ខេត្តរតនគីរី ៖ លោក ជុំ ងិល ជាអភិបាល ស្រុកវ៉ឺនសៃ កំពុងស្ថិតនៅក្នុងការស៊ើបអង្កេតរបស់តុលាការខេត្តរតនគីរី ពីសកម្មភាពរកស៊ីឈើខុសច្បាប់ ។ លោកអភិបាលស្រុករូបនេះធ្វើសកម្មភាពរកស៊ីឈើពុំមានអាជ្ញាប័ណ្ណទទួល ស្គាល់ពីក្រុមហ៊ុនដីសម្បទានសេដ្ឋកិច្ចណាមួយ ឬក៏ការទទួលស្គាល់ពីក្រសួង ឬមន្ទីរកសិកម្មរុក្ខាប្រមាញ់ និងនេសាទនោះឡើយ ។ លោក ជុំ ងិល រកស៊ីទិញឈើលក់ឈើស្តុកទុក្ខនៅជុំវិញផ្ទះរបស់លោកដើម្បីឱ្យឈ្មួញវៀតណាមចូលមក ដឹកចេញពីចំណុចផ្ទះរបស់ លោកយកទៅវៀតណាម ។
តាមសេចក្តីរាយការណ៍ ខេត្តរតនគិរី បានឲ្យដឹងថា លោកអភិបាលស្រុកវ៉ឺនសៃ ប្រឈមទៅនឹងច្បាប់ប្រសិនបើមានការស៊ើបអង្កេតរកឃើញថា បានប្រព្រឹត្ត សកម្មភាពរកស៊ីឈើ ល្មើសច្បាប់ក្រោយពីមន្ត្រីរដ្ឋបាលព្រៃឈើខេត្តរតនគីរី រកឃើញពីភស្តុតាងពិតប្រាកដនោះរូប លោកនឹងត្រូវដកចេញពីតំណែងហើយប្រឈមមុខទៅក្នុងសវនាការ នឹងទទួលទោសទៅតាមច្បាប់ ។
សេចក្តីរាយការណ៍ដដែលបានបន្តឱ្យដឹងទៀតថា លោកអភិបាលស្រុកវ៉ឺនសៃ ជុំ ងិល នេះបានរកស៊ីឈើនេះ យូរឆ្នាំមកហើយ ពុំដែលមានអ្នកណាមួយចេញមុខបង្ក្រាបនោះទេ ។ លោក ជុំ ងិល ដោយសំអាងខ្លួនជាអភិបាល ស្រុកវ៉ឺនសៃ ហ៊ានប្រព្រឹត្តបទល្មើសព្រៃឈើដោយចេញមុខដោយពុំខ្លបខ្លាចអ្នកណាម្នាក់ឡើយ ។ លោក ជុំ ងិល នេះប្រមូលទិញឈើពីគ្រប់កន្លែងទាំងអស់ ជាពិសេសប្រជាពលរដ្ឋដែលយកឈើមកលក់ឱ្យរូបលោកនោះ គឺអាចរកស៊ីដោយស្រួលបាន ។ ក៏ប៉ុន្តែប្រសិនបើអ្នកណាពុំលក់ឈើឱ្យលោកចៅហ្វាយស្រុកវ៉ឺនសៃនេះទេ គឺត្រូវចាប់ឈើចាប់ទាំងខ្លួនរួមទាំងយានជំនិះទៀតផង ដោយសារមូលហេតុនេះហើយ ទើបអ្នករកស៊ីដឹកឈើទាំងអស់បង្ខំចិត្តត្រូវលក់ឈើជូនលោក ជុំ ងិល ដោយពុំអាចអាក់ខានបាន ។
គួររំលឹកផងដែរថា កាលពីថ្ងៃទី ០៥ ខែធ្នូ ឆ្នាំ២០១៣ លោក រស់ សារ៉ាំ ព្រះរាជអាជ្ញាអមសាលាដំបូងខេត្ត រតនគីរីបានដឹកនាំសមត្ថកិច្ចចម្រុះទៅធ្វើការឆែកឆេរទីតាំងលាក់ឈើរបស់លោក ជុំ ងិល អភិបាលស្រុកវ៉ឺនសៃ ស្ថិតនៅភូមិអូរតិល សង្កាត់បឹងកន្សែង ស្រុកបានលុង ខេត្តរតនគីរី គឺឈើលាក់ទុកនៅជុំវិញផ្ទះ លោកអភិបាលស្រុកនេះតែម្តង ។ ការឆែកឆេររកឃើញជាច្រើនដុំ ជាប្រភេទឈើធ្នង់់, នាងនួន, បេង និងឈើគ្រញូង ដែលសមត្ថកិច្ចទាំងអស់បានកំពុងតែដឹកជញ្ជូនប្រមូលយកទៅកាន់ ខណ្ឌរដ្ឋបាលព្រៃឈើខេត្តរតនគីរី ដើម្បីកសាងសំណុំរឿងនិងរបាយការណ៍ទៅកាន់អគ្គនាយកដ្ឋានរដ្ឋបាលព្រៃឈើដើម្បី សម្រេចថា ត្រូវកសាងសំណុំរឿងបញ្ជូនខ្លួនលោក ជុំ ងិល នេះទៅកាន់តុលាការឬយ៉ាងណា ។
យោងតាមសេចក្តីរាយការណ៍ដដែលបានបន្តឱ្យដឹងទៀតថា លោក ជុំ ងិល អភិបាលស្រុកវ៉ឺនសៃ អាចប្រឈមមុខទៅនឹងតុលាការខេត្តរតនគីរី ប្រសិនបើលោក រស់ សារ៉ាំ ព្រះរាជអាជ្ញារងអមសាលាដំបូងខេត្តរតនគីរី ធ្វើការចោទប្រកាន់ពីបទល្មើសអនុផលព្រៃឈើរូបលោក ជុំ ងិល ប្រាកដជាពុំអាចគេចវេសពីផ្លូវច្បាប់នោះបានឡើយ ។ ទោះជាយ៉ាងណាក៏ដោយក៏លោក ជុំ ងិល អភិបាលស្រុកវ៉ឺនសៃ អាចប្រឈមមុខទៅនឹងតុលាការខេត្តរតនគីរី ដោយសំអាងថា លោកព្រះរាជអាជ្ញារង រស់ សារ៉ាំ រួមទាំងសមត្ថកិច្ចចម្រុះបានធ្វើ សកម្មភាពឆែកឆេរដោយផ្ទាល់ហើយពុំមែនមានតែមនុស្សមួយរូបនោះទេ ដែលបានឃើញគំនរឈើរបស់លោក ជុំ ងិល ។
ដូច្នេះលោក ជុំ ងិល ទំនងជាពុំអាចគេចវេសពីការចោទប្រកាន់ពីលោកព្រះរាជអាជ្ញារង រស់ សារ៉ាំ ហើយ ប្រឈមទៅនឹងការបើកសវនាកា រដើម្បីកំណត់ទោសទណ្ឌពីសំណាក់លោកចៅក្រមសាលាដំបូងខេត្តរតនគីរីទៀតផង ៕
