កំពង់ឆ្នាំង ៖ សិប្បកម្មផលិតទូកបាឡា ជ័រ ស្មាច់ របស់ជនជាតិវៀតណាមពីរកន្លែង ស្ថិតនៅលើផ្ទះបណ្តែតទឹកលើផ្ទៃទន្លេសាបនៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង បច្ចុប្បន្នប៉ះពាល់យ៉ាងខ្លាំងដល់បរិស្ថាន និង មច្ឆាជាតិ ដែលគេស្គាល់ថាជាជនជាតិវៀតណាម ទី១-ឈ្មោះ មីង យ៉ាំងហៀង ភេទស្រី និងទី២-ជាជនជាតិវៀតណាមដូចគ្នា ហើយមានឈ្មោះ ផៃ គឹមសាន អាយុ៥១ឆ្នាំ ភេទប្រុស វៀតណាម មានទីលំនៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ជាអ្នកឈរឈ្មោះក្នុងការបង្កើតសិប្បកម្មខាងលើនេះ ។
ប្រជាពលរដ្ឋដែលរស់នៅតំបន់នោះ បានរៀបរាប់អោយដឹងថា សិប្បកម្មផលិតទូកបាឡា ជ័រស្មាច់ របស់ជនជាតិវៀតណាមនេះគឺគេប្រើសាធារធាតុដើម សុទ្ធសឹងជាសារធាតុគីមី ហើយកាកសំណល់ និងការផលិតមានការហូរធ្លាក់ចូលទៅក្នុងទឹកទន្លេបានប៉ះពាល់យ៉ាងធ្ងន់ធ្ងរដល់បរិស្ថានធម្មជាតិ និងមច្ឆាជាតិ ដែលរស់នៅក្នុងទឹកទន្លេសាប ។
កន្លងទៅថ្មីៗនេះ មន្តីរបរិស្ថាន ខេត្តកំពង់ឆ្នាំង បានចុះត្រួតពិនិត្យ និងបានអោយម្ចាស់សិប្បកម្មខាងលើធ្វើកិច្ចសន្យា មិនផលិតទូកបាឡាជ័រ-ស្មាច់នៅលើផ្ទែទឹកបន្តទៀត ទេ បើពុំគោរពតាមកិច្ចសន្យានោះទេ សិប្បកម្មខាងលើនឹងត្រូវបញ្ឈប់អាជីវកម្មទាំងស្រុង ។ ប៉ុន្តែមកដល់ច្ចុប្បន្ន ទោះបែបណាក្តី ម្ចាស់សិប្បកម្មខាងលើ នៅតែបន្តសកម្មភាពផលិតបាឡាជ័រ ឬស្មាច់នៅលើផ្ទៃទឹកទន្លេសាបដដែល មិនបានគោរពតាមកិច្ចសន្យា ដោយសំអាងមានអំណាចទឹកប្រាក់ប្រចាំស្រុកបរិបូណ៌ ដែលគេស្គាល់ឈ្មោះ លោក ឈិន គឹមឃន ជាអ្នកកាងម្ចាស់សិប្បកម្មទាំងនេះ ព្រោះនៅក្នុងទឹកដីរបស់គាត់ ។ ផ្ទុយទៅវិញ លោក ឈិន គឹមឃន បានទទួល លាភសក្ការៈពីសិប្បកម្មទាំងនោះ ។
ពាក់ព័ន្ធពត៌មានខាងលើ ពេលអ្នកយកពត៌មានយើងទូរស័ព្ទសុំការសម្ភាសន៍បំភ្លឺ នៅព្រឹកថ្ងៃទី៧ ខែវិច្ឆិកា ឆ្នាំ២០១៣នេះ លោក ឈិន គឹមឃន បាននិយាយដោយខ្លីថា បើចង់ចុះផ្សាយផ្យាយអី ក៍ផ្សាយទៅវា គ្មានបញ្ហាឡើយ ចំពោះរូបលោក។
ករណីខាងលើនេះ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានប្រាប់អ្នកយកពត៌មានយើងថា ឯកឧត្តម បានចំណាត់ការអោយលោកអភិបាលស្រុកបរិបូណ៍ចុះទៅត្រួតពិនិត្យ និងធ្វើកំណត់ហេតុបញ្ជូនមកឯកឧត្តម ដើម្បីត្រួតពិនិត្យ និងចាត់ការ ៕