កំពត: ធនាគារអភិវឌ្ឍន៍អាស៊ី (ADB) បានសម្រេចផ្តល់ជំនួយ នូវទឹកប្រាក់ចំនួនប្រមាណ ១០០ លានដុល្លារអាមេរិក សម្រាប់ការអភិវឌ្ឍន៍ហេដ្ឋារចនាសម្ព័ន្ធទេសចរណ៍ នៅក្នុងប្រទេសចំនួន៣ ក្នុងចំណោមបណ្ដាប្រទេស មហាអនុតំបន់ទន្លេមេគង្គ (GMS) ក្នុងនោះមាន ប្រទេសឡាវ វៀតណាម និងកម្ពុជា។
ការអភិវឌ្ឍហេដ្ឋារចនាសម្ព័ន្ធគាំទ្រដល់វិស័យទេសចរណ៍នោះ មានដូចជា ការកសាងកំពង់ផែ ការកសាងប្រព័ន្ធសំអាតទឹកកខ្វក់ ធ្វើឲ្យតំបន់ទេសចរណ៍ស្អាត មានអនាម័យ ហើយស្របទៅនឹងប្រធានបទ ទឹកសមុទ្រពណ៌ខៀវស្រងាត់ ទីក្រុងបៃតង បរិស្ថានល្អ ពិសេសតំបន់ឆ្នេរ ការជួយបណ្តុះបណ្តាលធនធានមនុស្ស ការជួយអភិវឌ្ឍន៍ដល់សហគមន៍ទេសចរណ៍ និងការផ្សព្វផ្សាយរួមគ្នា ក្នុងបណ្ដាប្រទេសមហាអនុតំបន់ទន្លេមេគង្គ។
លោកទិត ចន្ថា រដ្ឋលេខធិការក្រសួងទេសចរណ៍ បានប្រាប់អ្នកសារព័ត៌មាន ក្នុងឱកាសលោក បានចូលរួមក្នុងកិច្ចប្រជុំប្រចាំឆ្នាំ លើកទី៣២ របស់បណ្ដាប្រទេសមហាអនុតំបន់ទន្លេមេគង្គ (GMS) កាលពីព្រឹកថ្ងៃទី៦ ខែធ្នូ ឆ្នាំ២០១៣នេះ នៅភ្នំបូកគោថា ធនាគារអភិវឌ្ឍន៍អាស៊ី បានផ្តល់ជំនួយលើការអភិវឌ្ឍហេដ្ឋារចនាសម្ព័ន្ធតំបន់មេគង្គ ទាក់ទងនឹងវិស័យទេសចរណ៍នេះ ក្នុងនោះទឹកប្រាក់ប្រមាណ ១០០ លានដុល្លារអាមេរិក សម្រាប់ជួយដល់ប្រទេសឡាវ វៀតណាម និងកម្ពុជា។