កំពង់ឆ្នាំង ៖ ប្រជាពលរដ្ឋក្រុមអ្នករកស៊ីដេញថ្លៃ សត្វឃាតនៅក្នុងក្រុងកំពង់ឆ្នាំងបានបញ្ចេញប្រតិកម្មមិនសប្បាយចិត្ត និងរិះគន់ទៅនឹងមន្ទីរសេដ្ឋកិច្ចនិងហិរញ្ញវត្ថុខេត្តកំពង់ឆ្នាំង ដោយពួកគាត់បានសម្តែងនូវការមិនពេញចិត្ត ហើយបញ្ចេញទស្សនៈរិះគន់ថា មន្ទីរសេដ្ឋកិច្ចនិងហិរញ្ញវត្ថុខេត្ត បានទទួលប្រាក់ពីក្រុមអាជីវករក្នុងការដេញថ្លៃសត្វឃាតក្រុងកំពង់ឆ្នាំង ក្នុងម្នាក់ៗចំនួន ៣ លានរៀល ប៉ុន្តែបន្ទាប់ពីយកប្រាក់កក់រួច ហើយពួកគាត់ដេញថ្លៃមិនបាន ហើយមិនបានប្រគល់ប្រាក់មកអោយពួកគាត់វិញទាន់ពេលវេលា សន្យាម្តងថ្ងៃនេះ ម្តងថ្ងៃនោះ មិនចេះចប់ ការិយាល័យនៃមន្ទីរសេដ្ឋកិច្ច និងហិរញ្ញវត្ថុកំពង់ឆ្នាំងចេះ យកលេសថា ចាំថ្នាក់លើសម្រេចសិន ធ្វើអោយពួកគាត់ខាតបង់ពេលវេលា និងផលប្រយោជន៍ រកស៊ីចិញ្ចឹមជីវិត ។
ក្រុមអាជីវករបន្តរិះគន់ថាកន្លងមក ការទទួលយកប្រាក់មកវិញ ពួកគាត់ត្រូវចំណាយប្រាក់ក្នុងម្នាក់ៗចំនួន៥ម៉ឺនទៅ១០ម៉ឺនរៀលផងដែរ ទើបអាចដំណើរបានលឿនគ្រាន់បើបន្តិច ។
អាជីវករមួយចំនួនបាននិយាយថា មន្ត្រីមន្ទីរសេដ្ឋកិច្ចនិងហិរញ្ញវត្ថុខេត្ត កំពង់ឆ្នាំង យកប្រាក់ទាំងនេះទៅប្រើប្រាស់ផល ប្រយោជន៍ផ្ទាល់ខ្លួន ប្រាក់ចំនួន៣លានរៀលវាមិនច្រើនប៉ុន្មានទេ តែ៣លាន គុណនឹងចំនួន ៣០នាក់ទៅ ៤០នាក់ គឺវាច្រើនគួរសមផងដែរ សម្រាប់អ្នកអត់ដោះ ។
ពាក់ព័ន្ធនិងពត៌មានខាងលើនេះ មន្ត្រីនៃ មន្ទីរសេដ្ឋកិច្ចនិងហិរញ្ញវត្ថុខេត្តកំពង់ឆ្នាំងម្នាក់ បានប្រាប់អ្នកយកពត៌មានយើងតាមរយៈទូរស័ព្ទ ថាមន្ទីរសេដ្ឋកិច្ច និងហិរញ្ញវត្ថុខ្លាចច្រឡំតួលេខត្រូវការចាំបាច់ពិនិត្យអោយបានល្អិតល្អន់ជាមុនសិន ទើបបញ្ជូនតួលេខទាំងនេះទៅកាន់រតនាគារដើម្បីបើកប្រាក់ទូទាត់ជូនអាជីវករវិញ រហូតមកដល់ពេលនេះ អាជីវករមិនទាន់ទទួលបានប្រាក់នៅឡើយទេ ៕