ភ្នំពេញ: អគ្គលេខាធិការរដ្ឋសភា លោក ឡេង ប៉េងឡុង បានចុះហត្ថលេខា លើលិខិតមួយច្បាប់ នៅថ្ងៃទី៦ ខែធ្នូ ឆ្នាំ២០១៣ ដាក់ជូនលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីស្នើសុំចាត់វិធានការ ចំពោះការប្រើប្រាស់ស្លាកលេខរថយន្ត រដ្ឋសភា១ រដ្ឋសភា២ រដ្ឋសភា៣ និងរដ្ឋសភា៤ ដែលបាននិរាករណ៍ ផុតកំណត់។
ក្នុងលិខិតមួយច្បាប់ទៀត ចុះថ្ងៃទី៥ ខែធ្នូ ឆ្នាំ២០១៣ លោក ឡេង ប៉េងឡុង អគ្គលេខាធិការរដ្ឋសភា បានប្រកាសជូនដំណឹងដល់អ្នកតំណាងរាស្ត្រ និងអតីតតំណាងរាស្ត្រទាំងអស់ ឲ្យឈប់ប្រើប្រាស់ស្លាកលេខរថយន្ត ដែលនិរាករណ៍ រួមមាន៖ រដ្ឋសភា១ រដ្ឋសភា២ រដ្ឋសភា៣ និងរដ្ឋសភា៤។
ក្នុងលិខិត បានបង្ហាញថា អគ្គលេខាធិការដ្ឋានរដ្ឋសភា បានរៀបចំ និងផ្តល់ស្លាកលេខ រថយន្ត រដ្ឋសភា ៥ ជូនដល់ តំណាងរាស្ត្រទាំង ១២៣ រូប សម្រាប់ប្រើប្រាស់ផ្លូវការ នៅក្នុងនីតិកាលទី៥ នៃរដ្ឋសភា ឆ្នាំ២០១៣-២០១៨ រួចរាល់អស់ហើយ។ ប៉ុន្តែរយៈពេល កន្លងមក មានរថយន្តមួយចំនួន នៅពាក់ស្លាកលេខរថយន្ត រដ្ឋសភា១ រដ្ឋសភា២ រដ្ឋសភា៣ និងរដ្ឋសភា៤ ដែលត្រូវបាននិរាករណ៍ទៅហើយ ហើយកំពុងធ្វើចរាចរណ៍ តាមដងផ្លូវនៅឡើយ។
ជាការកត់សម្គាល់ ម្រាប់អាណត្តិទី៥ នេះ បេក្ខជនជាប់ឆ្នោតតំណាងរាស្ត្រ ៥៥ រូប របស់គណបក្សសង្គ្រោះជាតិ មិនបានចូលទៅកាន់តំណែងជាអ្នកតំណាងរាស្ត្រ សម្រាប់រដ្ឋសភា នីតិកាលទី៥ នេះទេ។ មូលហេតុមកពីគណបក្សប្រឆាំង បានតវ៉ា នឹងលទ្ធផលបោះឆ្នោត កាលពីថ្ងៃទី២៨ ខែកក្កដា ឆ្នាំ២០១៣។
លោកអគ្គលេខាធិកា រដ្ឋសភា បានគូសបញ្ជាក់ថា “ដូច្នេះ ចំពោះរថយន្តទាំងឡាយណា ដែលនៅតែបន្តប្រើប្រាស់ស្លាកលេខរថយន្តរដ្ឋសភា ដែលអស់សុពលភាព ដូចបានជម្រាបជូនខាងលើ អគ្គលេខាធិការដ្ឋានរដ្ឋសភា ពុំទទួលខុសត្រូវចំពោះរថយន្តទាំងនោះឡើយ។ ក្នុងករណីនេះ អ្នកប្រើប្រាស់រថយន្តទាំងនោះ ត្រូវទទួលខុសត្រូវចំពោះមុខច្បាប់”។
ប៉ុន្តែអ្នកតំណាងរាស្ត្រ គណបក្សប្រឆាំង ចំនួន ២៩ រូប រួមទាំងលោកសមរង្ស៊ីផង ដែលមិនជាប់ឆ្នោត សម្រាប់អាណត្តិថ្មី (អាណត្តិទី៤ គឺមានតំណាងរាស្ត្រ គណបក្សសមរង្ស៊ី ២៦ រូប និងគណបក្សសិទ្ធិមនុស្ស ៣ រូប ) នៅតែបន្តប្រើប្រាស់ស្លាកលេខរថយន្ត រដ្ឋសភា ៤។
សម្រាប់ស្លាក លេខរថយន្ត រដ្ឋសភា ថ្មី អាណត្តិទី៥ នេះ បើសិនជា បេក្ខជនជាប់ឆ្នោតតំណាងរាស្ត្រ ទាំង ៥៥ រូប របស់គណបក្សសង្គ្រោះជាតិ ចង់បានយកមកប្រើប្រាស់ គឺត្រូវតែស្បថ ចូលកាន់តំណែង ជាមុនសិន។ បើមិនដូច្នោះទេ គឺមិនអាចទទួលបានស្លាកលេខរថយន្ត រដ្ឋសភា ៥ យកមកប្រើប្រាស់បានឡើយ៕
