹក ដុះក្អែលឲ្យ បាន ស្អាតចេញពីអំពើពុករលួយ។ ទន្ទឹមនឹងនោះ សម្តេចនាយករដ្ឋមន្ត្រី ហ៊ុន សែន ក៏បានជំរុញឲ្យក្រសួងអប់រំ និងអង្គភាព ប្រឆាំងអំពើពុករលួយបញ្ចូលបញ្ហាពុករលួយទៅក្នុង កម្មវិធីសិក្សារបស់សិស្សនិងនិស្សិតឲ្យបានក្នុងឆ្នាំសិក្សា ២០១៤ – ២០១៥ ខាងមុខនេះ។
សម្តេចតេជោ ហ៊ុន សែន បានសន្យាថា រដ្ឋាភិបាលរបស់សម្តេចប្តេជ្ញាដោយគាស់រំលើងអំពើពុករលួយ ដែលជាឧបសគ្គនៃ ការ អភិវឌ្ឍន៍ប្រទេស។ ការប្តេជ្ញាចិត្តនេះបានធ្វើឡើងតាមរយៈសារសម្រាប់ទិវាប្រយុទ្ធប្រឆាំង អំពើពុករលួយ៩ធ្នូ។ ក្រៅពីរម្លឹក ឲ្យ មន្ត្រីរដ្ឋាភិបាលឆ្លុះកញ្ចក់ដុះក្អែលខ្លួនឯងឲ្យ ស្អាត ប្រមុខរដ្ឋាភិបាលក៏បានស្នើឲ្យបញ្ចូលមេរៀនអំពើពុករលួយទៅក្នុង កម្មវិធី សិក្សា របស់សិស្ស និងនិស្សិតផងដែរចាប់ពីឆ្នាំ ២០១៤ នេះតទៅ។
សូមបញ្ជាក់ថា នេះជាលើកទី២ហើយដែលសម្តេចនាយករដ្ឋមន្ត្រីបានបង្ហាញពីការប្តេជ្ញាចិត្ត ក្នុងការប្រយុទ្ធប្រឆាំង អំពើពុក រលួយដ៏ខ្លាំងក្លា បន្ទាប់ពី ការបោះឆ្នោតសភាអាណត្តិទី៥មក។ ក្នុងឆ្នាំ ២០១៣ នេះ ប្រទេសកម្ពុជាត្រូវបានអង្គការតម្លាភាព អន្តរជាតិចាត់ចំណាត់ថ្នាក់លេខ ១៦០ ក្នុងចំណោមប្រទេស ១៧៧ លើពិភពលោក។ ចំណាត់ថ្នាក់នេះ បានធ្លាក់ចុះទាប ជាង កាលពីឆ្នាំ ២០១២។
ក្រុមអង្គការសង្គមស៊ីវិលជាង៣០ស្ថាប័នដែលបានចងក្រងគ្នាក្នុង សម្ព័ន្ធអង្គការដើម្បីសុចរិតភាព និងគណនេយ្យភាពសង្គម គ្រោងរៀបចំទិវាប្រឆាំងអំពើពុករលួយក្នុងខេត្តចំនួន៣ នាថ្ងៃទី ៩ធ្នូខាងមុខ។ ខេត្តទាំងបីនោះរួមមាន បាត់ដំបង ស្វាយរៀង និងកំពង់ចាម។ លោក សុក សំអឿន ប្រធានសម្របសម្រួលសម្ព័ន្ធអង្គការនេះបានជំរុញឲ្យរដ្ឋាភិបាល បង្ហាញឆន្ទៈពិតប្រាកដ ក្នុងការប្រយុទ្ធប្រឆាំងអំពើពុករលួយដែលកើត ឡើងជាប្រព័ន្ធនៅកម្ពុជា៕
