ខេត្តបាត់ដំបង ៖ ប្រជានេសាទនៅឃុំកោះជីវាំង ស្រុកឯកភ្នំ ខេត្តបាត់ដំបង កំពុងតែមានប្រតិកម្មយ៉ាងខ្លាំងទៅលើលោក ឆែល សំណាល ជាប្រធានសហគមន៍នេសាទដែលបានបើកដៃឱ្យកូនបង្កើតរបស់ខ្លួនប្រើប្រាស់អំណាចធ្វើការនេសាទ នៅក្នុងឡូត៍លេខ ៣ ដែលរាជរដ្ឋាភិបាលបានរំលាយចោលដោយទុកឱ្យប្រជានេសាទ ជាលក្ខណៈ គ្រួសារ បែរជាត្រូវបាន ផ្តាច់មុខដោយលោក ណាល ថង មិន ហើយបានអនុវត្តតាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជានោះឡើយ ។
បើតាមសេចក្តីរាយការណ៍ពីខេត្តបាត់ដំបងកាលពីពេលថ្មីៗនេះបានឱ្យដឹងថា អ្នកដែលមានសិទ្ធិអំណាចលើសសម្តេចតេជោ នាយករដ្ឋមន្ត្រី នោះ មានតែលោក ណាល ថង ជាឈ្មួញនេសាទមួយរូបដែលកាន់កាប់ឡូត៍លេខ ៣ ស្ថិតនៅកោះផ្ទូល ភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង ដោយគ្មានខ្លាចញញើតអ្នកណាឡើយ នៅក្នុងស្រុក ឃុំ នឹងខេត្តនោះទេ សូម្បីតែសម្តេចនាយករដ្ឋមន្ត្រី ហ៊ុន សែន បានដាក់បទបញ្ជាលុបចោលឡូត៍ នេសាទទាំងអស់នៅក្នុងបឹងទន្លេសាបជាប្រយោជន៍ឱ្យប្រជាពលរដ្ឋធ្វើការនេសាទជា លក្ខណៈគ្រួសារ ។
ដោយឡែកឈ្មួញនេសាទឈ្មោះ ណាល ថង នេះមានអំណាចខ្ពស់ជាងសម្តេចតេជោ ហ៊ុន សែន ទៅទៀតដោយហ៊ានគ្រប់គ្រងឡូត៍នេសាទលេខ ៣ ដោយផ្តាច់មុខផងដែរ ។ មានន័យថា ត្រឹមតែឈ្មួញនេសាទ ឈ្មោះ ណាល ថង មួយរូបបានក្លាយទៅជាបុរសមហាខ្លាំងលើសសម្តេចតេជោ ហ៊ុន សែន នាយករដ្ឋមន្ត្រី ទៅទៀត ។
ប្រភពដដែលបានបន្តឱ្យដឹងទៀតថា ឈ្មួញនេសាទឈ្មោះ ណាល ថង នេះប្រើប្រាស់ឧបករណ៍បណរ៉ាវ រាប់ពាន់ម៉ែត្រដើម្បីឃាំងយកត្រីគ្រប់ប្រភេទនៅចំណុចកោះផ្ទុល ភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង ដោយសំអាងទៅលើលោក ឆែ សំណាល ជាឪពុក ដែលមានតួនាទីជាប្រធានសហគមន៍នេសាទ ប្រចាំនៅក្នុងឃុំកោះជីវាំងនេះ ទើបធ្វើឱ្យឈ្មោះ ណាល ថង នេះមានសិទ្ធិអំណាចខ្លាំងក្លា ហ៊ានគ្រប់គ្រងឡូត៍នេសាទ លេខ ៣ ហើយ មិនគោរពបទបញ្ហារបស់សម្តេចតេជោ នាយករដ្ឋមន្ត្រី ព្រមទាំងធ្វើសកម្មភាពផ្គើនទៅនឹងសម្តេចតេជោ ហ៊ុន សែន ថែមទៀតផង ។
ប្រភពពីប្រជានេសាទបានឱ្យដឹងថា បើនិយាយពីប្រជាពលរដ្ឋរស់នៅឃុំកោះជីវាំង ខ្លបខ្លាចអំណាចលោក ណាល ថង និងលោក ឆែ សំណាល ហើយបានកាន់កាប់ឡូតូ៍នេសាទលេខ ៣ នេះ រាប់សិបឆ្នាំមកហើយ ពុំមានអ្នកណាហ៊ានប៉ះពាល់អ្វីនោះទេ ។ ក៏ប៉ុន្តែនៅពេលសមត្ថកិច្ចចុះជំនាញចុះបង្ក្រាប គឺមិនហ៊ានបង្ក្រាបកន្លែងដែល ណាល ថង ម្តងណាឡើយ គឺមន្ត្រីជំនាញរួមទាំងលោក ឆែ សំណាល ធ្វើការបង្ក្រាបទីតាំងរបស់ប្រជានេសាទតូចតាចទៅវិញ រីឯបណរ៉ាវរបស់ឪពុក និងកូនប្រធានសហគមន៍នេសាទនេះវិញ មិនត្រូវកាប់បំផ្លាញចោលនោះឡើយ ។
ប្រភពពីកម្មករ យាមបណរ៉ាវឱ្យឈ្មោះ តាទំ បាននិយាយឱ្យដឹងថា ទីតាំងដាក់បណរ៉ាវរបស់ តាទំ ស្ថិតនៅចំណុចផាត់សណ្តាយមានការដាក់បន្តគ្នារដឹក ទៅក្នុងភូមិព្រែទាល់ ។
លោក វ៉េត ភាពជាអ្នកនេសាទមួយរូបដែរនោះបាននិយាយឱ្យដឹងដែរថា លោកបានដាក់បណរ៉ាវ ទ្រង់ទ្រាយតូចនៅចំណុចអូរដៃអំបិល ក្បែរកោះផ្ទូល ហើយក៏ត្រូវតែបង់ប្រាក់ឱ្យសមត្ថកិច្ចដូចគ្នាទាំងអស់មិនថា តូច ឬធំនោះទេ គឺបង់ប្រាក់ជូនដល់សមត្ថកិច្ចជំនាញទាំងអស់ រីឯលោក ណា ថង និងឪពុកលោក ឆែ សំណាល ប្រធានសហគមន៍នេសាទ ឃុំកោះជីវាំងនេះវិញ បែរជាមានសិទ្ធិកាន់កាប់ឡូត៍នេសាទ ៣ ដាក់បណរ៉ាវទ្រង់ទ្រាយធំ បែរគ្មានអ្នកណាទៅបង្ក្រាបម្តងណាឡើយ ៕
